అసలైన "కొబ్బరి చట్నీ" చేసే పద్ధతి ఇదీ - వేళ్లు నాకేస్తారంతే!

- రొటీన్ పచ్చడిని మించిన టేస్ట్ - అన్ని టిఫెన్స్​లోకి అద్భుతమైన కాంబినేషన్!

Kobbari Pachadi Recipe in Telugu : ఎక్కువ మంది మార్నింగ్ బ్రేక్​ఫాస్ట్ రెసిపీలలోకి పల్లీ చట్నీతో పాటు కొబ్బరి చట్నీని ప్రిపేర్ చేసుకుంటుంటారు. కానీ, టేస్ట్​లో ఏదో మిస్​ అయిందని, సరిగా కుదరలేదని ఫీల్ అవుతుంటారు చాలా మంది. అలాంటి వారు ఈ పద్ధతిలో ఒకసారి "కొబ్బరి పచ్చడి" చేసి చూడండి. పర్ఫెక్ట్​గా కుదరడమే కాకుండా జబర్దస్తీ టేస్ట్​తో అదుర్స్ అనిపిస్తోంది. ఎంతలా అంటే టిఫెన్​లో తినకుండా కేవలం పచ్చడినే నాకేస్తారు! అన్ని టిఫెన్స్​లోకి ఈ చట్నీ అద్భుతంగా ఉంటుంది. మరి, ఈ సింపుల్ అండ్ టేస్టీ పచ్చడి తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.

కావాల్సిన పదార్థాలు :

• పచ్చి కొబ్బరి ముక్కలు - 1 చిన్న కప్పు
• పచ్చిమిర్చి - 6
• ఎండుమిర్చి - 2
• నూనె - 1 టేబుల్​స్పూన్
• ఉల్లిపాయ - 1(చిన్న సైజ్​ది)
• పుట్నాల పప్పు - 2 టేబుల్​స్పూన్లు
• జీడిపప్పు పలుకులు - 10
• ఉప్పు - రుచికి సరిపడా
• చింతపండు - కొద్దిగా

తాలింపు కోసం :

• నూనె - 1 టేబుల్​స్పూన్
• పోపు దినుసులు - 1 టేబుల్​స్పూన్
• ఎండుమిర్చి - 2
• వెల్లుల్లి రెబ్బలు - 3
• కరివేపాకు - కొద్దిగా
• ఇంగువ - చిటికెడు

తయారీ విధానం :

• ఇందుకోసం ముందుగా పచ్చికొబ్బరిని ఒక చిన్న కప్పు పరిమాణంలో చిన్న చిన్న ముక్కలుగా కట్ చేసుకొని పక్కనుంచాలి.
• ఇప్పుడు స్టౌపై పాన్ పెట్టుకొని ఆయిల్ వేసుకోవాలి. నూనె వేడయ్యాక పచ్చిమిర్చిని ముక్కలుగా తుంపి వేసుకోవాలి. అలాగే ఎండుమిర్చిని వేసి లో-ఫ్లేమ్ మీద దోరగా వేయించుకోవాలి.
• అవి వేగాక సన్నని ఉల్లిపాయ తరుగు వేసి ఆనియన్స్ లైట్ గోల్డెన్ బ్రౌన్ కలర్​లోకి వచ్చే వరకు వేపుకోవాలి.
• ఆ విధంగా వేయించుకున్నాక పుట్నాల పప్పు యాడ్ చేసుకొని కలిపి 30 సెకన్ల పాటు వేయించుకొని స్టౌ ఆఫ్ చేసుకోవాలి.
• ఇప్పుడు మిక్సీ జార్ తీసుకొని అందులో వేయించి చల్లార్చుకున్న పుట్నాల పప్పు మిశ్రమం, చిన్నగా కట్ చేసుకున్న పచ్చి కొబ్బరి ముక్కలు, జీడిపప్పు, ఉప్పు, చింతపండు వేసుకొని మొదటగా కచ్చాపచ్చాగా గ్రైండ్ చేసుకోవాలి.
• ఆ తర్వాత అందులో తగినన్ని వాటర్ యాడ్ చేసుకొని మెత్తని పేస్ట్​లాగా మిక్సీ పట్టుకోవాలి. ఆపై దాన్ని ఒక గిన్నెలోకి తీసుకొని పక్కన పెట్టుకోవాలి.
• ఇప్పుడు తాలింపు కోసం స్టౌపై పచ్చిమిర్చి వేయించుకున్న పాన్ పెట్టుకొని ఆయిల్ వేసుకోవాలి. నూనె వేడెక్కాక పోపు దినుసులు వేసి లైట్​గా వేగనివ్వాలి. ఆపై అందులో ఎండుమిర్చి తుంపలు, కచ్చాపచ్చాగా దంచుకున్న వెల్లుల్లి రెబ్బలు, కరివేపాకు, ఇంగువ వేసి వేయించుకోవాలి.
• తాలింపు చక్కగా వేగాక స్టౌ ఆఫ్ చేసుకొని ముందుగా ప్రిపేర్ చేసుకున్న పచ్చడిలో పోపుని వేసి మొత్తం కలిసేలా ఒకసారి బాగా మిక్స్ చేసుకొని సర్వ్ చేసుకుంటే చాలు. అంతే, ఎంతో టేస్టీగా ఉండే "కొబ్బరి చట్నీ" రెడీ!