Sankranti Cyber Criminals Trap : సంక్రాంతి పండుగ సందర్భంగా షాపింగ్‌ చేయండి. పండుగ రోజు ఉచితంగా మొబైల్‌ రీఛార్జ్‌ చేసుకోండి. ఊహించని విలువైన బహుమతులను సొంతం చేసుకోండి. ఇలా మీ ఫోన్, వాట్సాప్‌ నెంబర్లకు వచ్చిన మెసేజ్‌లు చూసి ఆశపడితే మీ బ్యాంకు ఖాతాల్లో ఉన్న సొమ్మంతా గల్లంతైనట్టేనని హైదరాబాద్‌ నగర సైబర్‌క్రైమ్‌ పోలీసులు వినియోగదారులను హెచ్చరిస్తున్నారు. ఈ-కామర్స్‌ ఆన్‌లైన్‌ వెబ్‌సైట్లు, రాష్ట్ర, కేంద్ర ప్రభుత్వాల పేరుతో వచ్చే ఫేక్‌ లింకులను క్లిక్ చేయవద్దంటున్నారు.
బాధితులు వెంటనే 1930కు ఫిర్యాదు చేయాలని తెలంగాణ పోలీసులు సామాజిక మాధ్యమాల్లో అవగాహన కల్పిస్తున్నారు. సైబర్ నేరగాళ్లు ఏ అవకాశాన్నీ వదలట్లేదు. సంక్రాంతి సంబరాల్లో ఆనందాలను ఆస్వాదించమంటూ లింకులు పంపి అమాయకుల జేబుకు చిల్లు పెట్టారు. ఖరీదైన హోటల్‌లో విందు వినోదాలంటూ, 50 శాతం రాయితీ అంటూ హైదరాబాద్‌కు చెందిన ఓ వ్యాపారి కుటుంబానికి రూ.1.50 లక్షల టోపీ పెట్టారు.