Israeli Attack On Lebanon : హెజ్బొల్లా-ఇజ్రాయెల్ మధ్య కాల్పుల ఒప్పందం ఉల్లంఘనకు గురైంది. దక్షిణ లెబెనాన్‌లో ఆదివారం ఇజ్రాయెల్ దళాలు జరిపిన కాల్పుల్లో ఆరుగురు మహిళలు సహా 22మంది పౌరులు ప్రాణాలు కోల్పోయారు. 124మందికి పైగా గాయాలపాలయ్యారు. ఈ దాడిలో దాదాపు 20 సరహద్దు గ్రామాలకు చెందిన పౌరులకు గాయాలయ్యాయి.
కాల్పుల విరమణ ఒప్పందం ప్రకారం దక్షిణ లెబెనాన్‌ నుంచి ఇజ్రాయెల్ సైన్యం వైదొగాలి. కానీ, గడువు దాటినా ఇంకా నెతాన్యాహు తమ దళాలను ఉపసంహరించలేదు. ఈ నేపథ్యంలో వేలాది ప్రజలు తమ గ్రామాలకు, పట్టణాలకు ఆదివారం తిరిగివచ్చారు. ఇదే సమయంలో కొందరు హెజ్బొల్లా జెండాలు పట్టుకొని ఇజ్రాయెల్ దళాలు ఉన్న ప్రాంతాల్లోకి ప్రవేశించడానికి యత్నించగా, ఐడీఎఫ్‌ కాల్పులు జరిపింది.
ఇజ్రాయెల్ ఇంకా కొన్ని రోజులు లెబనాన్లోనే ఉండాలనుకుంటోంది. దక్షిణ లెబనాన్లోని కొన్ని ప్రాంతాల్లో హెజ్బొల్లా మళ్లీ తమ స్థావరాలను ఏర్పాటు చేసుకోకుండా చూడటానికి లెబనీస్ ఆర్మీని ఇంకా మోహరించలేదని ఇజ్రాయెల్ చెబుతోంది. అందుకే తాము ఇంకా కొన్ని రోజులు లెబనాన్లోనే ఉండాల్సిన అవసరం ఉందని చెప్పింది.
ఆదివారం నిరసనలను హెజ్బొల్లా రెచ్చగొట్టిందని ఇజ్రాయెల్ ఆరోపించింది. కొన్ని ప్రాంతాల్లో తమ దళాలు ఉన్న వద్దకు వస్తున్న అనుమానితులను బెదిరించడానికి హెచ్చరికగా కాల్పులు జరిపినట్లు తెలిపింది. అందులో కొందరిని అరెస్ట్ చేసి విచారిస్తున్నామని వెల్లడించింది. ఇజ్రాయెల్ కాల్పులతో ఆ ప్రాంతంలో అనిశ్చితి నెలకొంది. దీంతో ఉత్తర గాజాలోని వేలాది మంది పాలస్తీనియన్లు వారి ఇళ్లకు తిరిగిరాలేకపోయారు.
'ఇక ఆపండి- రూల్స్ ఫాలో అవ్వండి'
కాల్పుల విరమణ ఒప్పందాన్ని ఇజ్రాయెల్, లెబనాన్ పాటించాలని లెబనాన్ కోసం నియమించిన ఐరాస స్పెషల్ కోఆర్డినేటర్ జీనిస్ హెన్నిస్ ప్లాస్చెర్ట్, ఐరాస పీస్కీపింగ్ ఫోర్స్ విభాగ అధిపతి లెఫ్టినెంట్ జనరల్ ఆరోల్డో ఎల్ జారో కోరారు. ఈ మేరకు సంయుక్త ప్రకటన విడుదల చేశారు. నవంబర్లో చేసి ఒప్పందంలోని అంశాలు ఇక నెరవేరలేదని చెప్పారు.
అమెరికా-ఫ్రాన్స్‌ మధ్యవర్తిత్వంతో కాల్పుల విరమణకు నవంబరులో ఇజ్రాయెల్-హెజ్బొల్లా ఒప్పందం చేసుకున్నాయి. దీని ప్రకారం తమ దళాలను 30రోజుల్లో ఉపసంహరించుకోవాలి. కానీ, ఇజ్రాయెల్ వైదొలగడానికి మరింత సమయం కోరుతోంది.
