Niti aayog health index 2021: ఆరోగ్య విభాగం పనితీరులో కేరళ వరుసగా నాలుగోసారి అగ్రస్థానంలో నిలిచింది. 2019-20 ఏడాదికిగాను నీతి ఆయోగ్ విడుదల చేసిన నాలుగో ఆరోగ్య సూచీలో పెద్ద రాష్ట్రాల జాబితాలో కేరళ మొదటి స్థానంలో నిలిచింది. కేంద్ర ఆరోగ్య, కుటుంబ సంక్షేమ శాఖ భాగస్వామ్యంతో, ప్రపంచ బ్యాంకు సాంకేతిక సాయంతో వివిధ అంశాలను పరిగణనలోకి తీసుకుని ఈ నివేదికను రూపొందించింది నీతి ఆయోగ్.
తెలంగాణ మూడు, ఏపీ నాలుగో ర్యాంక్
ఈ జాబితాలో తమిళనాడు రెండోస్థానంలో నిలవగా.. తెలంగాణ మూడు, ఆంధ్రప్రదేశ్ నాలుగో ర్యాంకు దక్కించుకున్నాయి. అయితే, ఈ జాబితాలో చివరి స్థానంలో నిలిచిన ఉత్తర్ప్రదేశ్ మరో విషయంలో మాత్రం అగ్రస్థానాన్ని ఆక్రమించుకోవటం విశేషం. 2018-19తో పోలిస్తే 2019-20 ఏడాదిలో ఉత్తర్ప్రదేశ్ ఆరోగ్య ప్రమాణాల్లో గణనీయమైన మార్పు చోటు చేసుకున్నట్లు నివేదిక పేర్కొంది.
మరోవైపు.. తొలి రెండు స్థానాలను ఆక్రమించిన కేరళ, తమిళనాడు.. ఇంక్రిమెంటల్ మార్పు విషయంలో వరుసగా 12, 8వ ర్యాంకులకు పరిమితమయ్యాయి. ఓవరాల్ పనితీరు, ఇంక్రిమెంటల్ మార్పులో రెండింటిలోనూ తెలంగాణ మూడో ర్యాంకును సాధించింది. రెండు విభాగాల పరంగా చూస్తే రాజస్థాన్ వెనకబడిపోయింది.
చిన్న రాష్ట్రాల్లో..
చిన్న రాష్ట్రాల్లో మిజోరాం మంచి పనితీరుతో తొలిస్థానంలో నిలిచింది. త్రిపుర రెండో స్థానంలో, సిక్కిం మూడో స్థానంలో ఉన్నాయి. కేంద్ర పాలిత ప్రాంతాల్లో దాద్రానగర్ హవేలీ, దీవ్-దమణ్ అగ్రస్థానంలో ఉండగా.. దిల్లీ ఐదు, జమ్ముకశ్మీర్ ఆరో స్థానంలో నిలిచాయి. అయితే.. ఈ రెండు ప్రాంతాలు ఇంక్రిమెంటల్ మార్పులో అగ్రస్థానాన్ని సాధించటం గమనార్హం.
ఇదీ చూడండి: 15-18 ఏళ్ల వారికి టీకా- జనవరి 1 నుంచి రిజిస్ట్రేషన్
