మనుషులపై కరోనా వ్యాక్సిన్ ట్రయల్స్ ప్రారంభించినట్లు తెలిపింది అమెరికాకు చెందిన నోవావాక్స్ అనే సంస్థ. ఆస్ట్రేలియాలో ఈ పరీక్షలు నిర్వహిస్తామని స్పష్టం చేసింది. అలాగే ప్రాణాంతక కొవిడ్-19కు ఈ ఏడాదిలోనే టీకా తయారు చేస్తామని ఆశాభావం వ్యక్తం చేశారు నోవావాక్స్ రీసెర్చ్ చీఫ్ డాక్టర్ గ్రెగొరీ గ్లెన్. మెల్బోర్న్, బ్రిస్బేన్లో వ్యాక్సిన్ తొలిదశ ట్రయల్స్లో భాగంగా 131 మందిపై ప్రయోగిస్తామని వెల్లడించారు. నానో పార్టికల్ ఫ్లూ వ్యాక్సిన్ను అభివృద్ధి చేసిన తరహాలోనే కరోనా టీకానూ తయారు చేస్తున్నామన్నారు గ్రెగొరీ.
"చైనా, అమెరికా, ఐరోపాలో దాదాపు డజనుకు పైగా కరోనా వ్యాక్సిన్ ట్రయల్స్ ప్రారంభ దశలో ఉన్నాయి. అయితే వీటిలో కొవిడ్-19ను సమర్థంగా ఎదుర్కొనే వ్యాక్సిన్ ఉంటుందని కచ్చితంగా చెప్పలేం. అయితే వ్యాక్సిన్ తయారీకి పలు రకాల పద్ధతులు, సాంకేతికతను వినియోగించడం వల్ల ఏదో ఒకటి విజయవంతమయ్యే అవకాశం ఉంటుంది.
ఈ పరీక్షలన్నింటి ధ్యేయం ఒక్కటే.. శరీరంలో కరోనా వైరస్ వ్యాప్తిని అరికట్టే స్పైక్ ప్రొటీన్ను గుర్తించేలా రోగనిరోధక వ్యవస్థకు శిక్షణ ఇవ్వడం. ఇందుకోసం కొంత మంది వైద్య శాస్త్రవేత్తలు స్పైక్ ప్రొటీన్ జెనెటిక్ కోడ్ ఆధారంగా పరీక్షలు చేస్తున్నారు. మరికొందరు శరీరంలో ఈ ప్రొటీన్ ఎలా ఉద్భవిస్తుంది అన్న సమాచారాన్ని తెలుసుకునేందుకు హానికరం కాని ఒక వైరస్ను వినియోగిస్తున్నారు. ఇంకొందరు ప్రాచీన పద్ధతులను అనుసరిస్తున్నారు.
అయితే జెనెటిక్ ఇంజినీరింగ్ సాయంతో నోవావాక్స్.. స్పైక్ ప్రొటీన్ను ఉత్పత్తి చేసింది. ల్యాబ్లో పెద్ద మొత్తం అభివృద్ధి చేసి.. వైరస్ సైజులోనే ఉన్న నానోపార్టికల్స్లో ఈ ప్రొటీన్లను ప్యాకేజ్ చేసి మనుషులపై ప్రయోగిస్తున్నాం."
- డాక్టర్ గ్రెగొరీ గ్లెన్, నోవావాక్స్ రీసెర్చ్ చీఫ్
ఇదీ చదవండి : రష్యాను వణికించిన భీకర తుపాను
