How To Fix Phone Overheating Issue :దేశంలో ఎండలు భగభగమంటున్నాయి. ఆల్ టైమ్ గరిష్ఠానికి ఉష్ణోగ్రతలు చేరుకుంటున్నాయి. ఈ నేపథ్యంలో మనుషులకే కాదు స్మార్ట్ ఫోన్లకు కూడా ఎండ దెబ్బ తగులుతోంది. ఎండ వేడిమికి స్మార్ట్ ఫోన్లు వేడెక్కిపోతున్నాయి. దీంతో బ్యాటరీ పనితీరు దెబ్బతింటుంది. పైగా దాని లైఫ్ కూడా తగ్గిపోతుంది. అందుకే మీ స్మార్ట్ ఫోన్ వేసవిలో వేడెక్కకుండా, కూల్గా ఉండాలంటే ఏం చేయాలో ఇప్పుడు తెలుసుకుందాం.
1. సూర్యకాంతిలో ఫోన్ను వాడకండి
మీ ఫోన్ను సూర్యకాంతిలో ఎక్కువగా వాడొద్దు. ఒకవేళ ఎండలో ఉంచితే మీ స్మార్ట్ ఫోన్ త్వరగా వేడెక్కుతుంది. ఫోన్ బ్రైట్ నెస్ను కూడా తగ్గించండి. అప్పుడే ఫోన్ వేడెక్కకుండా ఉంటుంది.
2. ఛార్జింగ్ పెట్టేటప్పుడు ఫోన్ కవర్ను తీసేయండి
ప్రస్తుత కాలంలో చాలా స్మార్ట్ ఫోన్లు గంటలోపే 0 నుంచి 100 శాతం వరకు ఛార్జ్ అవుతున్నాయి. కొన్ని స్మార్ట్ ఫోన్లు కేవలం రెండు నిమిషాల్లోనే ఫుల్ ఛార్జింగ్ అవుతున్నాయి. ఫాస్ట్ ఛార్జింగ్ సౌకర్యవంతంగా ఉన్నప్పటికీ, దాని వల్ల ఫోన్ వేడెక్కిపోయే ప్రమాదం కూడా ఉంది. అందుకే ఛార్జింగ్ పెట్టినప్పుడు మీ ఫోన్ కవర్ను తీసేయండి.
3. వేడి వాతావరణంలో గేమ్స్ ఆడకండి
వేసవికాలంలో ఆరుబయట లేదా వేడి గదుల్లో ఎక్కువసేపు వీడియో గేమ్లను ఆడితే స్మార్ట్ ఫోన్ వేడెక్కే ప్రమాదం ఉంది. మీరు కనుక ఏసీ రూమ్లో వీడియో గేమ్స్ ఆడుకోవడం వల్ల మీ ఫోన్ వేడెక్కదు.
4. ఫోన్ బ్రైట్ నెస్ను తగ్గించుకోండి
మీ ఫోన్ బ్రైట్ నెస్ను తగ్గించుకోండి. లేదంటే మీ ఫోన్ హీట్ ఎక్కే ప్రమాదం ఉంది.
5. జీపీఎస్ను ఆఫ్ చేయండి
చాలా మంది ఫోన్ను కారు డాష్ బోర్డులో ఉంచుతారు. కారును నావిగేట్ చేయడానికి గూగుల్ మ్యాప్స్ వంటి యాప్స్ను వాడుతారు. అయితే వైఫై, బ్లూటూత్, జీపీఎస్ వంటి నావిగేషన్ యాప్స్ వాడడం వల్ల ఫోన్ వేడెక్కుతుంది. ఈ వేడిని తగ్గించడానికి డ్రైవింగ్ చేసేటప్పుడు మీ ఫోన్ ను ఏసీ వెంట్ పక్కన ఉంచండి. మీరు బైక్లో వెళ్తుంటే బ్యాగ్ లేదా జేబులో ఫోన్ను ఉంచుకోండి.