'బ్యాంకులు అమలు చేస్తేనే మోదీ 'ప్యాకేజీ' సక్సెస్'

కరోనా సంక్షోభంతో చిన్న, మధ్య తరహా పరిశ్రమలు అతలాకుతలమయ్యాయి. వాటిని ఆదకునేందుకు కేంద్రం ప్యాకేజీ ప్రకటించింది. అయితే ప్యాకేజీ విజయవంతం కావాలంటే బ్యాంకులు, ప్రభుత్వ శాఖల పాత్ర కీలకమని విశ్లేషించింది ఎస్​ఎంబీ ఛాంబర్స్​ ఇండియా.

కరోనా కారణంగా అతలాకుతలమైన ఆర్థిక వ్యవస్థను ప్రగతి రథంలో నడిపేందుకు కేంద్రం రూ.20 లక్షల కోట్ల రూపాయల భారీ ప్యాకేజీని ప్రకటించింది. ఇందులో భాగంగా చిన్న, మధ్య తరహా పరిశ్రమలను(ఎస్​ఎంఈ) ఆదుకునేందుకు 6 ప్రత్యేక పథకాలను తీసుకొచ్చారు కేంద్ర విత్తమంత్రి నిర్మలా సీతారామన్​. రూ.3లక్షల కోట్ల వడ్డీలేని రుణాలను ఇవ్వనున్నట్లు చెప్పారు. అయితే వీటిని సకాలంలో సక్రమంగా అమలు చేయాలంటే బ్యాంకులు, ప్రభుత్వశాఖల పాత్ర కీలకమని అభిప్రాయపడున్నారు ఎస్​ఎంఈ ఛాంబర్స్​ ఆఫ్ ఇండియా అధ్యక్షులు చంద్రకాంత్​ సాలుంఖే.

"ప్రభుత్వం ప్రకటించిన ప్యాకేజీ బాగుంది. అయితే ఇది ఏ మేరకు విజయవంతమవుతుందనే విషయం బ్యాంకులు, ప్రభుత్వశాఖలపైనే ఆధారపడి ఉంది."

-ఎస్​ఎంఈ ఛాంబర్స్​ ఆఫ్ ఇండియా అధ్యక్షులు చంద్రకాంత్​ సాలుంఖే.

ఉద్దీపన చర్యల్లో భాగంగా ఎంఎస్​ఎంఈల నిర్వచనంలో మార్పులు చేయనున్నట్లు ప్రకటించారు నిర్మల. పరిశ్రమల పెట్టుబడి పరిమితిని పెంచారు. ఇది వరకు 25 లక్షల పెట్టుబడి పెట్టే తయారీ రంగ పరిశ్రమను ఎంఎస్​ఎంఈగా పరిగణించగా.. ఈ పరిమితిని కోటికి పెంచారు. రూ. కోటి, రూ.50కోట్లు, రూ.100కోట్ల టర్నోవర్ ఉన్న పరిశ్రమలను సూక్ష, చిన్న, మధ్యతరహా పరిశ్రమలుగా గుర్తించనున్నట్లు చెప్పారు. ఎంఎస్​ఈల డిమాండ్​లను మాత్రం నెరవేర్చలేకపోయారు.

రూ. 5కోట్లు, రూ.75కోట్లు, రూ.250 కోట్ల టర్నోవర్ ఉన్న పరిశ్రమలను సూక్ష్మ, చిన్న, మధ్యతరహాగా గుర్తించాలని తాము సూచించినట్లు సాలుంఖే తెలిపారు. ఈ విషయంపై కొంత నిరాశ చెందినట్లు పేర్కొన్నారు. ప్రపంచ దేశాలతో పోటీపడాలంటే ఎస్​ఎంఈ నిర్వచణం కూడా ప్రపంచ ప్రమాణాలకు అనుగుణంగా ఉండాలని అభిప్రాయం వ్యక్తం చేశారు.

ఎస్‌ఎంఈల చెడు రుణాలు, ఎన్‌పీఏలకు సంబంధించి అనేక పత్రాలు అవసరం లేకుండా స్వయంచాలకంగా పునర్నిర్మించాలని బ్యాంకులను కేంద్రం కోరాలని అన్నారు సాలుంఖే. రుణాలు కట్టలేని పరిస్థితిలో ఉన్న ఎంఎస్​ఎం​ఈ రంగ పరిశ్రమలను బ్యాంకులు విల్​ఫుల్ డీఫాల్టర్లుగా పరిగణిస్తున్నాయని, అది వాస్తవం కాదని చెప్పారు.

జీఎస్టీ రేట్లు తగ్గించాలి...

నిర్మల ప్రకటించిన ఉద్దీపన చర్యలను స్వాగతించారు ఆటోమొబైల్​ కాంపోనెంట్ మ్యానుఫ్యాక్చరర్స్ అసోసియేషన్​(ఏసీఎంఏ) డైరెక్టర్ జనరల్​ విన్నీ మెహ్తా. అయితే జీఎస్టీ రేట్లను తగ్గించాలని కోరారు. కరోనా సంక్షోభానికి ముందే ఏసీఎం డిమాండ్​ తగ్గినట్లు గుర్తు చేశారు.

57 బిలియన్​ డాలర్ల ఆటోకాంపోనెంట్​ రంగంలో 60శాతం పరిశ్రమలు 18శాతం జీఎస్టీ చెల్లిస్తుండగా, మిగతా 40శాతం.. 28శాతం జీఎస్టీ శ్లాబులో ఉన్నట్లు తెలిపారు విన్నీ మెహ్తా. ఆటో, నాన్​ ఆటో కాంపోనెంట్​ పరిశ్రమలు 18శాతం జీఎస్టీకి మించకుండా కేంద్రం చర్యలు చేపట్టాలని డిమాండ్​ చేస్తున్నారు.

-రచయిత: క్రిష్ణనాద్​ త్రిపాఠి.