TV Actor Died In Road Accident : ఆడిషన్స్కు వెళ్తున్న సమయంలో ప్రమాదానికి గురై ఓ బుల్లితెర నటుడు మరణించిన ఘటన ముంబయిలోని జోగేశ్వరిలో జరిగింది. తన బైక్ను ఓ ట్రక్ ఢీ కొట్టడం వల్ల ఆ నటుడు మృతిచెందాడు. అయితే పోలీసులు తనను ఆస్పత్రికి తరలించినప్పటికీ ఫలితం లేకుండా పోయింది. దీంతో ఆయన అభిమానులు, కో స్టార్స్ షాక్కు గురయ్యారు.
అసలేం జరిగిందంటే?
పోలీసులు తెలిపిన వివరాల ప్రకారం ఓ ఆడిషన్ కోసం వెళ్తున్న సమయంలో ఓ ట్రక్కు అమన్ బైక్ను ఢీకొట్టింది. అయితే ప్రమాదంపై సమాచారం అందుకున్న పోలీసులు హుటాహుటిన ఘటనా స్థలానికి చేరుకుని అమన్‌ను స్థానిక బాలాసాహెబ్ ఠాక్రే ట్రామా ఆస్పత్రికి తరలించారు. కానీ మార్గ మధ్యలోనే అతడు మరణించాడని వారు పేర్కొన్నారు.
ప్రమాదానికి కారణమైన లారీని పోలీసులు స్వాధీనం చేసుకున్నారు. రాష్గా డ్రైవ్ చేసిన ట్రక్ డ్రైవర్పై కేసు నమోదు చేసిన పోలీసులు తదుపరి దర్యాప్తును ప్రారంభించారు. అయితే 23 ఏళ్ల వయసులో అమన్ ప్రమాదవశాత్తూ మరణించడం బుల్లితెర ఇండస్ట్రీలో తీవ్ర విషాదాన్ని నింపుతోంది. అతడి అకాల మరణం అభిమానులను తీవ్ర దిగ్భ్రాంతికి గురి చేస్తోంది.
అమన్ టీవీ కెరీర్
ఉత్తరప్రదేశ్‌లోని బల్లియాకు చెందిన అమన్ జైస్వాల్ మోడలింగ్‌తో కెరీర్ ప్రారంభించాడు. ఆ తర్వాత టీవీ ఇండస్ట్రీలోకి అడుగుపెట్టాడు. అయితే కెరీర్ తొలినాళ్లలో సపోర్టివ్ రోల్స్ చేసిన అమన్, 2023లో 'ధర్తిపుత్ర నందిని' అనే టీవీ సీరియల్‌లో లీడ్ రోల్లో మెరిశాడు. 'పుణ్యశ్లోక్ అహల్యాబాయి' అనే సీరియల్లోనూ యశ్వంత్ రావ్ ఫాన్సే పాత్ర పోషించాడు. అలా తన నటనతో బుల్లితెర వీక్షకుల్లో మంచి ఫ్యాన్ ఫాలోయింగ్ పెంచుకున్నాడు.
వైరల్ అవుతున్నఅమన్ చివరి ఇన్స్టా పోస్ట్
ఇదిలా ఉండగా, అమన్ జైస్వాల్ ఇన్స్టాగ్రామ్లో పెట్టిన చివరి పోస్ట్ను అభిమానులు ట్రెండ్ చేస్తున్నారు. తమ ఫేవరెట్ స్టార్ను తలుచుకుని ఎమోషనల్ అవుతున్నారు. అందులో అతడు 'ధర్తిపుత్ర నందిని' సీరియల్ గురించి చెప్పాడు. ఆ సీరియల్తో తన అనుబంధాన్ని పంచుకున్నాడు. నటనను కొనసాగించాలనే తన నిర్ణయాన్ని తన కుటుంబం వ్యతిరేకించిందని అమన్ ఆ పోస్ట్లో రాసుకొచ్చాడు.
సీనియర్ నటుడు దిల్లీ గణేశ్‌ కన్నుమూత - షాక్లో కోలీవుడ్ ఇండస్ట్రీ!
నటుడు రాజేంద్రప్రసాద్‌ ఇంట తీవ్ర విషాదం - Actor Rajendra Prasad
