కొత్తరకం కరోనా(స్ట్రెయిన్) కేసులతో అల్లాడుతున్న బ్రిటన్ కీలక నిర్ణయం తీసుకుంది. సెప్టెంబర్ నాటికి దేశంలోని వయోజనులందరికీ(18 ఏళ్లు నిండినవారు) కొవిడ్ వ్యాక్సిన్ మొదటి డోసు వేయాలని నిర్దేశించుకుంది. మరిన్ని టీకా కేంద్రాలను ఏర్పాటు చేసేందుకు తమ ప్రభుత్వం సిద్ధమవుతోందని బ్రిటన్ విదేశాంగ కార్యదర్శి డామ్నిక్ రొబాబ్ తెలిపారు. తద్వారా నిరంతర వ్యాక్సినేషన్ కార్యక్రమాన్ని నెలకొల్పుతామని చెప్పారు.
వారి తర్వాతే..
ఆరోగ్య సిబ్బంది, కరోనా యోధులతో పాటు 70 ఏళ్లు నిండిన ప్రతి ఒక్కరికి వ్యాక్సిన్ మొదటి డోసు వేసేందుకు బ్రిటన్ ప్రయత్నాలు చేస్తోంది. ఈ ప్రక్రియ పూర్తైన తర్వాత 18 ఏళ్లు నిండిన ప్రతి ఒక్కరికి వ్యాక్సిన్ వేయనుంది. అయితే.. బ్రిటన్ జనాభాలో దాదాపు 60 శాతం మందికి పైగా వయోజనులే ఉండటం గమనార్హం. వైరస్ వ్యాప్తి పెరుగుదలపై ఆ దేశ జాతీయ ఆరోగ్య సేవల(ఎన్హెచ్ఎస్) సంస్థ ఆందోళన వ్యక్తం చేసిన నేపథ్యంలో ఈ విస్తృత స్థాయి వ్యాక్సినేషన్ కార్యక్రమానికి బ్రిటన్ ప్రభుత్వం సిద్ధమవుతోంది. ఆ దేశంలో ప్రతి 30 సెకన్లకు ఓ కరోనా కేసు నమోదవుతోందని ఎన్హెచ్ఎస్ పేర్కొంది.
కొనసాగుతున్న లాక్డౌన్..
వైరస్ను కట్టడి చేసేందుకు మూడో దశ లాక్ డౌన్ను బ్రిటన్ ప్రధాని బోరిస్ జాన్సన్.. జనవరి 2న విధించారు. ఫిబ్రవరి మధ్య వరకు ఈ లాక్డౌన్ ఆంక్షలను సడలించేది లేదని స్పష్టం చేశారు. మిగతా దేశాల్లా కాకుండా టీకా డోసుల మధ్య వ్యవధిని 21 రోజల నుంచి 12 వారాలకు పెంచుతూ బ్రిటన్ ప్రభుత్వ నిర్ణయం తీసుకుంది. అందరికీ కరోనా నుంచి రక్షణ కల్పించేందుకు ఈ విధానాన్ని పాటిస్తోంది. బ్రిటన్లో ఫైజర్, కొవిషీల్డ్, మోడెర్నా టీకాలు అనుమతి పొందాయి. మోడెర్నా టీకాను వసంతకాలం నుంచి వినియోగించనున్నారు.
బ్రిటన్లో కరోనా బారిన పడి తాాజాగా 37,475 మంది ఆసుపత్రుల్లో చికిత్స పొందుతున్నారు. ఇప్పటివరకు 88,747 మంది వైరస్ బారిన పడి ప్రాణాలు కోల్పోయారు. ప్రపంచంలో అత్యధిక కరోనా మరణాలు సంభవించిన 5వ దేశంగా బ్రిటన్ నిలిచింది.
ఇదీ చూడండి:'ప్రపంచానికి ఔషధ నిలయంగా భారత్'
