Missile attack Iraq American embassy: ఇరాక్ ఉత్తర ప్రాంత నగరం ఇర్బిల్లోని అమెరికా రాయబార కార్యాలయమే లక్ష్యంగా శనివారం అర్ధరాత్రి మిసైల్స్ దాడి జరిగింది. సుమారు 12 రాకెట్లు ప్రయోగించినట్లు సమాచారం. అందులో పలు క్షిపణులు దౌత్య కార్యాలయ భవనానికి తాకాయని, అయితే ఎలాంటి ఆస్తి, ప్రాణ నష్టం జరగలేదని ఇరాక్, అమెరికా భద్రతా అధికారులు తెలిపారు.
"ఇర్బిల్లోని సలాహ్ అల్ దిన్ ప్రాంతంలో ఉన్న అమెరికా కాన్సులేట్, కుర్దిస్థాన్ 24 టీవీ స్టేషన్కు సమీపంలో రాకెట్ల దాడి జరిగింది. పేలుడు దాటికి టీవీ ఛానల్, కాన్సులేట్ భవనం కిటికీలు, పలు సామగ్రి ధ్వంసమయ్యాయి. ఇర్బిల్ అంతర్జాతీయ విమానాశ్రయంపై ఎలాంటి ప్రభావం లేదు. ఏ ఒక్క విమానం రద్దు కాలేదు."
- ఇరాక్ భద్రతా అధికారులు.
ఈ క్షిపణులను పొరుగుదేశం ఇరాన్ నుంచి ప్రయోగించినట్లు తెలిపారు అమెరికా సీనియర్ భద్రతా అధికారి ఒకరు. అమెరికా జవాన్లలో ఎలాంటి ప్రాణ నష్టం జరగలేదన్నారు. అయితే, ఎన్ని మిసైల్స్ ప్రయోగించారు, అవి ఎక్కడ ఢీకొట్టాయనేది స్పష్టత లేదన్నారు. ఈ క్షిపణుల దాడుల్లో ఎవరైనా మరణించారా అనే విషయం కూడా ఇంకా తెలియదని చెప్పారు. ఇరాక్ అధికారులు సైతం.. ప్రాణ నష్టంపై ఎలాంటి సమాచారం లేదని తెలిపారు. అయితే, కాన్సులేట్ వద్ద పలు నిర్మాణాలు ధ్వంసమైనట్లు చెప్పారు. ఇరాన్ నుంచి బాలిస్టిక్ మిసైల్స్ను ప్రయోగించినట్లు తెలిపారు.
సిరియా, డమస్కస్లో దాడి చేసి.. ఇరాన్ రెవల్యూషనరీ గార్డ్కు చెందిన ఇద్దరు సభ్యులను ఇజ్రాయెల్ హతమార్చింది. డమస్కస్ దాడిని ఈనెల 9న ఖండించింది ఇరాన్ విదేశాంగ మంత్రిత్వ శాఖ. ప్రతీకారం తీర్చుకుంటామని తెలిపింది. ఈ దాడి జరిగిన కొన్ని రోజుల్లోనే మిసైల్స్ ప్రయోగం జరగటం ప్రాధాన్యం సంతరించుకుంది.
ఇదీ చూడండి: ఉక్రెయిన్ యుద్ధంలో రసాయన, జీవ 'ఆయుధ' రగడ
