Dosa Premix Powder Recipe: ప్రస్తుత కాలంలో మార్కెట్లో ఇడ్లీ, దోశ, వడ మిక్స్ పౌడర్స్ చాలా లభిస్తున్నాయి. ఉదయాన్నే బ్రేక్ఫాస్ట్ చేయడానికి ఎక్కువ టైమ్లేని చాలా మంది వీటిని కొనుగోలు చేసి వినియోగిస్తున్నారు. అయితే, కొన్ని టిప్స్ పాటిస్తూ చేస్తే బయట కొనే అవసరం లేకుండా ఇంట్లోనే దోశ మిక్స్ పౌడర్ ప్రిపేర్ చేసుకోవచ్చు. ఇప్పుడు దోశ మిక్స్ పౌడర్ సింపుల్గా ఎలా చేసుకోవాలో చూద్దాం. ఈ స్టోరీలో చెప్పిన కొలతలతో దోశ మిక్స్ పౌడర్ రెడీ చేసుకుంటే ఎప్పుడైనా కమ్మటి దోశలను తయారు చేసుకోవచ్చు. మరి ఇక లేట్ చేయకుండా దోశ మిక్స్ పౌడర్ ఎలా చేయాలో మీరు కూడా తెలుసుకోండి.
కావాల్సిన పదార్థాలు :
- బియ్యం - అరకేజీ
- మినప్పప్పు - పావుకేజీ
- అటుకులు - పావు కప్పు
- పచ్చిశనగపప్పు - పావు కప్పు
- మెంతులు - టేబుల్స్పూన్
తయారీ విధానం :
- ఇందుకోసం ముందుగా స్టవ్పై కడాయి పెట్టుకొని మినప్పప్పు వేసి కాసేపు వేపుకోవాలి. మినప్పప్పు రంగు మారకుండానే వేపి ఒక ప్లేట్లోకి తీసుకోండి.
- ఆపై అదే పాన్లో బియ్యం వేసి వేపుకోండి. బియ్యం కూడా రంగు మారకుండానే కాసేపు వేపి పక్కనకు తీసుకోవాలి.
- అదే పాన్లో పచ్చిశనగపప్పు వేసి ఫ్రై చేసుకోవాలి. అనంతరం అటుకులు, మెంతులు వేసి వేపి ఒక ప్లేట్లోకి తీసుకోవాలి. ఈ మిశ్రమాన్ని పూర్తిగా చల్లార్చుకోవాలి.
- అనంతరం మిక్సీ జార్ తీసుకొని అందులో వేయించి చల్లార్చుకున్న మినప్పప్పు, అటుకులు, బియ్యం మిశ్రమం వేసి మెత్తని పొడిలా గ్రైండ్ చేసుకోవాలి.
- గ్రైండ్ చేసుకున్న పిండిని ఒకసారి జల్లించి మరోసారి మిక్సీ పట్టుకోవాలి. అప్పుడే దోశ మిక్స్ పౌడర్ మెత్తగా వస్తుంది.
- ఈ దోశ మిక్స్ పౌడర్ పూర్తిగా చల్లారిన తర్వాత ఎయిర్టైట్ కంటైనర్లో స్టోర్ చేసుకుంటే సరిపోతుంది. ఈ పిండి రెండు నెలల వరకు నిల్వ ఉంటుంది.
- ఈ దోశ మిక్స్ పౌడర్తో మీరు పిండి పులియబెట్టి, అలాగే ఇన్స్టంట్గానూ దోశలు వేసుకోవచ్చు.
- ఇక మీరు ఎప్పుడైన దోశలు వేసుకోవాలనుకుంటే అప్పుడు ఒక మిక్సింగ్ బౌల్లో రెండు కప్పుల దోశ మిక్స్, కొద్దిగా వంటసోడా, ఉప్పు, సరిపడా వాటర్ యాడ్ చేసుకొని చక్కగా కలుపుకుంటే దోశ బ్యాటర్ రెడీ అయిపోతుంది.
- ఈ పిండితో మీరు క్రిస్పీగా దోశలు రెడీ చేసుకోవచ్చు.
- అలాగే మీరు ఈ పిండిని కలిపి రాత్రంతా పులియబెట్టి కూడా ఉదయాన్నే దోశలు వేసుకోవచ్చు. ఇలా వేసుకుంటే వంట సోడా వేసుకోవాల్సిన అవసరం ఉండదు.
- అంతే ఈ దోశ మిక్స్ పౌడర్ ఉంటే క్షణాల్లోనే క్రిస్పీ దోశలు రెడీ!
- మరి దోశ మిక్స్ పౌడర్ నచ్చితే మీరు ఓసారి ఇంట్లో చేసుకోండి!
రేషన్ బియ్యంతో మెత్తని దూదిలాంటి ఇడ్లీలు - రవ్వ కొనాల్సిన అవసరమే లేదు!
"బొంబాయి రవ్వతో గుంత పొంగనాలు" - ఇంట్లో ఇలా చేస్తే ఒక్కటి కూడా మిగలదు!
