దొంగలించిన క్రెడిట్, డెబిట్ కార్డుల వివరాలతో రూ.2 కోట్ల విలువైన ఆన్లైన్ కొనుగోళ్లు చేశారనే ఆరోపణలపై ముగ్గురిని అరెస్టు చేశారు గుజరాత్ పోలీసులు. డార్క్వెబ్ ద్వారా అమెరికా, కెనడా పౌరుల డేటాను వారు సేకరించారని శనివారం తెలిపారు.
నిందితులను హర్ష్వర్ధన్ పర్మార్, కల్పేశ్ సింఘా, మోహిత్ లల్వానీగా పోలీసులు గుర్తించారు. వారు దొంగలించిన డేటాతో బంగారు నాణేలు, ఫోన్లు, ఎలక్ట్రానిక్ వస్తువులను తొలుత కొని, అనంతరం ఆన్లైన్లో వాటిని విక్రయించినట్లు పోలీసులు వెల్లడించారు.
"దొంగలించిన డేటాతో పర్మార్ రూ.70 లక్షలు, సింఘా రూ.70లక్షలు, లల్వానీ రూ.60 లక్షల విలువైన కొనుగోళ్లు చేశారు. బాధితుల ఐడీ, పాస్వర్డ్లను డార్క్వెబ్ ద్వారా పాకిస్థాన్కు చెందిన జియా ముస్తఫా, సద్దాం హెచ్వీ నుంచి టెలీగ్రామ్ మెసెంజర్ సహకారంతో పర్మార్ సేకరించాడు. బదలుగా వారికి బిట్కాయిన్లలో చెల్లించాడు. వాటిని మిగితా నిందితులతో పంచుకున్నాడు. ఆన్లైన్ కొనుగోళ్ల కోసం ఇతర రాష్ట్రాల్లో అసంపూర్ణ వ్యక్తిగత వివరాలతో సిమ్కార్డులు తీసుకున్నారు."
-క్రైం బ్రాంచ్ అధికారి
నిందితులపై ఐపీసీ సహా పలు ఐటీ చట్టాల నిబంధనల మేరకు కేసు నమోదు చేశారు పోలీసులు.
ఇదీ చూడండి: రియల్ ఎస్టేట్ కంపెనీలో మోసం.. రూ.56కోట్లు అటాచ్
