చిలుక కోసం స్పెషల్​ మెట్రో నడిపిన అధికారులు- ఎందుకో తెలుసా?

Nagpur Metro Run For Save Parrot : మెట్రో బ్రిడ్జి తీగలకున్న మాంజాలో చిక్కుకున్న ఓ చిలుక ప్రాణాలను కాపాడేందుకు ఏకంగా స్పెషల్​ ట్రైన్​ను నడిపింది మహారాష్ట్రలోని నాగ్​పుర్​ మెట్రో. ఇందుకు ఓ యువకుడి ప్రయత్నం తోడవడం వల్ల ఆ చిలుక స్వల్పగాయాలతో సేఫ్​గా బయటపడింది. ఇంతకీ ఏం జరిగిందంటే

మంగళవారం సాయంత్రం నాగ్​పుర్​ నగరంలోని గడ్డి గోడౌన్ మెట్రో స్టేషన్​కు సమీపంలోని బ్రిడ్జికు అమర్చిన తీగలకు ఓ చిలుక వేలాడుతూ కనిపించింది. గాలిపటాలు ఎగురవేసే నైలాన్​ మాంజాలో ఇరుక్కుపోయి నరకయాతన అనుభవించింది చిలుక. దీనిని చూసిన స్థానికులు తొలుత అటవీ అధికారులకు సమాచారం ఇచ్చారు. సంఘటనా స్థలికి చేరుకున్న సిబ్బంది దానిని కాపాడటంలో విఫలమైంది. ఆ తర్వాత స్థానికంగా ఉండే అగ్నిమాపక శాఖకు ఫోన్​ చేసి వారినీ పిలిపించారు. వీరు కూడా ఎన్ని ప్రయత్నాలు చేసినా వంతెనపై చిక్కుకున్న చిలుకను చేరుకోలేకపోయారు. 

ఈ క్రమంలో అక్కడే ఉన్న హరీశ్​ కింకర్​ అనే యువకుడు సమీపంలోని గడ్డి గోడౌన్ మెట్రో స్టేషన్‌కు చేరుకొని అక్కడి అధికారులతో మాట్లాడాడు. మెట్రో బ్రిడ్జిపై చిక్కుకున్న చిలుకను కాపాడేందుకు ట్రాక్​ ద్వారా వెళ్లేందుకు అనుమతి ఇవ్వాల్సిందిగా వారిని కోరాడు. ఇందుకు ఒప్పుకున్న మెట్రో యాజమాన్యం స్టేషన్​కు 100 మీటర్ల దూరంలో ఉన్న చిలుకను కాపాడేందుకు ప్రత్యేకంగా ఓ ట్రైన్​ను నడిపారు. ఇందులో హరీశ్​ కింకర్ కూడా ఉన్నాడు. అలా స్టేషన్​ నుంచి 100 మీటర్లు ప్రయాణించి పట్టాలపైకి దిగాడు. అలా మెట్రో సిబ్బంది సాయంతో మాంజాలో ఇరుక్కున్న చిలుకను సురక్షితం​గా కాపాడాడు. కాగా, ప్రాణాలతో బయటపడ్డ చిలుకకు స్వల్ప గాయాలవ్వడం వల్ల దానికి ఆస్పత్రిలో చికిత్స అందిస్తున్నట్లుగా సంబంధిత అధికారులు తెలిపారు.