చైనా బిల్లుతో హాంకాంగ్​ చట్టసభలో నిరసనల హోరు

ప్రజాస్వామ్య అనుకూల చట్టసభ్యుల నిరసనలతో హాంకాంగ్​ శాసనమండలిలో శుక్రవారం గందరగోళం నెలకొంది. దేశంలో జాతీయ భద్రతా చట్టాన్ని తీసుకొచ్చేందుకు చైనా ప్రవేశపెట్టిన బిల్లును వ్యతిరేకిస్తూ కొందమంది సభ్యులు ఆందోళనలకు దిగారు. ఈ నేపథ్యంలో నిరసనలు చేపట్టిన వారిని సభ​ నుంచి బయటకు లాక్కెళ్లారు అక్కడి సిబ్బంది.

హాంకాంగ్​ చట్టసభ శుక్రవారం నిరసనలతో హోరెత్తింది. దేశంలో జాతీయ భద్రతా చట్టాన్ని అమలు చేసేందుకు చైనా ప్రతిపాదించిన బిల్లుకు వ్యతిరేకంగా..​ ప్రజాస్వామ్య అనుకూల చట్టసభ్యులు ఆందోళనకు దిగారు. దేశంపై చైనా నియంతృత్వ చర్యలకు ఇది నిదర్శనమని ఆవేదన వ్యక్తం చేశారు. ఈ క్రమంలోనే శాసనసభలో గందరగోళం సృష్టిస్తూ.. నిరసనలకు దిగిన ఇద్దరు చట్టసభ్యులను బలవంతంగా సభ నుంచి బయటకు లాక్కెళ్లారు భద్రతా సిబ్బంది.

బిల్లులో ఏముంది?

శుక్రవారం ప్రారంభమైన చైనా జాతీయ అసెంబ్లీ సమావేశంలో.. ఈ బిల్లును ప్రతిపాదించింది అక్కడి ప్రభుత్వం. ఈ తీర్మానాన్ని హాంకాంగ్​ చట్టసభ ముందుకూ తీసుకొచ్చారు. గతేడాది నేరస్థుల అప్పగింత బిల్లును వ్యతిరేకిస్తూ హాంకాంగ్​లో నిరసనలు వెల్లువెత్తినా.. మళ్లీ బీజింగ్​ సంచలన నిర్ణయం తీసుకుంది.

బీజింగ్​ సహనం కోల్పోయిందా?

గడిచిన కొన్ని సంవత్సరాల్లో నేషనల్​ పీపుల్స్ కాంగ్రెస్(ఎన్​సీపీ) అజెండాలోని అత్యంత వివాదాస్పదమైన అంశాల్లో ఇదీ ఒకటి. ఈ ప్రతిపాదనను అమెరికా ప్రభుత్వం, హక్కుల సంఘాలు తీవ్రంగా​ ​వ్యతిరేకించాయి. అయితే, హాంకాంగ్​లో జరిగిన ఆందోళనలతో బీజింగ్​ సహనాన్ని కోల్పోయినట్లు కనిపిస్తోంది. ఈ క్రమంలోనే ప్రతిపక్షాల కార్యకలాపాలను పరిమితం చేయాలని నిశ్చయించుకుంది. 2003లో ఈ చట్టాన్ని ఆమోదింపజేసేందుకు ప్రయత్నాలు జరిగాయి. కానీ, అప్పట్లో జరిగిన భారీ నిరసనల కారణంగా బిల్లు అలాగే నిలిచిపోయింది. ఈసారి ఎలాగైనా తీర్మానాన్ని ఆమోదింపజేయాలని కృతనిశ్చయంతో ఉంది చైనా.

ఇదీ చూడండి:కరోనా వేళ.. చట్టసభలో కొట్టుకున్న ఎంపీలు!