పోతారు - మొత్తం పోతారు - ఈసారి చలి పంజాకు అంతా గజగజా వణికిపోతారు! - IMP Predicts Severe Cold This Year

ఈ ఏడాది చలి పులి పంజా విసిరే అవకాశాలు ఎక్కువగా ఉన్నాయని తెలిపిన ఐఎండీ - ఈ నెల, వచ్చే నెలలో దేశవ్యాప్తంగా చలి తీవ్రత ఉండొచ్చని భారత వాతావరణ శాఖ అంచనా

IMD Predicts That This Year Will Be The Coldest :ఈ ఏడాది చలి పులి పంజా విసిరే అవకాశాలు మెండుగా కనిపిస్తున్నాయి. సెప్టెంబరు నెలతో వానాకాలం ముగిసింది. ఉత్తర భారత దేశానికి విస్తరించిన నైరుతి రుతుపవనాలు తిరోగమనం కూడా మొదలైంది. అయితే ఈ పననాల కదలికలు కాస్త నెమ్మదిగా ఉన్నట్లు వాతావరణ నిపుణులు చెబుతున్నారు. ఈ నెలలో లా నినా ఏర్పడే పరిస్థితులు ఉండడంతో దేశవ్యాప్తంగా చలి తీవ్రత ఉండొచ్చని భారత వాతావరణ శాఖ అంచనా వేస్తోంది. ఈ పరిస్థితులు వాయవ్య, మధ్య భారత దేశాల్లో విపరీతమైన చలిగాలులు వీచేందుకు దారి తీస్తాయని భావిస్తున్నారు.

అప్పటి వరకు మోస్తరు వర్షాలు :మరోవైపు దేశ వాయవ్య భాగమైన పంజాబ్, దిల్లీ ప్రాంతాల నుంచి రుతుపవనాల తిరోగమనం కొనసాగుతోంది. ఈ నెల మొదటి వారానికి మధ్య, ఈశాన్య భారత దేశాన్ని రుతు పవనాలు వీడినట్లయితే నిర్దిష్ట అంచనాల మేరకే కదలికలు ఉన్నట్లు భావిస్తారు. ఆలస్యమైతే మాత్రం ఈ నెల, వచ్చే నెల చలి తీవ్రత పెరిగే అవకాశాలు ఎక్కువగా ఉన్నాయి. ఈ నెల 17 నాటికి తెలంగాణ, ఆంధ్ర ప్రాంతాలను దాటి పవనాలు వెనక్కి వెళ్లిపోతాయని వాతావరణ నిపుణులు అంచనా వేస్తున్నారు. అప్పటి వరకు ఓ మోస్తరు వర్షాలు కురిసే సూచనలు ఉన్నాయని తెలిపారు. రాష్ట్రంలో రెండేళ్ల నుంచి చలి తీవ్రత అధికంగానే ఉంటోంది.

ఇప్పటి వరకు రాష్ట్రంలో అతి తక్కువగా 3.3 డిగ్రీల సెల్సియస్‌ ఉష్ణోగ్రత 1973లో నమోదు కాగా, 2023లో వికారాబాద్‌ జిల్లా గండీడ్‌లో 3.5 డిగ్రీలు నమోదైంది. ఉమ్మడి ఆదిలాబాద్‌ జిల్లాలో చలి తీవ్రత అత్యధికంగా నమోదవుతోంది. రాష్ట్రంలో సగటు చలికాల ఉష్ణోగ్రతలు 22 నుంచి 23 డిగ్రీల సెల్సియస్‌ కాగా, కొన్నేళ్లుగా దీని కన్నా తక్కువ స్థాయిలో సగటు ఉష్ణోగ్రతలు నమోదవుతున్నాయని వివరించారు.

ఈ నేపథ్యంలో వైద్యులు పలు సలహాలు ఇస్తున్నారు. దీర్ఘకాలిక వ్యాధులున్న వారు జాగ్రత్తగా ఉండటం తప్పనిసరి అని హెచ్చరిస్తున్నారు. ముఖ్యంగా 60 సంవత్సరాలు పైబడిన వారిలో రక్తనాళాలు కుచించుకుపోవటంతో పాటు, రక్తం గడ్డ కట్టే సమస్యలు ఈ కాలంలో అధికంగా ఉంటాయని చెబుతున్నారు. కనీసం సంవత్సరానికి ఒకసారైనా బాడీ చెకప్‌ చేసుకోవాలని సూచిస్తున్నారు.