ఫేస్​బుక్​లో పరిచయమైన ఫ్రెండ్​తో కలిసి నకిలీ కరెన్సీ ముద్రణ - రెడ్​ హ్యాండెడ్​గా పట్టుకున్న పోలీసులు - Fake Currency in Hyderabad

Police Seized Fake Currency in Hyderabad : హైదరాబాద్​లో నకిలీ నోట్లు ముద్రణ చేస్తున్న యువకులను పోలీసులు పట్టుకున్నారు. వారి దగ్గర నుంచి సుమారు రూ.17 లక్షల విలువైన నకిలీ కరెన్సీ స్వాధీనం చేసుకున్నారు. పోలీసులు తెలిపిన వివరాల ప్రకారం, గంగరాజు అనే యువకుడు ఫేస్​బుక్​లో పరిచయమైన సచిన్​ పవార్​, సురేశ్​లతో కలిసి నకిలీ నోట్ల (Fake Currency)ను ముద్రిస్తున్నాడు. వారు సుమారు రూ.17 లక్షలు ముద్రించి, వివిధ రాష్ట్రాల్లో ఉన్న ఏజెంట్స్​ ద్వారా చలామణి చేయడానికి ప్రణాళిక వేసుకున్నారు. ఇందులో భాగంగా బెంగళూరులో తమిళనాడుకు చెందిన రవితో చలామణి చేసేందుకు డీల్​ కుదుర్చుకునేందుకు వెళ్లాడు. 

Police Arrest Fake Currency Makers : బెంగళూరులో డీల్​ కుదరకపోవడంతో గంగరాజు హైదరాబాద్​ వచ్చాడు. రాజేంద్రనగర్​లో మరో వ్యక్తితో డీల్​ కుదుర్చుకునేందుకు వెళ్లాడు. ఈ విషయం పోలీసులు తెలుసుకుని అక్కడికి చేరుకున్నారు. అనంతరం నిందితుల మధ్య డీల్​ జరుగుతుండగా వారిని ఎస్​వోటీ బృందం రెడ్​ హ్యాండెడ్​గా పట్టుకుంది. నిందితులు నకిలీ నోట్లపై రిజర్వ్ బ్యాంక్ ఆఫ్ ఇండియాకు బదులు చిల్డ్రన్స్ బ్యాంక్ ఆఫ్​ ఇండియాగా ముద్రించారు. మిగతాదంతా మక్కీగా ప్రింట్​ చేశారు. దీంతో వారిని పోలీసులు అదుపులోకి తీసుకుని కేసు నమోదు చేశారు. ఈ దందాలో ఎవరెవరు ఉన్నారో తెలుసుకునేందుకు మరింత లోతుగా దర్యాప్తు చేస్తున్నామని తెలిపారు.