Vijayawada Book Fair 2025 : విజయవాడలో పుస్తక మహోత్సవానికి వేళయ్యింది. ఈ పుస్తక మహోత్సవం మూడున్నర దశాబ్దాల మైలురాయిని ఘనంగా దాటనుంది. ఏటా సంక్రాంతికి ముందు జరిగే అతిపెద్ద పండగ పుస్తక మహోత్సవమే. ఈ ఏడాది 35వ పుస్తక మహోత్సవానికి పెద్దఎత్తున సన్నాహాలు చేస్తున్నారు. దీనికి నగరం మధ్యలో ఉన్న ఇందిరాగాంధీ మున్సిపల్‌ మైదానం వేదిక కావడంతో నిర్వాహకులు, పుస్తక ప్రియుల్లోనూ నూతనోత్సాహం సంతరించుకుంది. ఇప్పటికే 200కు పైగా ప్రచురణ సంస్థలు స్టాళ్ల ఏర్పాటుకు పేర్లు నమోదు చేసుకున్నట్లు సమాచారం.
జనవరి 2 నుంచి 12 వరకూ రోజూ మధ్యాహ్నం 2 గంటల నుంచి రాత్రి 8.30 గంటల వరకూ పుస్తక ప్రదర్శన కొనసాగుతుంది. తొలిరోజు సాయంత్రం ఐదు గంటలకు ఉపముఖ్యమంత్రి పవన్ కల్యాణ్ ఈ పుస్తక మహోత్సవాన్ని లాంఛనంగా ప్రారంభించనున్నారు. వారితో పాటు కేెంద్ర సాహిత్య అకాడమీ కార్యదర్శి కె. శ్రీనివాస్ పాల్గొంటారు.
'విజయవాడ, గుంటూరు, మచిలీపట్నం, ఏలూరు సహా చుట్టుపక్కల అన్ని ప్రాంతాల నుంచి పుస్తక ప్రియులు వేల సంఖ్యలో నిత్యం తరలి వస్తుంటారు. 11 రోజుల్లో కనీసం 10 లక్షల మంది పుస్తకప్రియులు ఏటా తరలివస్తుంటారు. ఈ మహోత్సవంలో పుస్తకాలు కొనుక్కునేందుకు ఏడాదంతా డబ్బులు దాచుకుని మరీ చాలామంది వస్తారు.' - మనోహర్‌నాయుడు, పుస్తక మహోత్సవం కార్యదర్శి
పుస్తక మహోత్సవం ప్రాంగణం, వేదికలకు దివంగతులైన ప్రముఖుల పేర్లు పెడుతున్నట్లు నిర్వాహకులు తెలిపారు.
రామకోటేశ్వరరావు ప్రాంగణం: పుస్తక ప్రదర్శన ప్రాంగణానికి పిడికిటి రామకోటేశ్వరరావు పేరు పెట్టారు. ఈయన సాహితీ నవజీవన్‌ బుక్‌లింక్స్‌ అధినేత.
రామోజీరావు సాహిత్య వేదిక: ప్రధాన సాహిత్య వేదికకు రామోజీ గ్రూప్‌ సంస్థల అధినేత చెరుకూరి రామోజీరావు పేరు పెట్టారు. ఈ వేదికపై పుస్తకావిష్కరణలు, శత జయంతి సభలు, చర్చాగోష్ఠులు, సభలు జరుగుతాయి.
రతన్‌టాటా ప్రతిభా వేదిక: ప్రాంగణంలో ఉండే ప్రతిభా వేదికకు రతన్‌టాటా పేరు పెట్టారు. పిల్లలకు సంబంధించిన ప్రదర్శనలు, కార్యక్రమాలు ఈ వేదికపై జరుగుతుంటాయి.
గుడ్ న్యూస్: హైదరాబాద్ బుక్ ఫెయిర్ ప్రారంభం- ఇక పది రోజులు పుస్తక ప్రియులకు పండగే!
పుస్తక ప్రియుల పాదయాత్ర : నేటి తరానికి పఠనంపై ఆసక్తి పెంచేందుకు ఏటా నగరంలో నిర్వహించే పుస్తక ప్రియుల పాదయాత్రను జనవరి 6న సాయంత్రం 4 గంటలకు నిర్వహిస్తున్నారు. మొగల్రాజపురంలోని సిద్ధార్థ కళాశాల నుంచి ఆరంభించి.. పుస్తక మహోత్సవ ప్రాంగణానికి పాదయాత్ర చేరుకుంటుంది. సాహితీ ప్రముఖులు, పుస్తక ప్రియులు పాల్గొంటారు.
ప్రతి పుస్తకంపైనా 10శాతం రాయితీ : పుస్తక ప్రదర్శనలో ఉండే స్టాళ్లలో ప్రతి పుస్తకంపై తప్పనిసరిగా 10శాతం రాయితీ ఇస్తారు. పుస్తక మహోత్సవం నిబంధన ప్రకారం ప్రతి పుస్తకంపైనా రాయితీ ఉంటుంది. ప్రదర్శనకు వచ్చే వారందరికీ ప్రవేశం ఉచితం. ఎలాంటి రుసుము ఉండదు.
పుస్తక ప్రియులకు శుభవార్త.. 200 స్టాళ్లు.. లక్షల పుస్తకాలు..
