కరోనా విజృంభిస్తున్న వేళ అవసరమైన దేశాలకు టీకాలను పంపిణీ చేయాలని వాణిజ్య శాఖ మంత్రి పీయూష్ గోయల్ ప్రపంచ దేశాలను కోరారు. వరల్డ్ ఎకనామిక్ ఫోరం గ్లోబల్‌ ట్రేడ్‌ అవుట్‌లుక్‌ సెషన్లో మాట్లాడిన ఆయన ఈ వ్యాఖ్యలు చేశారు. త్వరలోనే భారత్.. కరోనాను జయిస్తుందని ఆశాభావం వ్యక్తం చేశారు. ప్రపంచ దేశాలు కొవిడ్ పోరాటంలో భారతదేశానికి తమ సంఘీభావం తెలపాలని ఆయన కోరారు.
భారత్.. ప్రపంచాన్ని వసుధైక కుటుంబంగా భావించి ఇతర దేశాలకు 67 మిలియన్ కొవిడ్ వ్యాక్సిన్ డోసులు అందించిందని ఈ సందర్భంగా మంత్రి గుర్తుచేశారు. అలాగే ప్రపంచ దేశాలు కూడా కొవిడ్‌పై పోరుకు వ్యాక్సిన్ల విషయంలో ఉదారత చూపాలని పేర్కొన్నారు. ప్రపంచ మేథో సంపత్తి హక్కులను భారత్ గౌరవిస్తుందని, ఇకముందూ కొనసాగిస్తుందని చెప్పారు.
త్వరగా నిర్ణయం తీసుకోవాలి
కరోనా సంక్షోభాన్ని ఎదుర్కోవడానికి మేథో సంపత్తి హక్కుల రద్దు ప్రతిపాదనతో పాటు సాంకేతిక పరిజ్ఞానం బదిలీ, వ్యాక్సిన్ తయారీకి అవసరమైన ముడి చమురు లభ్యతపై ప్రపంచ వాణిజ్య సంస్థ(డబ్ల్యూటీఓ) త్వరగా నిర్ణయం తీసుకోవాలని గోయల్ విజ్ఞప్తి చేశారు. 2020 అక్టోబర్లో కరోనా నియంత్రణకు సంబంధించిన ట్రిప్స్ ఒప్పందంలోని కొన్ని నిబంధనలను అమలు చేయడంపై డబ్ల్యూటీఓ సభ్యదేశాలకు సూచించే ప్రతిపాదనను ముందుంచాయి భారత్, దక్షిణాఫ్రికా దేశాలు.
ఇదీ చూడండి: జడ్జికి కొవిడ్.. కరోనాపై సుమోటో విచారణ వాయిదా
