ఈ ఆర్థిక సంవత్సరం రెండో త్రైమాసికం(జులై-సెప్టెంబరు)లో దేశ స్థూల జాతీయోత్పత్తి(జీడీపీ) 7.5 శాతం క్షీణించింది. ఈ మేరకు జాతీయ గణాంకాల కార్యాలయం(ఎన్ఎస్ఓ) ప్రకటించింది. క్రమంగా ఆర్థిక కార్యకలాపాలు తిరిగి ప్రారంభమవుతోన్న నేపథ్యంలో.. దేశ ఆర్థిక వ్యవస్థ పుంజుకుంటోందని తెలిపింది.
2019-20 ఇదే త్రైమాసికంలో జీడీపీ వృద్ధి రేటు 4.4 శాతం ఉందని గుర్తుచేసింది ఎన్ఎస్ఓ.
జూన్ నుంచే భారత ఆర్థిక వ్యవస్థ పూర్వవైభవం దిశగా పయనించిందని ప్రభుత్వ గణాంకాలు చెబుతున్నాయి. లాక్డౌన్ అనంతరం పరిస్థితులతో.. నాలుగో త్రైమాసికంలో వృద్ధి రేటు గణనీయంగా పెరిగే అవకాశాలున్నట్లు ఎన్ఎస్ఓ అంచనా వేసింది. ముఖ్యంగా వ్యవసాయ రంగంలో సానుకూల సంకేతాలు కనిపిస్తున్నట్లు తెలిపింది. క్యూ2లో ఈ రంగంలో 3.4 శాతం వృద్ధి నమోదైందని స్పష్టం చేసింది. వాణిజ్య, సేవల రంగంలోనూ ఊహించిన 15.6 శాతం క్షీణత కంటే తక్కువే క్షీణించిందని వెల్లడించింది.
ఆర్బీఐ గవర్నర్ శక్తికాంత దాస్ కూడా.. భారత ఆర్థిక వ్యవస్థ ఊహించినదాని కంటే వేగంగా పరుగులు పెడుతోందని గురువారం మీడియా సమావేశంలో వెల్లడించారు. లాక్డౌన్ తర్వాత ఆర్థిక రంగం కోలుకుంటోందని స్పష్టం చేశారు.
అంచనాలను మించి..
ఆర్థిక వ్యవస్థ అంచనాలను మించి ఫలితాలు రావడం సానుకూల పరిణామమని అన్నారు ముఖ్య ఆర్థిక సలహాదారు కేవీ సుబ్రమణియన్. 'కరోనా మహమ్మారి ఆర్థిక రంగంపై తీవ్ర ప్రభావం చూపుతుంది కనుక.. ఇంకా జాగ్రత్తగా ఉండాలి' అని అన్నారు.
క్యూ1లో 23.9 శాతం క్షీణత..
కొవిడ్ సంక్షోభం, లాక్డౌన్లతో 2020-21 తొలి త్రైమాసికం(ఏప్రిల్-జూన్)లో జీడీపీ 23.9 శాతం క్షీణించింది.
కరోనాను కట్టడి చేసేందుకు మార్చి 25న కఠినమైన లాక్డౌన్ను విధించింది భారత ప్రభుత్వం. అనంతరం.. సడలింపులు ఇస్తూ వచ్చింది. ఇటీవల కరోనా కేసులు పెరుగుతున్న నేపథ్యంలో.. మరోసారి పలు రాష్ట్రాలు కఠిన నిబంధనలు అమలుచేస్తున్నాయి.
చైనాలో ఘనం..
భారత్తో పోలిస్తే చైనా ఆర్థికవ్యవస్థ మాత్రం కొంతకాలంగా పుంజుకుంటోంది. క్యూ2లో ఆ దేశ వృద్ధిరేటు 4.9 శాతంగా నమోదైంది. తొలి త్రైమాసికం కంటే ఇది 3.2 శాతం అధికం.
