Indian Coast Guard Helicaptor Crashed : ఇండియన్ కోస్ట్గార్డ్కు-ఐసీజీ చెందిన హెలికాప్టర్ ఒకటి గుజరాత్‌లోని పోర్బందర్‌ తీరంలో కుప్పకూలింది. ఈ ప్రమాదంలో ఇద్దరు పైలట్లు సహా ముగ్గురు సిబ్బంది మృతి చెందారు. కోస్ట్గార్డ్ గార్డ్ ఎయిర్‌ ఎన్‌క్లేవ్‌లో ఇది కూలిపోయినట్లు తెలుస్తోంది. ఈ విషయాన్ని ఐసీజీ అధికారులు ప్రకటించారు.
ఈ హెలికాఫ్టర్‌ ప్రయాణం మొదలుపెట్టాక సాంకేతిక సమస్యలను ఎదుర్కొంది. ఆ తర్వాత కొద్దిసేపటికే అది కూలిపోయింది. దీనిపై కోస్టు గార్డు ఇప్పటికే దర్యాప్తు చేపట్టింది.
ఇప్పటికే ఏఎల్హెచ్(అడ్వాన్స్‌డ్ లైట్‌ హెలికాప్టర్) హెలికాప్టర్లలో కీలకమైన రక్షణ చర్యలకు హిందూస్థాన్‌ ఏరోనాటికల్‌ సంస్థ ఇప్పటికే చర్యలు చేపట్టింది. గతేడాది కూడా ఈ శ్రేణికి చెందిన హెలికాఫ్టర్లు ప్రమాదాలకు గురయ్యాయి. డిజైన్‌ సమస్యలు ఉండటం వల్ల చాలా చోట్ల వీటిని వాడటం లేదు.
గతేడాది మార్చి 8న నౌకాదళానికి చెందిన ఏఎల్హెచ్ ధ్రువ్‌ ముంబయి తీరంలో ప్రమాదానికి గురైంది. అందులోని ముగ్గురుని నేవీ పెట్రోలింగ్‌ ఎయిర్‌క్రాఫ్ట్తో రక్షించారు. ఈ ఘటన తర్వాత ఏఎల్హెచ్ హెలికాప్టర్ల వినియోగాన్ని త్రివిధ దళాల్లో నిలిపివేశారు. కొన్నాళ్లకు సైన్యం వీటి సేవలను పునరుద్ధరించింది. అనంతరం కొన్నాళ్లకే మరో హెలికాప్టర్ కూలిపోయింది. అప్పుడు నాడు సాంకేతిక లోపం తలెత్తడం వల్ల జమ్ముకశ్మీర్‌లోని కిశ్త్‌వాడ్‌ జిల్లా అటవీ ప్రాంతంలో అత్యవసరంగా దించేందుకు ప్రయత్నిస్తుండగా ఈ హెలికాప్టర్ కుప్పకూలింది. ఆ ఘటనలో తెలంగాణకు చెందిన టెక్నికల్ నిపుణుడు పబ్బల్ల అనిల్‌(29) మృతి చెందారు.
