భూలోక స్వర్గాన్ని తలపించే అద్దాల మేడ

అద్దాల మేడ అనగానే అందమైన అనుభూతినిచ్చే ఓ చక్కని ప్రదేశంగా నిలుస్తుంది. అందులోనే ఓ సుందరమైన తోట ఉంటే ఇక దాని ప్రత్యేకతే వేరు. ఇలాంటి సౌకర్యాలతోనే విశేషంగా ఆకట్టుకుంటోంది కర్ణాటకలో ఇటీవల నిర్మించిన ఓ గ్లాస్​ హౌస్​. అందులో అడుగు పెట్టగానే స్వర్గలోకాన్ని తలపిస్తోందంటూ కితాబిస్తున్నారు సందర్శకులు. మరి ఇంతటి రమణీయమైన ఆ గ్లాస్​ హౌస్​ ప్రత్యేకతలేంటో చూసేయండి..

కర్ణాటకలోని ప్రసిద్ధ పర్యటక ప్రదేశం హంపి. దీని తరువాత అంతటి ఖ్యాతిని సొంతం చేసుకునే దిశగా.. పర్యటకులను విశేషంగా ఆకట్టుకుంటోంది ఓ గ్లాస్​ హౌస్​. దేశంలోనే అతిపెద్ద అద్దాల గృహంగా పేరుగాంచిన ఈ నిర్మాణాన్ని చూసేందుకు పెద్దఎత్తున తరలివస్తున్నారు సందర్శకులు. దీన్ని వీక్షించేందుకు విదేశీయులూ క్యూ కట్టడం విశేషం.

భూలోక స్వర్గంలా..

పర్యటకులను మైమరిపించే ఈ అద్భుతమైన అద్దాల గృహం.. దావణగెరెలోని నాలుగో నంబర్​ జాతీయ రహదారిపై ఉంది. ప్రముఖ కుందవాడ సరస్సు సమీపంలో నిర్మితమైన ఈ అందమైన అద్దాల మేడ.. అలా కాలు మోపగానే ఇలా మైమరిచిపోయేలా ఆకర్షిస్తోందట. ఒక్కమాటలో చెప్పాలంటే భూలోక స్వర్గాన్ని తలపించేలా ఉందంటూ కొనియాడుతున్నారు దీన్ని చూసిన పర్యటకులు.

"నేను ఐర్లాండ్​లో ఉంటున్నాను. నా మిత్రుడి పెళ్లి కోసం ఇక్కడకు వచ్చాను. వారి సాయంతోనే ఈ ప్రదేశాన్ని చూసేందుకు వచ్చా. ఇందులోని తోటలు చాలా అందంగా ఉన్నాయి. ప్రశాంతమైన ఈ వాతావరణం.. ధ్యానం చేసేందుకు ఉత్తమ ప్రదేశంగా అనిపిస్తోంది."

- అమోఘ్​, ఐర్లాండ్​లో భారత సంతతి వ్యక్తి

"మేమీ అందమైన ప్రదేశాన్ని చూసేందుకు కొప్పల్​(కర్ణాటక) నుంచి ఇక్కడకు వచ్చాం. ఈ గ్లాస్​ హౌస్​ లోపలికి ప్రవేశించగానే స్వర్గాన్ని తలపిస్తోంది. ఇందులోని వాతావరణం, చుట్టూ నాటిన మొక్కలు పర్యటకులను మైమరిచిపోయేలా చేస్తున్నాయి."

- ఉషా,పర్యటకురాలు, కొప్పల్ జిల్లా, కర్ణాటక

గ్లాస్​ హౌస్​.. జాతీయ రహదారికి అతి చేరువలో ఉండటం వల్ల ఎక్కువ మంది సందర్శకులు విశ్రాంతి కోసం వచ్చేందుకు ఆసక్తి చూపిస్తున్నారు. కొప్పల్, హుబ్లి-ధార్వాడ్, హవేరి, దావణగెరె, బెల్గాం, షిమోగా ప్రాంతాల ప్రజలు అధిక సంఖ్యలో ఈ గ్లాస్​ హౌస్​​ను చూసేందుకు తరలివస్తున్నారట. థాయిలాండ్​, ఐర్లాండ్​లో నివసిస్తున్న ప్రవాస భారతీయులూ దీన్ని సందర్శించేందుకు వస్తున్నారంటే.. ఈ అద్దాల గృహం గొప్పతనమేంటో అర్థం చేసుకోవచ్చు.

ఇవీ ప్రత్యేకతలు..

ఈ గ్లాస్​ హౌస్​లో ఉద్యాన సమాచార కేంద్రం ఉంటుంది. సూర్యోదయం, సూర్యాస్తమయాలను వీక్షించేందుకు ఇందులోనే ప్రత్యేక ఏర్పాట్లు చేయడం గమనార్హం. ఇక ఈ గ్లాస్​ హౌస్​ తోటలో అలంకరించిన అందమైన విదేశీ మొక్కలు, చెట్లు.. చూపరులను తమవైపునకు తిప్పుకుంటూ ప్రత్యేక ఆకర్షణగా నిలుస్తున్నాయి. రాత్రి పూట రంగురంగుల్లో ప్రకాశించేలా ప్రత్యేక లైట్లను అమర్చారు.

నిర్మాణం జరిగిందిలా..

రూ. 30కోట్ల వ్యయంతో నిర్మించిన ఈ గ్లాస్​ హౌస్​ పొడవు, వెడల్పు, ఎత్తులు వరుసగా 108, 68, 18 మీటర్లు. దీని నిర్మాణ పనులు.. 2014లో ప్రారంభమై గతేడాదే ముగిశాయి.

ఇదీ చదవండి: ఔరా! ట్రాక్టర్​నే కుంచె చేసి.. అద్భుతమైన బొమ్మ గీసి..