Part Time Job Scam in Hyderabad : పార్ట్ టైం ఉద్యోగాల పేరుతో సైబర్ కేటుగాళ్లు ఎంతో మందిని బురిడీ కొట్టిస్తున్నారు. అందుకు రోజుకో కొత్త పంథాను ఎంచుకుంటూ వేలు, లక్షల్లోనూ కాజేస్తున్నారు. తాజాగా ఇంటర్నేషనల్ కాల్స్ కోడ్తో వాట్సాప్ వీడియోకాల్ చేసి అందిన కాడికి దోచుకుంటున్నారు. ముఖ్యంగా ఉత్తరాదికి చెందిన సైబర్ మోసగాళ్లు ఇలాంటి చర్యలకు పాల్పడుతున్నారు.
బంజారాహిల్స్ వాసి దినేశ్కు +84 కోడ్తో మొదలయ్యే నంబర్ నుంచి వాట్సప్ వీడియో కాల్ వచ్చింది. అది విదేశీ నంబరు కావడంతో అనుమానం వచ్చి మొదట్లో అతను ఫోన్ లిఫ్ట్ చేయలేదు. మళ్లీ కొంతసేపటికి మళ్లీ అదే నంబర్ నుంచి వీడియో కాల్ రావడంతో ఎత్తి మాట్లాడారు. ఆన్లైన్ ద్వారా తాము అప్పగించిన పనిని చేస్తే రోజుకు రూ.వేలల్లో సంపాదించవచ్చని కాల్ చేసిన వ్యక్తి చెప్పాడు. అతని మాటలు విన్న దినేశ్ ఆ మాటలను నమ్మి రిజిస్ట్రేషన్ రుసుం పేరిట రూ.54 వేలు చెల్లించాడు. ఎంతకీ అటునుంచి సమాచారం లేకపోవడంతో మోసపోయానని గ్రహించి సైబర్ పోలీసులకు ఫిర్యాదు చేశాడు.
ఇప్పుడు దినేశ్ ఒక్కడే కాదు హైదరాబాద్లో వందల సంఖ్యలో వాట్సప్ వినియోగదారులకు కొద్దిరోజులుగా ఇదే తరహాలో వాయిస్, వీడియో కాల్స్ సర్వసాధారణం అయిపోయాయి. ఎక్కువగా +60(మలేసియా), +251(ఇథియోపియా), +62(ఇండోనేషియా), +254(కెన్యా) తదితర విదేశీ నంబర్ల నుంచి కొద్ది రోజులుగా దేశంలోని పలు మెట్రో నగరాల్లో ఈ తరహా కాల్స్ ఎక్కువగా వస్తున్నాయని నిపుణులు తెలిపారు. ఎందుకంటే విదేశాలకు వెళ్లి కొద్దిరోజులు ఉండేవారి కోసం కొందరు సర్వీసు ప్రొవైడర్లు విదేశీ నంబర్లను తాత్కాలికంగా కేటాయిస్తున్నారు. దీనినే నేరగాళ్ల ముఠాలు అవకాశంగా వినియోగించుకున్నారు. ఆయా నంబర్లతో వాట్సప్ రిజిస్టర్ చేశాక సిమ్ వినియోగించకపోయినా వాట్సప్ పనిచేసే అవకాశం ఉండటంతో కాల్ స్పూఫింగ్ ద్వారా నేరాలకు వినియోగించుకుంటున్నారని తెలుస్తోంది.
ఆ యాప్పై సైబర్ దాడి- హ్యాకర్ల చేతికి 70 లక్షల మంది వివరాలు!
సాఫ్ట్వేర్ ఆధారిత కాల్స్ : వాట్సప్లో వాయిస్, వీడియోకాల్స్ వందల మందికి వరుసపెట్టి వస్తుండటంపై సైబర్ భద్రత నిపుణులు ఆరా తీశారు. దీని వెనుక సాఫ్ట్వేర్ ఆధారిత టూల్స్ ప్రమేయం ఉన్నట్లు వెల్లడించారు. సైబర్ కేటుగాళ్లు వేల నంబర్లను ఆ టూల్స్కు అనుసంధానం చేస్తే, ఆ నంబర్లకు ఫోన్ చేసినా ఎస్ఎంఎస్లు పంపినా అవతల వ్యక్తులకు విదేశీ నంబర్లుగానే కనిపిస్తాయి. కానీ చేసేది మాత్రం దేశంలోని ఉత్తరాది ముఠాలేనని భద్రత నిపుణుల విచారణలో వెల్లడైంది. ఆయా నంబర్లకు ఫోన్ చేస్తే హిందీలో మాట్లాడటం లేదా ఆంగ్లంలో మాట్లాడినా విదేశీ యాస లేకపోవడంతో ఆముఠాలేనని నిర్ధారించారు.
రిక్విన్ అస్త్రంతో ఉపశమనం : గుర్తు తెలియని విదేశీ నంబర్ల నుంచి వాట్సాప్ వాయిస్, వీడియోకాల్స్ వస్తే స్పందించకపోవడమే ఉత్తమమని టీఎస్సీఎస్బీ ఎక్స్ వేదికగా అప్రమత్తం చేస్తోంది. ముఖ్యంగా డిపార్ట్మెంట్ ఆఫ్ టెలికాం, తెలంగాణ స్టేట్ సైబర్ సెక్యూరిటీ బ్యూరోలు అప్రమత్తమయ్యాయి. ఆ నంబర్లతో వచ్చే కాల్స్ను బ్లాక్ చేయడం గానీ, వాట్సాప్ తాజా అప్డేట్లను ఫాలో అవ్వడం చేస్తే ఉత్తమం. డీవోటీ ఆధ్వర్యంలో ఉన్న సంచార్ సాథి పోర్టల్లో రిపోర్ట్ ఇన్కమింగ్ ఇంటర్నేషనల్ కాల్ విత్ ఇండియన్ నంబర్(రిక్విన్) ఫీచర్ను తెచ్చింది. అలాంటి కాల్స్ను రిసీవ్ చేసుకున్న బాధితులు ఆ పోర్టల్లోకి వెళ్లి ఫిర్యాదు చేయడం ద్వారా డీవోటీ నిఘా ఉంచుతుంది.
బ్యాంక్స్ మాస్టర్ ప్లాన్ - ఇకపై క్షణాల్లో సైబర్ నేరగాళ్ల అకౌంట్స్ ఫ్రీజ్!
