కస్టమర్లకు షాకిచ్చిన జొమాటో- ఇకపై ఆ సర్వీసులు రద్దు! - Zomato Legends Service Shuts Down

Zomato Legends Service Shuts Down: ప్రముఖ ఆన్​లైన్ ఫుడ్ డెలివరీ సంస్థ జొమాటో తన కస్టమర్లకు షాక్ ఇచ్చింది. ఇకపై తన ఇంటర్‌సిటీ ఫుడ్‌ డెలివరీ సర్వీసులను నిలిపివేస్తున్నట్లు ప్రకటించింది. ఈ మేరకు జొమాటో సహ వ్యవస్థాపకుడు, సీఈవో దీపిందర్ గోయల్ తన ఎక్స్ ఖాతాలో ట్వీట్ ద్వారా వెల్లడించారు.

Zomato Legends Service Shuts Down:ప్రస్తుత కాలంలో బయట ఫుడ్ తినేవారి సంఖ్య భారీగా పెరిగిపోయింది. ఇందుకోసం నేరుగా రెస్టారెంట్లకు వెళ్లకుండా ఆన్​లైన్​లో ఫుడ్ ఆర్డర్ చేసుకుని తెప్పించుకునేందుకు అంతా అలవాటు పడిపోయారు. తీరక లేకుండా పని చేసేవాళ్లు, వండుకునేందుకు సమయం లేక మరికొందరు స్విగ్గీ, జొమాటో వంటి ఫుడ్ డెలివరీ సంస్థల యాప్​లను ఆశ్రయిస్తున్నారు. అయితే అలాంటి కస్టమర్లకు ప్రముఖ ఫుడ్ డెలివరీ యాప్ జొమాటో బ్యాడ్ న్యూస్ చెప్పింది. తన ఇంటర్‌సిటీ ఫుడ్‌ డెలివరీ సర్వీసులను రద్దు చేస్తున్నట్లు జొమాటో సహ వ్యవస్థాపకుడు, సీఈవో దీపిందర్ గోయల్ వెల్లడించారు.

ఏంటీ ఇంటర్ సిటీ లెజెండ్స్ సర్వీస్?:

• వ్యాపారుల నుంచి పార్సిల్స్ సేకరించి కస్టమర్లకు అందజేయడమే లక్ష్యంగా ఈ ఇంటర్ సిటీ లెజెండ్స్ సర్వీస్ లాంచ్ అయ్యింది.
• దేశవ్యాప్తంగా ఉన్న 10 సిటీల్లోని ఫేమస్ వంటకాలను వివిధ ప్రాంతాలకు డెలివరీ చేస్తారు.
• కస్టమర్ కోరుకున్న రెసిపీస్​ను 24 గంటల్లో ఒక సిటీ నుంచి మరొక సిటీకి ఫ్లైట్ ద్వారా డోర్ డెలివరీ చేసే వెసులుబాటు ఉంది.
• రాత్రి 7 గంటల లోపు ఆర్డర్ చేస్తే కస్టమర్ కోరుకున్న ఫుడ్​ని రెస్టారెంట్​లో ప్రిపేర్ చేయించి రీయూజబుల్ టాంపర్ ప్రూఫ్ కంటైనర్​లో ప్యాక్ చేస్తారు.
• కస్టమర్లు ఆర్డర్ చేసిన ఫుడ్ పాడవకుండా ఉండడం కోసం ప్రిజర్వేటివ్స్ యాడ్ చేయడం గానీ, ఫ్రీజింగ్ చేయడం గానీ చేయరు.
• మొబైల్ రిఫ్రిజిరేషన్ టెక్నాలజీని వాడి ఫుడ్​ని పాడవకుండా చూస్తారు. కస్టమర్ ఫుడ్ పార్సిల్​ని అందుకున్న తర్వాత మైక్రోవేవ్​, ఎయిర్ ఫ్రై, పాన్ ఫ్రై గానీ చేసుకుని వేడి వేడిగా తినొచ్చు.

ఈ సేవలను ఎందుకు నిలిపివేసింది?:

• జొమాటో సంస్థ ఇంటర్ సిటీ లెజెండ్స్ సర్వీస్​ను 2022లో లాంచ్ చేసింది.
• అయితే ఈ సర్వీస్‌ను ఉపయోగించుకోవాలంటే కనీసం రూ.5వేల విలువ చేసే ఫుడ్‌ను ఆర్డర్ చేయాలి.
• ప్రారంభంలో కనీస ఆర్డర్ విలువ రూ.5వేలు ఉంటే లాభం ఉంటుందని సంస్థ అనుకుంది.
• కానీ ఇది ఆశించినంత మేర ఫలితాలను ఇవ్వలేదు. అంత మొత్తంలో విలువైన ఆర్డర్స్ రాలేదు.
• దీంతో ఈ సర్వీస్​ను ఏప్రిల్‌ నుంచి కొన్నాళ్లు హోల్డ్​లో పెట్టిన సంస్థ మళ్లీ ఇటీవలే జులైలో తిరిగి ప్రారంభించింది.
• అయినప్పటికీ దీనివల్ల లాభాలు లేకపోవటంతో మొత్తానికే ఈ సర్వీస్​ను నిలిపివేస్తున్నట్లు ప్రకటించింది.