పారిపోయిన ప్రేమజంట - పెళ్లి చేస్తామని ఇంటికి పిలిపించాక ఏమైందంటే!

ప్రేమ వివాహం ఇష్టం లేని అమ్మాయి కుటుంబ సభ్యుల ఘాతుకం - కత్తులు, సర్జికల్‌ బ్లేడ్లతో విచక్షణారహితంగా దాడి

YOUTH KILLED IN THE NAME OF MARRIAGE: ఇంటి ముందు కూర్చున్న ఓ యువకుడిని గుర్తుతెలియని దుండగులు దారుణంగా హత్యచేసిన ఘటన హైదరాబాద్​లోని బోయిన్‌పల్లి పోలీస్‌స్టేషన్‌ పరిధిలో కలకలం సృష్టించింది. కేసు వివరాలను ఇన్‌స్పెక్టర్‌ లక్ష్మీనారాయణరెడ్డి, ఎస్సై శివశంకర్‌ వెల్లడించారు. ఓల్డ్‌ బోయిన్‌పల్లి అలీ కాంప్లెక్స్‌ దగ్గరలో నివసించే మహమ్మద్‌ సమీర్‌ (25) వెల్డింగ్‌ పని చేస్తుంటాడు.

అస్సాంకు వెళ్లి ప్రేమ వివాహం: గత సంవత్సరం నాచారంలో ఓ భవనానికి సంబంధించి వెల్డింగ్‌ పని చేయడానికి వెళ్లిన సమీర్‌ అదే బిల్డింగ్ యజమాని కుమార్తెను ప్రేమించాడు. ఆ అమ్మాయిని తీసుకొని ఈ సంవత్సరం జనవరిలో అస్సాంకు వెళ్లి ప్రేమ వివాహం చేసుకున్నాడు. ఇద్దరూ అక్కడే 20 రోజులపాటు ఉన్నారు.

పెళ్లి చేస్తామంటూ నమ్మించి:ఈ వివాహం ఇష్టం లేది అమ్మాయి కుటుంబసభ్యులు, వారికి వివాహం చేస్తామటూ నమ్మించారు. వారిని హైదరాబాద్​ వచ్చేలా చేశారు. అనంతరం అమ్మాయిని తీసుకెళ్లి ఆమెకు మరో వ్యక్తితో ఎంగేజ్మెంట్ చేశారు. దీనిని సమీర్‌ అడ్డుకునే ప్రయత్నం చేసినట్లు ప్రాథమిక విచారణలో తేలింది.

కత్తులు, బ్లేడ్లతో విచక్షణారహితంగా దాడి:తాజాగా ఈ నెల 21వ తేదీన అర్ధరాత్రి దాటాక సమీర్‌ ఆరుబయట కూర్చున్న సమయంలో ద్విచక్రవాహనాలపై వచ్చిన దుండగులు కత్తులు, సర్జికల్‌ బ్లేడ్లతో విచక్షణారహితంగా దాడిచేసి హతమార్చారు. ఈ సమయంలో ఒకరి కత్తికి సంబంధించిన కవర్‌ పోలీసులకు చిక్కింది. దాడికి పాల్పడ్డ దుండగులు మాస్కులు ధరించి ఉన్నారని, ప్రతిఘటించిన సందర్భంలో తమపై సైతం దాడి చేశారని ఈ ఘటనకు సంబంధించిన ప్రత్యక్ష సాక్షులు చెప్పారు.

తాళాలు వేసుకుని వెళ్లిపోయిన అమ్మాయి కుటుంబసభ్యులు: డీసీపీ సాధనా రేష్మీ పెరుమాళ్, ఏసీపీలు సర్దార్‌, కృష్ణమూర్తి ఘటనా స్థలాన్ని పరిశీలించారు. ఘటన జరిగిన కొద్దిసేపటికే అమ్మాయి కుటుంబసభ్యులు తమ ఇంటికి తాళాలు వేసుకుని వెళ్లిపోయిన నేపథ్యంలో వారే ఈ ఘాతుకానికి పాల్పడి ఉంటారని పోలీసులు భావిస్తున్నారు. ఈ ఘటనలో ఇద్దరు వ్యక్తులను అదుపులోకి తీసుకొని దర్యాప్తు చేస్తున్నట్లు తెలుస్తోంది.