మయన్మార్ కీలక నేత ఆంగ్ సాన్ సూకీ నిర్బంధాన్ని పొడిగిస్తూ ఆ దేశ సైనిక ప్రభుత్వం తీసుకున్న నిర్ణయాన్ని అమెరికా ఖండించింది. ఈ వార్త ఎంతో బాధాకరమని వ్యాఖ్యానించింది.
"మయన్మార్లో సైనిక తిరుగుబాటు ప్రజాస్వామ్యానికి వ్యతిరేకమని అధ్యక్షుడు జో బైడెన్ ఇప్పటికే స్పష్టం చేశారు. ఇప్పటికైనా.. ఆ దేశంలో ప్రజాస్వామ్యాన్ని నెలకొల్పేందుకు కృషి చేయాలి. నిర్బంధించిన పౌరులు, రాజకీయ నాయకులను విడుదల చేయాలి."
--- నెడ్ ప్రైజ్, అమెరికా విదేశాంగ శాఖ ప్రతినిధి.
మయన్మార్ వ్యవహారాల్లో చైనా నిర్మాణాత్మక పాత్ర పోషించాలని అమెరికా భావిస్తున్నట్టు నెడ్ స్పష్టం చేశారు. సైనిక తిరుగుబాటును వ్యతిరేకించే వరకు చైనాపై ఒత్తిడి తెచ్చేందుకు ప్రయత్నిస్తామన్నారు.
మయన్మార్లో.. ఆంగ్ సాంగ్ సూకీ ప్రభుత్వాన్ని ఏర్పాటు చేసే కొద్ది రోజుల ముందు అక్కడి సైన్యం తిరుగుబాటు చేసింది. అధికారాన్ని తమ ఆధీనంలోకి తీసుకుంది. ఎన్నికల్లో అవకతవకలు జరిగాయని ఆరోపించింది. సూకీని నిర్బంధించింది. సోమవారంతో నిర్బంధ గడువు ముగియగా.. దానిని పొగిడిస్తూ నిర్ణయం తీసుకుంది. ఈ పరిణామాలకు నిరసనగా దేశవ్యాప్తంగా భారీ స్థాయిలో ఆందోళనలు కొనసాగుతున్నాయి.
ఐరాస ఆందోళన..
మయన్మార్లో తాజా పరిస్థితులపై ఐక్యరాజ్యసమితి మానవహక్కుల నిపుణుడు టామ్ ఆండ్రూస్ ఆందోళన వ్యక్తం చేశారు. సైనికులు, నిరసనకారుల మధ్య పెద్ద ఎత్తున హింస చెలరేగే అవకాశముందన్నారు. ఫలితంగా హత్య, నిర్బంధం భారీస్థాయిలో పెరిగిపోతాయని పేర్కొన్నారు.
ఇదీ చూడండి:- నగరంలోకి సైన్యం- పౌరుల హక్కులకు తూట్లు!
