దివంగత రామోజీరావుకు మంత్రి కోమటిరెడ్డి, ఎంపీ లక్ష్మణ్ నివాళులు - eenadu group chairman ramoji rao

BJP MP Laxman Paid Tribute to Late Ramoji Rao : దివంగత రామోజీరావుకు రాజ్యసభ సభ్యుడు కె.లక్ష్మణ్​ నివాళులు అర్పించారు. రామోజీ ఫిల్మ్​సిటీకి వెళ్లి ఆయన కుటుంబ సభ్యులను పరామర్శించారు. రామోజీరావు మరణం పట్ల ప్రగాఢ సానుభూతి తెలిపారు. రామోజీరావు మరణంతో దేశం గొప్ప ఆణిముత్యాన్ని కోల్పోయిందని లక్ష్మణ్​ అన్నారు. విలువలతో కూడిన జీవనం రామోజీరావు సాగించారని తెలిపారు. తెలుగు భాష పరిరక్షణకు విశేష కృషి చేశారని కొనియాడారు.

మరోవైపు రాష్ట్ర ఆర్​అండ్​బీ, సినిమాటోగ్రఫీ మంత్రి కోమటిరెడ్డి వెంకట్​రెడ్డి రామోజీ గ్రూపు సంస్థల ఛైర్మన్‌, దివంగత రామోజీరావుకు నివాళి అర్పించారు. ఫిల్మ్‌సిటీకి వెళ్లి రామోజీరావు కుటుంబసభ్యులను మంత్రి పరామర్శించారు. క్రమశిక్షణకు మారుపేరైన రామోజీరావు ప్రజల పక్షాన బలమైన గళం వినిపించారని అన్నారు. మార్గదర్శి చిట్‌ఫండ్‌తో తనకు ఉన్న అనుబంధాన్ని ఈ సందర్భంగా మంత్రి గుర్తు చేసుకున్నారు. ఈనాడు పత్రిక చదవలేనిదే ఉదయం కాదని అన్నారు. కాంగ్రెస్‌ సీనియర్‌ నేత సుబ్బరామిరెడ్డి కూడా రామోజీరావుకు నివాళులు అర్పించి కుటుంబసభ్యులను పరామర్శించారు