ఎన్నికల్లో గెలవడానికి ఓటుకు నోట్లు ఇచ్చే రాజకీయ పార్టీలపై విరుచుకుపడ్డారు మక్కల్ నీది మయ్యం పార్టీ అధినేత కమల్ హాసన్. హామీలు నిజాయితీగా ఉండాలన్నారు. కనీస అవసరాలు తీర్చుకోలేని వ్యక్తులకు రూ.5 వేలు చేతిలో పెడితే తీసుకుంటున్నారని.. ఆ ధోరణి మారాల్సిన అవసరముందని అభిప్రాయపడ్డారు. తమిళనాడులో అవినీతిని నిర్మూలించాల్సిన సమయం వచ్చిందన్న కమల్.. అది ఒక్కరి వల్ల సాధ్యం కాదని, అందుకు ప్రజల సాయం కావాలని మధురై ప్రచార సభలో అన్నారు.
"తగిన ప్రణాళికలు లేకుండా ఏ రంగంలోకీ అడుగుపెట్టను. ప్రభుత్వమే ప్రజల కనీస అవసరాలు తీర్చేలా అన్ని ఏర్పాట్లు చేయాలి. ప్రజలు రాజకీయలను తమ చేతుల్లోకి తీసుకోవాలి" అని కమల్ పేర్కొన్నారు.
మద్యం గురించి మాట్లాడిన కమల్.. 'ఐఎస్ఎస్ అధికారుల మద్యం తయారు చేసి విక్రయించడం చూస్తున్నాం. మేం అధికారంలోకి వస్తే మద్యం అమ్మకాలను ప్రైవేటు వ్యక్తులకు అప్పగిస్తాం. దానికి బదులు ఉచితంగా తాగునీటి సరఫరా చేస్తాం' అని ప్రజలకు హామీ ఇచ్చారు.
ఇదీ చూడండి: ఈ నెల 13 నుంచి కమల్ ఎన్నికల ప్రచారం
