Gun Fire in Afzalganj Hyderabad :ఉదయం బీదర్లో ఏటీఎంలో డబ్బులు జమచేసే వాహనంపై దాడి చేసి దోచుకున్న బీదర్ దొంగలు హైదరాబాద్లోనూ కలకలం సృష్టించారు. దొంగలను వెతుక్కుంటూ వచ్చిన బీదర్ పోలీసులపై దుండగులు కాల్పులు జరిపారు. ఈ ఘటనలో ఒకరికి గాయాలు కాగా, ముఠాలో ఓ వ్యక్తిని పోలీసులు పట్టుకున్నారు.
రాయపూర్ వెళ్లేందుకు ప్లాన్ : అఫ్జల్‌గంజ్‌లో సాయంత్రం ఈ ఘటన చోటు చేసుకుంది. నిందితులు ముగ్గురు రాయ్పూర్ వెళ్లేందుకు టికెట్ బుక్ చేసుకున్నారు. సాయంత్రం వారు బస్ కోసం వేచి చూస్తున్న సమయంలో పోలీసులు రావడంతో వారిపై ఫైరింగ్ జరిపారు. ముఠా జరిపిన కాల్పుల్లో ట్రావెల్స్ మేనేజర్ జహంగీర్ కడుపులోకి బుల్లెట్ దూసుకెళ్లింది. జహంగీర్ను అక్కడే సమీపంలోని ఉస్మానియా ఆసుపత్రికి తరలించారు.
ప్రత్యక్ష సాక్షి అహ్మద్ చెప్పిన ప్రకారం "మధ్యాహ్నం ఇద్దరు వ్యక్తులు వచ్చి రోషన్ ట్రావెల్స్లో మూడు టికెట్లు రాయపూర్కు బుక్ చేశారు. తిరిగి సాయంత్రం ఏడు గంటలకు ట్రావెల్స్ కార్యాలయానికి వచ్చారు. అక్కడ నుంచి మేము వారిని మినీ బస్సుల్లో బస్సులు ఆగే స్థలం వద్దకు తరలించడానికి సిద్ధమయ్యాం. ఇదే సమంయలో మా సిబ్బంది అనుమానంగా ఉన్న బ్యాగేజీ తనిఖీ చేస్తారు. అదే క్రమంలో రాయపూర్కు వెళ్తున్న నిందితుల బ్యాగేజీలను కూడా తనిఖీ చేస్తుండగా వారు డబ్బులు తీసి మా సిబ్బందికి ఇవ్వడానికి ప్రయత్నించారు ఈ క్రమంలో అదే మినీ బస్సులో ఉన్న కర్ణాటక పోలీసులు తాము పోలీసులమని సిబ్బందికి చెప్పారు. ఇంతలోనే ఆ ముగ్గురు బ్యాగులో నుంచి తుపాకీ తీసి కాల్పులు జరపారు. దీంతో మా మేనేజర్ జహంగీర్కు పొత్తికడుపుతో పాటు కాలికి గాయాలయ్యాయి."