టెలిగ్రామ్ యాప్​లో గుట్టుగా వ్యభిచార దందా - అదుపులో 9 మంది విదేశీ యువతులు

టెలిగ్రామ్ ద్వారా గత విదేశీ యువతులతో వ్యభిచారం - గత మూడు నెలలుగా జరుగుతున్న దందా - 9 మంది విదేశీ యువతులను పట్టుకున్న పోలీసులు - పరారీలో ప్రధాన నిందితుడు

Prostitution With Foreign Girls : విదేశీ యువతులతో వ్యభిచారం నిర్వహిస్తున్న ముఠా గుట్టును హ్యుమన్ ట్రాఫికింగ్, మాదాపూర్ ఎస్ఓటి పోలీసులు రట్టు చేశారు. గచ్చిబౌలి పోలీసులు తెలిపిన వివరాల ప్రకారం గౌలిదొడ్డి టీఎన్జీవోస్ కాలనీలో విదేశీ యువతులతో వ్యభిచారం నిర్వహిస్తున్నారనే పక్కా సమాచారంతో తనిఖీలు చేపట్టినట్లు తెలిపారు. టీఎన్జీవోస్ కాలనీలోని ఓ అపార్ట్​మెంట్​లోని ఫ్లాట్​లో టెలిగ్రామ్ యాప్ ద్వారా గత మూడు నెలలుగా విదేశీ అమ్మాయిలతో వ్యభిచారం నిర్వహిస్తున్నట్లు పోలీసులు గుర్తించారు.

వివిధ దేశాల నుంచి యువతులు : విటులు అపార్ట్​మెంట్ దగ్గరకు​ చేరుకోగానే టెలిగ్రామ్​లో పంపిన లింకును మాయం చేసి ఎలాంటి ఆధారాలు లేకుండా జాగ్రత్త పడుతున్నారని పోలీసులు వెల్లడించారు. కెన్యా, టాంజానియా, బ్యాంకాక్​కు చెందిన యువతులతో వ్యభిచారం నిర్వహిస్తున్నట్లు గుర్తించారు.

తొమ్మిది మంది విదేశీ యువతులు : పోలీసుల దాడుల సమయంలో, ఇద్దరు లీజు ఏజెంట్లు, ఒక కస్టమర్​ను అదుపులోకి తీసుకున్నామని ఎస్ఓటీ విభాగం తెలిపింది. తొమ్మిది మంది విదేశీ యువతులను అదుపులోకి తీసుకున్నట్లు తెలిపారు. అనంతరం వారిని గచ్చిబౌలి పీఎస్​కు తరలించి కేసును లా అండ్ ఆర్డర్ పోలీసులకు అప్పగించారు. వారు కేసు నమోదు చేసి దర్యాప్తును కొనసాగిస్తున్నట్లు తెలిపారు. ఈ ముఠాకు చెందిన ప్రధాన నిందితుడు మాత్రం ప్రస్తుతం పరారీలో ఉన్నట్లు తెలిపారు. అతని కోసం పోలీసులు గాలిస్తున్నారు.