రైలు చక్రాల మధ్య కూర్చుని 5ఏళ్ల చిన్నారి 100కి.మీ ప్రయాణం- ఒక్కసారిగా అంతా షాక్​! - RPF Saved Child From Train

Child Travelled Sitting Between Train Wheels : ఉత్తర్​ప్రదేశ్​లో గూడ్స్ రైలు చక్రాల మధ్య కూర్చుని 100 కిలోమీటర్లకుపైగా ప్రయాణించిన చిన్నారి(5)ని ఆర్​పీఎఫ్ సిబ్బంది సురక్షితంగా రక్షించారు. ఆ తర్వాత చిన్నారిని చైల్డ్ వెల్ఫేర్ కమిటీకి అప్పగించారు. చిన్నారి తండ్రిని కూడా సంప్రదించారు. అదే సమయంలో ఇలాంటి ఘటనలు పునరావృతం కాకుండా చూడాలని ఆదేశించారు రైల్వే అధికారులు. విచారణకు ఆదేశాలు జారీ చేశారు.

అసలేం జరిగిందంటే?
చార్​బాగ్​ రైల్వే స్టేషన్ నుంచి గూడ్స్ రైలు బయలుదేరింది. అంతకుముందు తండ్రితో ఐదేళ్ల బాలుడు ఆడుకుంటూ రైలు వద్దకు చేరుకున్నాడు. అనంతరం రైలు చక్రాల మధ్యకు వెళ్లి నిద్రపోయాడు. రైలు ఒక్కసారిగా మొదలవ్వడం వల్ల బయటకు రాలేకపోయాడు. ఆ తర్వాత చక్రాలపైనే కూర్చుని 100 కిలోమీటర్లపైగా దూరం ప్రయాణించాడు.

హర్దోయ్​ రైల్వే స్టేషన్​కు గూడ్స్ రైలు చేరుకున్నాక తనిఖీల్లో భాగంగా ఆర్​పీఎఫ్​ సిబ్బంది చక్రాల మధ్య ఉన్న పిల్లవాడిని గుర్తించి బయటకు తీశారు. అనంతరం చిన్నారిని చైల్డ్ వెల్ఫేర్ కమిటీకి అప్పగించారు. పిల్లవాడి తండ్రిని సంప్రదించారు. అయితే ముందుగా భయపడ్డ చిన్నారి, తర్వాత జరిగినదంతా అధికారులకు చెప్పాడు.