Tilak Varma Suresh Raina : టీమ్ఇండియా యంగ్ స్టార్ తిలక్ వర్మ.. మిస్టర్ ఐపీఎల్ సురేశ్ రైనాను గుర్తుచేస్తున్నాడు. అటలో దూకుడుతనం, బ్యాటింగ్ శైలి, ఎంపిక చేసుకునే షాట్లు ఇలా చాలా విషయాల్లో తిలక్.. రైనాను ఫాలో అవుతున్నట్లు కనిపిస్తున్నాడు. అలాగే అప్పుడు రైనా కెరీర్ ప్రారంభంలో ఎలా జరిగిందో.. ఇప్పుడు తిలక్ ప్రస్థానం కూడా దాదాపు అలాగే సాగుతోంది. మరి వీరిద్దరి మధ్య ఒకేలా సాగిన అంశాలేంటో చూద్దాం..
- అప్పుడు రైనా, ఇప్పుడు తిలక్.. ఈ ఇద్దరు ఆటగాళ్లు 20 ఏళ్ల ప్రాయంలోనే టీమ్ఇండియాకు టీ20ల్లో ప్రాతినిధ్యం వహించారు.
- వీరిద్దరూ వారి కెరీర్ తొలి మ్యాచ్లో నాలుగో స్థానంలోనే బ్యాటింగ్కు దిగారు.
- మొదటి మ్యాచ్లో ఈ ఇద్దరు 49 పరుగులు చేసి నాటౌట్గా నిలిచారు.
- ఈ లెఫ్ట్ హ్యాండ్ బ్యాటర్లిద్దరూ మిడిలార్డర్లో బౌలర్లపై ఎదురుదాడికి దిగేందుకు ఇష్టపడతారు.
- ఇలా అటాకింగ్ గేమ్తో రైనా సక్సెస్ అయ్యాడు. మరి తిలక్ ఎలా రాణిస్తాడో చూడాలి.
- ఇక ఈ ఇద్దరూ తొలి అంతర్జాతీయ టీ20లో రెండు క్యాచ్లు అందుకున్నారు.
- టీ20ల్లో మొదటి అర్ధశతకం సాధించిన మ్యాచ్లో భారత్ ఓడింది.
- తిలక్, రైనా వీరిద్దరూ.. తొలి రెండు ఐపీఎల్ సీజన్లలో 300+ పరుగులు చేశారు.
- ఇక ఐపీఎల్ ప్లే ఆఫ్స్లో 300+ స్ట్రైక్ రేట్తో (కనీసం 40+ పరుగులు చేసిన సందర్భాల్లో) ఆడిన ఘనత వీరిద్దరికే చెందింది.
Tilak Varma Stats : కాగా 2022 లో ముంబయి తరఫున ఐపీఎల్ అరంగేట్రం చేసిన తిలక్ వర్మ.. రెండు సీజన్లలోనే జట్టులో కీలకంగా మారాడు. తొలి సీజన్లో 14 మ్యాచ్ల్లో 36 సగటున, 131 స్ట్రైక్ రేట్తో 397 పరుగులు చేశాడు. 2023 ఐపీఎల్లో మరింత మెరుగైన ఆటతో కేవలం 11 మ్యాచ్ల్లోనే 42.87 సగటున, 164.11 స్ట్రైక్ రేట్తో 343 పరుగులు సాధించాడు.
Suresh Raina Records : మరోవైపు సురేశ్ రైనా.. ఐపీఎల్లో నిలకడగా ఆడుతూ 'మిస్టర్ ఐపీఎల్'గా పేరొందాడు. ఐపీఎల్ చరిత్రలో (2008 - 2021) రైనా.. 205 మ్యాచ్ల్లో 32.51 సగటున, 136.76 స్ట్రైక్ రేట్తో 5528 పరుగులు చేశాడు. ఇందులో ఓ శతకం, 39 అర్ధశతకాలు ఉన్నాయి.
