గోదాముల్లో వేల టన్నుల ఎర్ర చందనం నిల్వలు - త్వరలోనే వేలానికి - కాసులు కురిపించేనా?

ఎర్ర చందనం విక్రయాల్లో భాగంగా గ్లోబల్‌ టెండర్లకు ఏపీ ప్రభుత్వం సన్నాహాలు - వెయ్యి టన్నుల దుంగలకు వేలం నిర్వహించేందుకు ప్రయత్నాలు - గోదాముల్లో ఏడు వేల టన్నులకు పైగా నిల్వలు

AP Govt on Red Sandalwood Tender and Auction : శేషాచలం అడవుల్లో ఎర్రచందనం అరుదైన వృక్షమే కాదు, సహజ సిద్ధమైన ఆదాయ వనరు కూడా. దేశ విదేశాల్లోనూ ఈ కలపకు ఎంత డిమాండ్ ఉందో తెలిసిందే. ఒకవైపు స్మగ్లర్లు ​ఎర్రచందనాన్ని దొంగచాటుగా అమ్ముకొని కోట్ల రూపాయలకు పడగలెత్తుతుంటే, మరోవైపు రాష్ట్ర ప్రభుత్వాలు అధికారిక విక్రయాల ద్వారా ఆదాయాన్ని సమకూర్చుకోవడం లేదు. 2014లో టీడీపీ ప్రభుత్వం రాష్ట్రానికి ఆదాయ వనరుగా ఎర్రచందనాన్ని మార్చడానికి పెద్దఎత్తున ప్రయత్నాలు చేసింది. ఈ మేరకు తిరుపతిలోని తిమ్మినాయుడుపాలెం సమీపంలో ప్రత్యేకంగా కేంద్రీయ ఎర్రచందనం గోదాములనే నిర్మించింది.

తిరుపతిలోని కేంద్రీయ ఎర్రచందనం గోదాములో నిల్వలు (ETV Bharat)

ప్రపంచంలో ఎక్కడైనా స్మగ్లర్ల నుంచి స్వాధీనం చేసుకున్న దుంగలను ఈ గోదాములకు తీసుకువచ్చేలా ఏర్పాటు చేసింది. రాష్ట్ర ప్రభుత్వం గోదాములలో దుంగలకు గ్రేడ్ల వారీగా విభజించి, భద్రపరిచింది. వీటికి భారీ డిమాండ్​ ఉన్న జర్మనీ, జపాన్, చైనా తదితర దేశాలకు ఏపీ అటవీ శాఖ నుంచి ప్రత్యేక బృందాలను పంపించి మార్కెటింగ్‌ చేయించింది. అక్కడి అవసరాలు తెలుసుకుని ఈ మేరకు గ్లోబల్​ టెండర్లు నిర్వహించింది. 2018 సెప్టెంబరులో అత్యధికంగా 5 వేల టన్నుల ఏ, బీ గ్రేడ్​ల ఎర్రచందనాన్ని విక్రయించి ఆదాయాన్ని సమకూర్చుకుంది. ఆ తర్వాత 2020లో వైసీపీ ప్రభుత్వంలో 4 వేల 343 టన్నుల్లో 300 టన్నులు, తర్వాత మూడేళ్లల్లో మరో 450 టన్నులు మాత్రమే విక్రయించింది.

దుంగల బరువు పరిశీలిస్తున్న ధరల నిర్ణయ కమిటీ అధికారి, పీసీసీఎఫ్‌ ఆర్కే సుమన్, సిబ్బంది (ETV Bharat)

7 వేల టన్నులకుపైగా నిల్వలు : ప్రస్తుతం గోదాముల్లో బఫర్‌ స్టాక్‌తో కలిపి మొత్తం 7 వేల టన్నులకుపైగా నిల్వలు ఉన్నాయి. అయితే విక్రయాల్లో భాగంగా ఈసారి 20వ గ్లోబల్‌ టెండర్లకు ఏపీ ప్రభుత్వం సన్నాహాలు చేస్తోంది. త్వరలోనే దాదాపు వెయ్యి టన్నుల దుంగలకు వేలం నిర్వహించేందుకు ప్రయత్నం చేస్తోంది. ఈ మేరకు ధర నిర్ణయించేందుకు అక్టోబరులోనే పీసీసీఎఫ్‌ ఆర్కే సుమన్‌ నేతృత్వంలోని కమిటీ గోదాముల్లోని 50 లాట్లలో ఉన్న దుంగలను పరిశీలించింది. అనంతరం ఆ దుంగలను గ్రేడ్ల వారీగా విభజించి, వాటి రంగును నమోదు చేసుకుంది. ఏ గ్రేడ్​ టన్ను ధర రూ.65 లక్షల నుంచి రూ.75 లక్షలు, బీ గ్రేడ్​ రూ.36 లక్షలు, సీ గ్రేడు రూ.20 లక్షలు, ఎన్‌ గ్రేడు రూ.7 లక్షలు, పొడి, పేళ్లు, వేర్లు టన్నుకు రూ.60 వేలుగా ధరలు నిర్ణయించారు. ఇక వీటికి టెండర్లు నిర్వహించడమే మిగిలి ఉంది.