కరోనా కట్టడిలో కేంద్ర ప్రభుత్వ వైఫల్యాలపై కాంగ్రెస్ నేత రాహుల్ గాంధీ మరోసారి ధ్వజమెత్తారు. ప్రస్తుతం పోరాడాల్సింది కొవిడ్పై మాత్రమేనని, కాంగ్రెస్ పార్టీపై కాదని చురకలంటించారు. "ప్రస్తుత పోరాటం కరోనాపైనేనని, కాంగ్రెస్ కానీ.. ఏ ఇతర రాజకీయ ప్రత్యర్థులపై కాదనేది మోదీ ప్రభుత్వం గుర్తించాలి" అంటూ ట్వీట్ చేశారు.
కరోనా నియంత్రణలో కేంద్రం అసమర్థంగా వ్యవహరిస్తోందని కాంగ్రెస్ ఆరోపిస్తూ వస్తోంది. రోగులకు సరైన చికిత్స అందడం లేదని, ఆక్సిజన్ పడకలు, అత్యవసర ఔషధాలకు తీవ్ర కొరత ఉందని చెబుతోంది.
ఈ మేరకు పార్టీ తరపున సహాయ కార్యక్రమాలను ప్రారంభించినట్లు తెలిపింది. వివిధ రాష్ట్రాల్లో ఈ కార్యక్రమాలను నిర్వహించేందుకు పీసీసీ కంట్రోల్ రూమ్ను ఏర్పాటు చేసింది. వీటిని సమన్వయం చేసేందుకు ఏఐసీసీ కంట్రోల్ రూం ఏర్పాటుకు పార్టీ అధినేత్రి సోనియా గాంధీ ఇటీవలే ఆమోదం తెలిపారు.
ఇదీ చదవండి- స్ట్రెచర్ లేక స్కూటీపైనే ఐసీయూకు కొవిడ్ రోగి
