మెట్రో రైలులో రాష్ట్రపతి- విద్యార్థులతో కోహ్లీ గురించి ముచ్చట్లు! - President Travelled In Metro Train

Draupadi Murmu In Delhi Metro : దేశ ప్రథమ పౌరురాలు రాష్ట్రపతి ద్రౌపదీ ముర్ము దిల్లీ మెట్రో రైలులో ప్రయాణించారు. భారీ సెక్యూరిటీ నడుమ ఆమె బుధవారం ఉదయం మెట్రో ట్రైన్​ ఎక్కారు. డార్క్​ ఎల్లో కలర్​ శారీపై చాక్లెట్​ కలర్​ స్వెటర్​ను ధరించి ఆమె వీడియోలో కనిపించారు. మెట్రో అధికారులు, సిబ్బందితో కలిసి ఆమె కాసేపు మాట్లాడారు. ట్రైన్​లో కల్పిస్తున్న సౌకర్యాలపై ఆమె వివరాలను అడిగి తెలుసుకున్నారు. అనంతరం నగరంలోని ఓ పాఠశాల విద్యార్థుల బృందంతో ద్రౌపది సరదాగా ముచ్చటించారు.

ఈ సందర్భంగా కొందరు విద్యార్థినులు పాటలు పాడారు. వారిని ఆమె ప్రశంసించారు. అలా మెట్రో పరుగులు తీస్తుండగానే పక్కనే కూర్చున్న కొందరు విద్యార్థినులను మీరు పెద్దయ్యాక ఏం కావాలి అని అనుకుంటున్నారు అని అడిగారు ముర్ము. చాలా మంది విద్యార్థినులు డాక్టర్​ అవ్వడం తమ గోల్​ అని బదులిచ్చారు. కాగా, మరో విద్యార్థిని అదే ప్రశ్న అడగ్గా తాను క్రికెటర్​ను అవ్వాలనుకుంటున్నా అని సమాధానిమిచ్చాడు. ఈ క్రమంలో తన నోటి వెంట స్టార్ క్రికెటర్​ విరాట్ కోహ్లీ పేరును ప్రస్తావించారు రాష్ట్రపతి. పెద్దయ్యాక నీవు కూడా విరాట్​ కంటే ఎక్కువ పరుగులు సాధించాలని విద్యార్థితో సరదాగా నవ్వుతూ అన్నారు. ఇక కొందరు విద్యార్థులు పరీక్షల ఒత్తిడి నుంచి ఎలా బయట పడాలి అని అడిగిన ప్రశ్నలకు ఆమె పలు సలహాలు, సూచనలు ఇచ్చారు.