ఆంధ్రా స్టైల్ "దొండకాయ రోటి పచ్చడి" - ఇలా చేస్తే అదిరిపోద్ది - వేడి వేడి అన్నంలో కేక! - Dondakaya Roti Pacchadi

Dondakaya Chutney Recipe : వేడి వేడి అన్నంలోకి కమ్మని రోటి పచ్చడి ఉంటే.. ఒక రెండు ముద్దలు ఎక్కువే తింటాం. అయితే.. చాలా మంది టమాటాలతోనే రోటి పచ్చడి చేస్తుంటారు. కానీ, దొండకాయలతో ట్రై చేశారంటే.. ప్రతిసారీ ఇదే చేసుకుంటారు! మరి.. ఈ రెసిపీని ఎలా చేయాలో ఇప్పుడు చూద్దాం.

Andhra Style Dondakaya Roti Pacchadi : మధ్యాహ్నం భోజనంలోకైనా.. రాత్రి చపాతీలలోకైనా.. కొంతమందికి సైడ్‌ డిష్‌గా రోటి పచ్చడి ఉండాల్సిందే! అయితే.. రోటి పచ్చడి అనగానే అందరికీ టమాటాలతో చేసిన పచ్చడి మాత్రమే గుర్తొస్తుంది. కానీ.. ప్రతిసారీ అదే తింటే రొటీన్ అయిపోతుంది. అందుకే మీకోసం ఈ సారి ఓ సరికొత్త రోటి పచ్చడి తెచ్చాం. అదే.. ఆంధ్ర స్టైల్‌ "దొండకాయ రోటి పచ్చడి". ఈ పచ్చడి చేశారంటే.. ఇంట్లో వాళ్లందరూ రోజూ తినేదానికంటే మరింత ఎక్కువగా అన్నం తినేస్తారు. అంత బాగుంటుందీ పచ్చడి. మరి.. ఈ దొండకాయ రోటి పచ్చడిని ఎలా ప్రిపేర్‌ చేయాలో ఇప్పుడు చూద్దాం.

కావాల్సిన పదార్ధాలు :

• దొండకాయలు- పావు కేజీ
• పచ్చిమిర్చి-15
• చింతపండు- కొద్దిగా
• నూనె- సరిపడినంత
• కొత్తిమీర- సరిపడా
• ఉప్పు- రుచికి సరిపడా
• మెంతులు
• ఆవాలు
• మినపప్పు
• శనగపప్పు
• జీలకర్ర
• కరివేపాకు-2 రెమ్మలు
• ఎండుమిర్చి-2
• ఇంగువ- అర టీస్పూన్‌

దొండకాయ పచ్చడి తయారీ విధానం :

• ముందుగా పాన్‌లో కొద్దిగా ఆయిల్‌ వేసుకుని అందులో మెంతులు, ఆవాలు వేసి వేపుకోవాలి. మెంతులను ఎర్రగా వేపుకోవడం వల్ల పచ్చడి చేదుగా ఉండదు. కాబట్టి, ఎర్రగా వేపుకోండి.
• తర్వాత టేబుల్‌స్పూన్‌ మినపప్పు, శనగపప్పు, జీలకర్ర కొద్దిగా, కరివేపాకు రెమ్మ ఒకటి వేసి ఫ్రై చేసుకోండి.
• ఈ మిశ్రమం పూర్తిగా చల్లారిన తర్వాత.. రోట్లో వేసుకుని మెత్తగా నూరుకోవాలి.
• తర్వాత అదే పాన్​లో కొద్దిగా ఆయిల్‌ వేసి చిన్నగా కట్‌ చేసుకున్న దొండకాయలు, పచ్చిమిర్చి వేసుకుని బాగా కలుపుకోండి. అలాగే మూత పెట్టి మగ్గించండి.
• దొండకాయలు మగ్గిన తర్వాత కొద్దిగా చింత పండు వేసుకుని బాగా కలపండి. తర్వాత ఈ మిశ్రమాన్ని పూర్తిగా చల్లారనివ్వండి.
• ఈ ఫ్రై చేసుకున్న దొండకాయలను, ముందుగా సిద్ధం చేసుకున్న ఆవాలు, మెంతుల పేస్ట్‌ను రోటిలో వేసి మెత్తగా పేస్ట్‌ చేసుకోండి.
• ఇప్పుడు తాలింపు కోసం ఒక గిన్నెలో ఆయిల్‌ వేసి ఆవాలు, జీలకర్ర, రెండు ఎండు మిర్చి, శనగపప్పు, మినపప్పు, ఇంగువ వేసి తాలింపుని మెత్తగా పేస్ట్‌ చేసుకున్న దొండకాయల మిశ్రమంలో వేసుకోండి.
• తర్వాత పచ్చడిలో రుచికి సరిపడా ఉప్పు, కొద్దిగా కొత్తిమీర వేసుకుంటే సరిపోతుంది.
• అంతే ఇలా సింపుల్‌గా చేస్తే.. నోరూరించే దొండకాయ రోటి పచ్చడి రెడీ.
• ఇంత ఈజీగా తయారైపోయే దొండకాయ రోటి పచ్చడిని మీరు కూడా తప్పకుండా ఓ సారి ట్రై చేయండి. ఇంటిల్లిపాదీ ఎంతో ఇష్టంగా ఆరగించండి.

ఇవి కూడా చదవండి :