మహారాష్ట్ర నాగ్పుర్లో అక్రమంగా నివసిస్తున్న ఓ వ్యక్తిని దేశం నుంచి బహిష్కరించగా.. అతడు అఫ్గానిస్థాన్లో తాలిబన్లతో కలిసి ప్రత్యక్షమయ్యాడు. తుపాకీ పట్టుకొని ఉన్న అతడి ఫొటో సామాజిక మాధ్యమాల్లో చక్కర్లు కొడుతోంది. ఆ వ్యక్తిని నూర్ మహ్మద్ అజీజ్ మహ్మద్గా పోలీసులు గుర్తించారు.
"నూర్ మహ్మద్ గడిచిన 10ఏళ్లు నాగ్పుర్లోని దిఘోరీలో అక్రమంగా నివసిస్తూ ఉన్నాడు. నిఘా వర్గాల సమాచారం మేరకు అతడిని అదుపులోకి తీసుకొని, ఈ ఏడాది జూన్ 23న అఫ్గానిస్థాన్ పంపించేశాం. అనంతరం అతడు తాలిబన్లలో కలిసిపోయి ఉంటాడు." అని ఓ సీనియర్ అధికారి వెల్లడించారు.
శరణార్థిగా ఉండిపోవాలని ప్రయత్నం!
2010లో 6 నెలల పర్యటక వీసాపై అతడు నాగ్పుర్కు వచ్చాడని అంతకుముందు దర్యాప్తులో తేలినట్లు అధికారి తెలిపారు. "అనంతరం శరణార్థిగా గుర్తించాలని అతడు చేసిన దరఖాస్తును, అప్పీలును ఐరాస మానవ హక్కుల మండలి నిరాకరించింది. అప్పటి నుంచి అక్రమంగా నాగ్పుర్లోనే ఉన్నాడు" అని వెల్లడించారు.
సోదరుడూ తాలిబనే?
నూర్ అసలు పేరు అబ్దుల్ హకీ అని, అతడి సోదరుడు తాలిబన్లతో కలిసి పనిచేస్తున్నట్లు మరో అధికారి తెలిపారు. కాగా, అదుపులోకి తీసుకన్న సమయంలో నూర్ ఎడమ భుజంలో బుల్లెట్ గాయాలను గుర్తించారు పోలీసులు. సామాజిక మాధ్యమాల్లో పలువురు ఉగ్రవాదులను అతడు అనుసరించినట్లు తెలిపారు.
ఇదీ చూడండి: తాలిబన్ల అకృత్యాలతో భయం భయంగా అఫ్గాన్ ప్రజలు!
