కశ్మీర్ సమస్యను పరిష్కరించేందుకు భారత్, పాకిస్థాన్లు చర్చలు చేపట్టాలని సూచించింది వేర్పాటువాద సంస్థ హురియత్ కాన్ఫరెన్స్. నియంత్రణ రేఖ వెంబడి ప్రజలను బలిగొంటున్న అర్థరహితమైన రక్తపాతాన్ని ఆపాలని కోరింది.
నియంత్రణ రేఖ వెంబడి భారత్-పాక్ మధ్య శుక్రవారం కాల్పులు జరిగి పలువురు ప్రాణాలు కోల్పోవటంపై విచారం వ్యక్తం చేస్తూ ఓ ప్రకటన చేసింది మీర్వైజ్ ఉమర్ ఫారూక్ నేతృత్వంలోని సంస్థ.
"భారత్, పాకిస్థాన్ ప్రభుత్వాలు పోరాటాన్ని వదిలి జమ్ముకశ్మీర్ వివాదాన్ని పరిష్కరించడానికి, రక్తపాతాన్ని అంతం చేసేందుకు చర్చలు చేపట్టాలని హురియత్ మరోసారి కోరుతోంది. ఎల్ఓసీ వెంబడి దీర్ఘకాలంగా కొనసాగుతున్న యుద్ధంలో అమాయకపు కశ్మీరీ పౌరులు సహా ఇరు దేశాల సైనికులు ప్రాణాలు కోల్పోవటం చాలా బాధాకరం, సిగ్గుచేటు."
- హురియత్ కాన్ఫరెన్స్.
జమ్ముకశ్మీర్లోని నియంత్రణ రేఖ వెంబడి పలు సెక్టార్లలో కాల్పులకు పాల్పడింది పాకిస్థాన్. వారికి భారత భద్రత దళాలు దీటైన సమాధానమిచ్చాయి. వారి స్థావరాలపై రాకెట్ల వర్షం కురిపించాయి. అయితే ఈ ఘటనల్లో భారత్ వైపు ఐదుగురు జవాన్లు, ఆరుగురు పౌరులు ప్రాణాలు కోల్పోయారు. పాకిస్థాన్ వైపు 8 మంది సైనికులు మరణించగా 12 మంది గాయపడినట్లు సమాచారం.
ఇదీ చూడండి: గిలానీ రాజీనామాతో 'వేర్పాటు' రాజకీయాల్లో కుదుపు
