ఇదొక్కటి వేసి "పల్లీ చట్నీ" చేయండి - టిఫెన్స్​లోకి పర్ఫెక్ట్ టేస్ట్​తో అదుర్స్ అనిపిస్తుంది!

ఈ స్టైల్​లో పల్లీ పచ్చడి ట్రై చేయండి - అన్ని టిఫెన్స్​లోకి అద్దిరిపోతుంది!

Peanut Chutney Recipe in Telugu : ఉదయం పూట బ్రేక్​ఫాస్ట్​లో ఏ టిఫెన్ చేసుకున్నా అందులోకి పల్లీ చట్నీ ఉండాల్సిందే. ఎందుకంటే అన్ని టిఫెన్స్​లోకి అద్భుతమైన కాంబినేషన్ ఈ చట్నీ. కొంతమందికైతే పల్లీ చట్నీతో తింటేనే టిఫెన్ తిన్న ఫీలింగ్ ఉంటుంది. కానీ, చాలా మందికి పల్లీ చట్నీ పర్ఫెక్ట్​గా చేయడం రాదు. టేస్ట్​లో ఏదో మిస్ అయినట్టుగా అనిపిస్తుంది. అలాంటి వారు ఈసారి "పల్లీ చట్నీ" చేసేటప్పుడు ఇదొక్కటి యాడ్ చేసి చేసుకోండి. టేస్ట్ రెట్టింపు అవ్వడమే కాకుండా అన్ని టిఫెన్స్​లోకి అదుర్స్ అనిపిస్తుంది. పైగా దీన్ని ప్రిపేర్ చేసుకోవడం కూడా చాలా ఈజీ. మరి, ఈ సింపుల్ అండ్ టేస్టీ చట్నీకి కావాల్సిన పదార్థాలేంటి? తయారీ విధానమేంటో ఇప్పుడు చూద్దాం.

కావాల్సిన పదార్థాలు :

• పల్లీలు - 1 కప్పు
• జీడిపప్పు పలుకులు - 10
• పచ్చిమిర్చి - 4
• వెల్లుల్లి రెబ్బలు - 3 నుంచి 4
• చింతపండు - కొద్దిగా
• ఉప్పు - రుచికి సరిపడా
• నూనె - 3 టేబుల్​స్పూన్లు
• కరివేపాకు - 2 రెమ్మలు
• జీలకర్ర - 1 టీస్పూన్
• ఆవాలు - 1 టీస్పూన్
• శనగపప్పు - కొద్దిగా
• మినప్పప్పు - కొద్దిగా
• ఎండుమిర్చి - 2

తయారీ విధానం :

• ఇందుకోసం ముందుగా ఒక చిన్న బౌల్​లో చింతపండు నానబెట్టుకోవాలి. ఇప్పుడు స్టౌపై కడాయి పెట్టుకొని పల్లీలు వేసి లో ఫ్లేమ్​ మీద మంచిగా వేయించుకొని పక్కన పెట్టుకోవాలి.
• ఆ తర్వాత అదే పాన్​లో జీడిపప్పు పలుకులను వేయించుకొని చల్లార్చుకోవాలి. చట్నీలో పల్లీలతో పాటు 'జీడిపప్పు'ను వేసుకోవడం ద్వారా పచ్చడి పర్ఫెక్ట్​గా కుదరడమే కాకుండా టేస్ట్ అద్దిరిపోతుంది.
• ఇప్పుడు అదే కడాయిలో 1 టేబుల్​స్పూన్ నూనె వేసి పచ్చిమిర్చిని వేయించుకోవాలి. ఆపై వాటిని ఒక ప్లేట్​లోకి తీసుకొని చల్లార్చుకోవాలి. ఆలోపు చల్లారిన పల్లీలను పొట్టు తీసుకొని పక్కనుంచాలి.
• అనంతరం మిక్సీ జార్ తీసుకొని అందులో వేయించి పొట్టు తీసుకున్న పల్లీలు, జీడిపప్పు పలుకులు, పచ్చిమిర్చి, వెల్లుల్లి రెబ్బలు, ఉప్పు, నానబెట్టుకున్న చింతపండు ఇలా ఒక్కొక్కటిగా వేసుకోవాలి.
• ఆపై తగినన్ని వాటర్ యాడ్ చేసుకొని మెత్తగా గ్రైండ్ చేసుకొని పక్కనుంచాలి.
• ఇప్పుడు తాలింపుని ప్రిపేర్ చేసుకోవాలి. ఇందుకోసం స్టౌపై కడాయి పెట్టుకొని ఆయిల్ వేసుకోవాలి. నూనె కాస్త వేడయ్యాక జీలకర్ర, ఆవాలు, మినప్పప్పు, శనగపప్పు, ఎండుమిర్చి తుంపలు, కరివేపాకు వేసి పోపుని చక్కగా వేయించుకోవాలి.
• తాలింపు మంచిగా వేగాక దాన్ని ముందుగా ప్రిపేర్ చేసుకున్న పచ్చడిలో వేసుకొని మొత్తం కలిసేలా కలుపుకోవాలి. అంతే, ఎంతో టేస్టీగా ఉండే "పల్లీ చట్నీ" రెడీ!
• దీనితో ఏ టిఫెన్​ తిన్నా సూపర్​గా ఉంటుంది. టిఫెన్​ కన్నా ఎక్కువగా చట్నీనే తినేస్తారు. అంత రుచికరంగా ఉంటుంది ఈ పచ్చడి!