ప్రాణం తీసిన పందెం - టపాసుల బాక్స్ పేలి యువకుడు మృతి - వీడియో వైరల్!

Youth Dies After Sitting On Firecracker Box : అతి సర్వత్రా వర్జయేత్‌ అనే విషయాన్ని నిజం చేస్తూ, బెంగళూరుకు చెందిన ఓ వ్యక్తి ప్రాణాలు కోల్పోయాడు. 32 ఏళ్ల శబరీష్‌ అనే వ్యక్తి తోటివారితో పందెం కాసి టపాసుల బాక్స్​పై కూర్చుని ప్రాణాలు పోగొట్టుకున్నాడు. దీపావళి రోజున ఫూటుగా తాగిన మందు బాబులు, టపాసులు కాల్చేందుకు రోడ్డు పైకి వచ్చారు. ఈ క్రమంలోనే టపాసుల బాక్స్​పై కూర్చోవాలని శబరీష్‌కు స్నేహితులు పందెం విసిరారు. వారి ఛాలెంజ్‌ను స్వీకరించిన శబరీష్‌ ఆ పెట్టెపై కూర్చున్నాడు. టపాసుల బాక్స్​కు నిప్పు అంటి స్నేహతులు దూరంగా వెళ్లిపోయారు. కానీ బాంబు భారీ శబ్దంతో పేలింది. దీంతో ఒక్కసారిగా పెట్టెపై నుంచి శబరీష్‌ ఎగిరిపడ్డాడు. ఒక్క క్షణం కూర్చోని చుట్టూ చూసిన శబరీష్​ మరుక్షణం నేలపైవాలిపోయాడు. ఆసుపత్రికి తరలించినప్పటికీ అతని ప్రాణాలు మాత్రం దక్కలేదు. ఈ ఘటనపై కేసు నమోదు చేసిన పోలీసులు, పందెం కాసిన ఆరుగురు వ్యక్తులను అదుపులోకి తీసుకున్నారు. పేలుడు ధాటికి అంతర్గత అవయవాలు దెబ్బతినడం వల్లనే శబరీష్​ ప్రాణాలు కోల్పోయినట్లు ప్రాథమికంగా తెలుస్తోందని పోలీసులు తెలిపారు.