ఊరెళ్లిన అమ్మానాన్నల కోసం పిల్లల ఎదురుచూపులు - కాసేపట్లో ఇంటికి చేరతారనగా!

పెద్దపల్లి జిల్లా గోదావరిఖనిలో ఘోర రోడ్జు ప్రమాదం - ప్రమాదంలో చనిపోయిన తండ్రీకుమారులు - ముగ్గురికి గాయాలు

Father And Son Died in Road accident : ఇంట్లో ఉన్న పిల్లలు ఊరెళ్లిన తల్లిదండ్రులు వస్తారని గుమ్మం ఎదుట నిలబడి చూస్తున్నారు. కొన్ని నిమిషాల్లో తల్లిదండ్రలు ఇంటికి చేరతారు. అంతలోనే వారిని ప్రమాదం రూపంలో మృత్యువు కబళించింది. పెద్దపల్లి జిల్లా గోదావరిఖనిలో రోడ్జు ప్రమాదం జరిగింది. ఈ ప్రమాదంలో తండ్రీకుమారులు మృతి చెందారు. మరో ముగ్గురికి తీవ్ర గాయాలు కావడంతో స్థానిక ఆస్పత్రిలో చికిత్స పొందుతున్నారు. పండుగ పూట ఇలాంటి విషాద ఘటన చోటుచేసుకోవడంతో వారి బంధువులు కన్నీరు మున్నీరవుతున్నారు. ప్రమాదం గురించి తెలియని పిల్లలు తల్లిదండ్రులు వస్తారని ఎదురు చూస్తున్నారు.

పోలీసుల వివరాల ప్రకారం : గోదావరిఖనిలోని అంబేడ్కర్ ​నగర్ కాలనీకి చెందిన గిన్నారపు సతీష్ (32) సింగరేణి జీడీకే -11 గనిలో కార్మికుడిగా పని చేస్తున్నాడు. ఇతనికి భార్య, ముగ్గురు పిల్లలు ఉన్నారు. సమీప బంధువుకు కుమారుడు పుట్టడంతో అందరూ కలిసి హైదరాబాద్​కు వెళ్లేందుకు సిద్ధమయ్యారు. కుమార్తె, రెండో కుమారుడిని ఇంటి వద్దే ఉంచి భార్య కీర్తి, 11 నెలల కుమారుడు నవీశ్, సోదరి అనూష, ఆమె భర్త ఆత్మకూరి సతీష్​లతో కలిసి హైదరాబాద్​కు వెళ్లారు. అక్కడ కార్యక్రమం ముగించుకొని మళ్లీ అదే రోజు రాత్రి 11 గంటలకు బయలుదేరారు.

మరణించిన తండ్రీకుమారులు : తెల్లవారుజామున 3 గంటల ప్రాంతంలో గోదావరిఖనికి చేరుకున్నారు. ఎమ్మెల్యే క్యాంపు కార్యాలయం సమీపంలోకి రాగానే రోడ్డు పక్కన ఆగి ఉన్న లారీని ప్రమాదవశాత్తు ఢీ కొట్టారు. ఈ ఘటనలో కారు నడుపుతున్న గిన్నారపు సతీష్ అక్కడిక్కడే మృతి చెందాడు. తీవ్రంగా గాయపడిన నవీశ్ ఆస్పత్రిలో చికిత్స పొందుతూ చనిపోయాడు. కీర్తి, అనూష, సతీష్​లు తీవ్రంగా గాయపడ్డారు. స్థానిక ప్రభుత్వ ఆసుపత్రిలో చికిత్స అందించిన అనంతరం మెరుగైన వైద్యం కోసం కరీంనగర్​కు తరలించారు.

అకస్మాత్తుగా అడ్డువచ్చిన కుక్క : హైదరాబాద్ నుంచి కారును ఆత్మకూరు సతీష్ నడిపారు. సిటీ దాటగానే తనకు నిద్ర వస్తుందని కారును గిన్నారపు సతీష్​కు ఇచ్చారు. కారు గోదావరిఖనిలోకి ప్రవేశించగా, ఎమ్మెల్యే క్యాంపు కార్యాలయం సమీపంలో ఒక్కసారిగా కుక్క అడ్డు వచ్చిందని సతీష్ ఒక్కసారిగా కారును పక్కకు తిప్పాడు. చీకట్లో ఎలాంటి సూచికలు లేకుండా ఆగి ఉన్న లారీ వెనుక భాగంలో కారు వేగంగా ఢీ కొట్టింది. ప్రమాదం ధాటికి కారు ముందు భాగం ధ్వంసమైంది. ప్రమాదం జరిగిన వెంటనే 108 సిబ్బంది వచ్చి క్షతగాత్రులను ఆస్పత్రికి తరలించారు. మృతుడి బంధువు ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు గోదావరిఖని ఒకటో పట్టణ సీఐ ఇంద్రసేనారెడ్డి, ఎస్సై భూమేష్​లు తెలిపారు.