సినీ రంగంపై కరోనా తీవ్ర ప్రభావం చూపింది. ఇప్పడిప్పుడే ఆ కుదుపు నుంచి కోలుకుని షూటింగ్స్ చేస్తున్నారు. అయితే థియేటర్లు ఎప్పుడు తెరుస్తారనేది మాత్రం ఇంకా ప్రశ్నార్థకమే. ఈ నేపథ్యంలోనే కొన్ని సినిమాలు ఓటీటీల్లో విడుదలవుతున్నాయి. అయితే ఈ వేదిక.. థియేటర్లకు పోటీగా మారుతుందా? ప్రజలు బిగ్స్క్రీన్పై సినిమాలు చూడటం ఇక కష్టమేనా? లాంటి ఎన్నో ప్రశ్నలు ప్రస్తుతం వస్తున్నాయి. వాటికి తమదైన అభిప్రాయాలను తెలియజేస్తున్నారు స్టార్ నటీనటులు. అయితే ఓసారి ఓటీటీ వర్సెస్ థియేటర్ గురించి చూద్దాం.
భౌతిక దూరం, మాస్క్, శానిటైజేషన్ తదితర నిబంధనల నడుమ షూటింగ్స్ ఇటీవలే ప్రారంభమయ్యాయి. కరోనా సంక్షోభాన్ని దృష్టిలో పెట్టుకుని తక్కువ బడ్జెట్తో, అతి కొద్దిమందితో చిత్రీకరణ చేయగలిగిన కథలనే తెరకెక్కిస్తున్నారు దర్శక నిర్మాతలు. కొందరు మాత్రం ప్రత్యేకంగా ఓటీటీ(ఓవర్‌ ది టాప్ మీడియా సర్వీసెస్‌)లో విడుదల చేసేలా సినిమాలు రూపొందిస్తున్నారు. అందుకే నిపుణులు దీన్ని లో-బడ్జెట్ చిత్రాలకు సరైన వేదికలు అని అభిప్రాయపడుతున్నారు.
భారీ వర్సెస్ లోబడ్జెట్
చిన్న సినిమాలు సరైన ధరకు అమ్ముడుకాకపోవడం, విడుదల సమయంలో థియేటర్లు ఖాళీ లేకపోవడం, పెద్ద హీరో సినిమా విడుదల వల్ల ఆయా చిత్రాల విడుదలకే అష్టకష్టాలు పడేవారు. విడుదలైన జనాలు తక్కువగా ఉండే ఏరియాల్లో ప్రదర్శించేవారు. ఫలితంగా వాటికి రీచ్ పరిమితంగా ఉండేది. అలానే ఎన్నో సినిమాలు కథ, కథనం బాగున్నా అండర్ రేటెడ్గానే అలా వచ్చి ఇలా వెళ్లిపోయాయి. అయితే వాటిని టీవీలు, యూటూబ్ ఛానెళ్లలో పెట్టినప్పుడు మాత్రం మంచి స్పందన వచ్చేది. ఇప్పుడు ఓటీటీ ఆ సమస్యలన్నింటికి పరిష్కారం చూపిస్తూ.. చిన్న సినిమాలకు వరంగా మారింది. భవిష్యత్తులోనూ వీటికి ఆసరాగా ఈ వేదిక నిలవనుంది. అయితే పెద్ద చిత్రాల విషయంలో ఓటీటీలు ఇది ఆలోచించాల్సిన పరిస్థితి.
దర్శకధీరుడు రాజమౌళి తీసిన 'బాహుబలి-1 &2' సినిమాలు దాదాపు రూ.430 కోట్లతో తెరకెక్కాయి. వాటిని ఓటీటీ వేదికలపై విడుదల చేయడం శ్రేయస్కరం కాదు. డిజిటల్ హక్కులకు ఆయా ఓటీటీ సంస్థలు భారీ మొత్తాలను చెల్లించలేవు. వేలమంది సిబ్బంది, పెద్ద ప్రొడక్షన్ హౌస్ ఉన్న భారీ బడ్జెట్ చిత్రాలకు బిగ్ స్క్రీన్ మాత్రమే సరైన మార్గం. లేదంటే నిర్మాతలు నష్టాలు ఎదుర్కొని.. అంతర్జాతీయ హంగులతో సినిమాలు తీయలేరు. ప్రస్తుతం భారత్లోనే బాలీవుడ్కు పోటీగా ఉన్న టాలీవుడ్ తన స్థాయిని నిలబెట్టుకోవడంలో థియేటర్ల కీలకపాత్ర పోషిస్తున్నాయి. ప్రపంచవ్యాప్తంగా బాహుబలి పేరు మార్మోగడానికి ఎక్కువ థియేటర్లలో విడుదలవడం ఓ కారణం. అందులో గ్రాఫిక్స్, చిత్రబృందం సృజనాత్మకత మరో కారణం. కచ్చితంగా భారీ బడ్జెట్తోనే ఆ స్థాయి విలువలను తీసుకురాగలం.
లాభాలు తగ్గుతాయి!
ఇటీవలె విడుదలైన అమితాబ్ 'గులాబో సితాబో' చిత్రాన్ని అమెజాన్ ప్రైమ్ సంస్థ రూ.60 నుంచి 65 కోట్లు చెల్లించి కొనుగోలు చేసింది. అయితే ఈ సినిమా తీయడానికి రూ.30 కోట్లు మాత్రమే ఖర్చయింది. అందువల్ల మరో రూ.30 కోట్లు లాభమే వచ్చింది. అయితే బిగ్బచ్చన్కు ఉన్న క్రేజ్, అతడి ఇమేజ్ను ఆధారంగా.. ఇదే సినిమాను థియేటర్లో విడుదల చేస్తే కచ్చితంగా నిర్మాతకు లాభాలు మరింత పెరిగేవి. తలైవా రజనీకాంత్ 'రోబో 2.ఓ' సినిమా 2018లో విడుదలైంది. ఈ చిత్రానికి రూ.570 కోట్లు ఖర్చుపెడితే.. ప్రపంచవ్యాప్తంగా రూ. 800 కోట్ల వసూళ్లు రాబట్టింది. మరి ఓటీటీ వేదికపై కనీసం ఖర్చు పెట్టిందైనా వస్తుందా? అంటే రావని బల్లగుద్ది మరీ చెబుతున్నారు సినీ విశ్లేషకులు. ఓటీటీ వేదికగా అయితే ప్రచారానికి అయ్యే ఖర్చు కాస్త తగ్గుతుంది.
ఆధారం కోల్పోతారు
ఓటీటీ ప్లాట్ఫాంలను ఎక్కువగా కార్పోరేట్ సంస్థలే నడిపిస్తున్నాయి. అయితే వీటి నిర్వహణ చాలా తక్కువ వ్యయంతో కూడుకున్నది. అదే థియేటర్ల నిర్వహణకు ఖర్చు ఎక్కువ. వందల సంఖ్యలో సిబ్బంది థియేటర్ల మీద ఆధారపడి జీవిస్తుంటారు. సెక్యూరిటీ, టికెట్ కలెక్టర్, కార్మికులు, ఫుడ్ స్టాల్, థియేటర్ బయట దుకాణాలు ఇలా.. ప్రత్యక్షంగా, పరోక్షంగా వందల మంది ఉపాధి పొందుతారు. ఓటీటీ వల్ల వారందరి భవితవ్యంపై దెబ్బ పడుతుంది. ఇదే జరిగితే ఆదరణ లేక థియేటర్లు మూసేయాల్సిన పరిస్థితి ఏర్పడొచ్చు.
స్థాయి తగ్గిపోవచ్చు
కరోనా వ్యాప్తి నేపథ్యంలో ఉన్న ఇబ్బందులకు ప్రత్యామ్నాయంగా ఓటీటీ ఉపయోగపడుతోంది. అయితే ఎంతకాలం ఈ ఫ్లాట్ఫామ్ కొత్త కంటెంట్ను ఇవ్వగలదు? ఓ సినిమా టాలీవుడ్కే చెందుతుంది. లేదంటే పాన్ ఇండియా, వరల్డ్వైడ్ అనే విభిన్న వర్గీకరణలు ఓటీటీలో ఉండవు. అప్పుడు సినిమాలు తీసేవాళ్లు ఏ అంశాన్ని దృష్టిలో పెట్టుకుని చిత్రాలు తీయాలనేది స్పష్టత ఉండదు.
ప్రాంతీయ సినిమా అయితే తక్కువ బడ్జెట్తో తీసి ఆ ప్రాంతంలోనే ఎక్కువ శాతం థియేటర్లలో విడుదల చేస్తారు. అదే పాన్ ఇండియా అయితే మరింత బడ్జెట్ పెట్టి.. అదే స్థాయిలో థియేటర్లు బుక్ చేసి దేశవ్యాప్తంగా రిలీజ్ చేస్తారు. వరల్డ్వైడ్ అయితే కూడా బడ్జెట్ పెట్టడమే కాకుండా అందుకు అనుగుణంగా డబ్బింగ్, నిర్మాణ విలువలు మార్చుతారు. అవే ప్రజలను బాగా ఆకట్టుకుంటాయి. బాహుబలి ఆ విధంగానే ప్రపంచవ్యాప్తంగా పాపులర్ అయింది. చైనీయులు వాళ్ల భాషలో ఈ తెలుగు చిత్రానికి నీరాజనాలు పలికారు. ఎన్నో ఫిల్మ్ వేదికలపైనా ప్రదర్శితమైంది. మరి ఓటీటీలో విడుదలైతే అలాంటి అవకాశాలు పరిమితం. అప్పుడు మన సినిమా స్థాయి క్రమంగా తగ్గిపోతుంది.
బోల్డ్ కథాంశాలకూ ఓకే
టెక్నాలజీ, స్మార్ట్‌ఫోన్‌/టీవీ, ఇంటర్నెట్‌ వినియోగం పెరిగిన తర్వాత యువత నెట్ వినియోగం పెరిగింది. అలా ఓటీటీలపై వైపు నెమ్మదిగా మొగ్గుచూపారు. ఇక లాక్‌డౌన్‌తో వీక్షకుల సంఖ్య ఒక్కసారిగా పెరిగిపోయింది. అయితే ఓటీటీలో విడుదలవుతున్న చిత్రాలకు సెన్సార్ సమస్యలు ఉండవు. ఎలాంటి బోల్డ్ కథాంశాలనైనా ఇందులో చూపించొచ్చు. అదే థియేటర్లలో హద్దు మీరేలా హీరోహీరోయిన్ల ప్రదర్శన ఉంటే.. దానికి కత్తిరింపులు, సర్టిఫికేషన్లోనూ అడల్డ్ చిత్రాలని పేరు వేస్తారు. ఫలితంగా వాటిని దృష్టిలో పెట్టుకునే వీక్షకులు సినిమా థియేటర్లకు వెళ్తారు.
వెబ్సిరీస్లు, ఎంటర్టైన్మెంట్ ప్రోగ్రామ్లకు
40 నిమిషాల నిడివి ఉండే వెబ్ సిరీస్లలో గరిష్ఠంగా పది ఎపిసోడ్లు ఉంటాయి. ఫలితంగా సమాచారాన్ని ఎక్కువ మేర చెప్పొచ్చు. కథ, ప్రేక్షకుల ఆసక్తి ఆధారంగా వాటి సంఖ్యను పెంచుకుంటూ వెళ్లొచ్చు. కానీ థియేటర్లలో అలాంటి పరిస్థితి ఉండదు. చాలా తక్కువ సినిమాలే సీక్వెళ్లుగా తెరకెక్కుతాయి. కథను కచ్చితంగా పరిమితం చేయాలి. ఇంకా థియేటర్ సీక్వెల్స్ మధ్య నెలల గ్యాప్ ఉండటం వల్ల ప్రజలు ఆసక్తి కోల్పోతారు. అందుకే వెబ్సిరీస్,ఎంటర్టైన్మెంట్ ప్రోగ్రామ్లకు ఓటీటీ మేలు.
తక్కువ సమయంలో ఎక్కువ చిత్రాలు
పెద్ద హీరోలు సంవత్సరానికి ఒక్క సినిమా చేస్తే గొప్పే. కొందరు పెద్ద దర్శకులు మాత్రమే రెండు వరకు తీస్తున్నారు. ఫలితంగా ప్రజలకు పండగలప్పుడే తప్ప మిగతా సమయాల్లో వినోదం అందదు. అయితే ఆ సమంలో ఓటీటీలు లెక్క సరిచేస్తున్నాయి. ఇలాంటి కరోనా విపత్తులో ఇంటికే పరిమితమైన వేళ ప్రజలను విభిన్న కథాంశాలతో మెప్పిస్తున్నాయి ఓటీటీ వేదికలు. తక్కువ సమయంలో ఎక్కువ చిత్రాలు విడుదల కావాలంటే ఓటీటీలు సరైనవి. ఎక్కువ మొత్తం అప్పు తెచ్చి, భారీ బడ్జెట్ చిత్రాలు తీస్తే.. అవి సరిగా ఆడకపోవడం వాటి అప్పులు, వడ్డీలు అధికమై చాలా మంది నిర్మాతలు రోడ్డున పడ్డారు. అయితే ఓటీటీలు అలాంటి పరిస్థితులు రానివ్వవు. నెలల కాలంలోనే విడుదల వల్ల నష్టం రాదు. వచ్చినా చాలా తక్కువ మొత్తంలోనే ఉంటుంది.
సౌండ్లు, గ్రాఫిక్స్ మిస్సవుతాం...
హాలీవుడ్లో వేల కోట్లు పెట్టి సినిమాలు తీస్తారు. వాటిలో సౌండ్లు, గ్రాఫిక్స్ అద్భుతంగా ఉంటాయి. వాటిని చూడాలంటే బిగ్స్రీన్ పర్ఫెక్ట్గా ఉంటుంది. అదే స్మార్ట్తెరపై ఆ గ్రాఫిక్స్ అంతగా ఆకట్టుకోలేవు. త్రీడీ, రియల్ ఎక్స్పీరియన్స్(వాన పడటం, రాకెట్లో దూసుకెళ్లడం), డాల్బీ సౌండ్స్ వంటి అనుభవాలు పలు మల్టీప్లెక్స్ల్లో ఉంటాయి. అవన్నీ ఓటీటీ వేదికగా అనుభూతి చెందలేం. వీఆర్, డాల్బీ ఫోన్లు, ల్యాప్టాప్లకు పెట్టుకునే సౌకర్యం ఉన్నా.. అవి పూర్తిస్థాయి అనుభూతిని ఇవ్వలేవు. అంతేకాకుండా వీటి కొనుగోలు భారం వినియోగదారుడిపైనే పడుతుంది.
కుటుంబంతో కలిసి చూడటం కష్టం...
ఫ్యామిలీతో కలిసి సినిమాకు వెళ్లాలంటే థియేటర్లు అద్భుతంగా ఉంటాయి. మానవ సంబంధాలను మెరుగుపర్చడంలో ఇది బాగా తోడ్పడతాయి. అదే ఓటీటీ అయితే కలిసి చూడటానికి అవకాశం ఉండదు. ఒక్క గదిలోనో, ఒంటరిగానో సినిమా చూసి ఆనందపడాలి. అమెజాన్ ప్రైమ్ వంటి సంస్థలు దూరంగా ఉన్నా కలిసి సినిమాలు చూసేందుకు సాంకేతికతను జోడిస్తున్నా.. ఊరట కల్పించడం తప్ప థియేటర్ల ఫలితాలను ఇవ్వలేవు. అయితే సినిమాలకు, షికార్లకు పెట్టే ఖర్చును ఓటీటీ వేదికలు తగ్గిస్తాయి. కరోనా సమయంలో వైరస్ అంటుకోకుండా ఇంటిలోనూ వినోదాన్ని ఇవ్వడంలో ఓటీటీలు సహకరిస్తాయి.
సినిమాలను థియేటర్లలో విడుదల చేస్తూ... డిజిటల్ రైట్స్ను ఓటీటీలకు ఇవ్వడం వల్ల ఎక్కువ మందికి సినిమా అందుబాటులో ఉండటమే కాకుండా ఉపాధి నిలుస్తుంది. నిర్మాతలూ నష్టాలను ఎదుర్కోరని చాలా మంది సినీ పండితులు ఇప్పటికే అభిప్రాయాలు వ్యక్తం చేశారు.
