డబ్బుల కోసం బిడ్డను అమ్మేసింది - 20వేలు తక్కువ కావడంతో గొడవకు దిగింది

కన్నతల్లే శిశువును విక్రయించిన ఘటన - ఇరువురిపై కేసు నమోదు చేసిన పోలీసులు

Baby Boy Sale in Bapatla:నవ మోసాలు మోసి జన్మనిచ్చిన ఆ తల్లికి కడుపు తీపి గుర్తుకు రాలేదేమో! బుడి బుడి నడకల ఆ చిన్నారిని అమ్మేందుకు. పడ్డ పురిటి నొప్పులు మరిచి పేగు బంధాన్ని వదిలి పెట్టేసింది ఆ తల్లి. కష్టమే వచ్చిందనో, భారమని భావించిందో కాని డబ్బు కోసం ఆ చిన్నారిని వేరేవారికి అమ్మేసింది. చివరకు డబ్బుల విషయంలో తలెత్తిన గొడవ ఈ గుట్టును రట్టు చేసింది.

'రోజూ అల్లారు ముద్దుగా లాలిస్తే సంబరపోయా. చందమామ రావే, జాబిల్లి రావే అంటూ గోరు ముద్దలు తినిపిస్తే మురిసిపోయాను. నీ లాలి పాటలు వివి నీ ఒడిలో హాయిగా నిద్రపోయాను. అల్లారు ముద్దుగా ఆడిస్తూ మంచి దుస్తులు తొడిగితే మా అమ్మ ఎంతో మంచిదని సంబరపడిపోయా. అలా నన్ను విక్రయానికి పెడితే అమ్మే కదా వెంటనే వస్తుందిలే అని ఎదురుచూశా. ఎంత సేపటికీ నువ్వు రాకపోయేసరికి నాలో భయం మొదలైంది అమ్మా' అని ఆ మూడు నెల పసికందు బాధ గుండెలు బరువెక్కెలా చేసే ఈ ఘటన బాపట్ల జిల్లాలో చోటు చేసుకుంది.

తాజాగా బాపట్లకు చెందిన వెంకటేశ్వరమ్మ మూడు నెలల క్రితం మగబిడ్డకు జన్మనిచ్చింది. తనకు శిశువు కావాలని మూడు వారాల క్రితం నెల్లూరు జిల్లా కావలికి చెందిన నాగమణి ఆమెను సంప్రదించింది. అందుకు లక్ష రూపాయలు ఇస్తానని బేరసారాలు జరిపింది. దీనికి సరేనన్న వెంకటేశ్వరమ్మ తన బిడ్డను నాగమణికి అప్పగించింది.

ఇందులో భాగంగా వెంకటేశ్వరమ్మకు నాగమణి రూ.80 వేలు చెల్లించింది. మిగతా రూ.20 వేలు తర్వాత ఇస్తానని చెప్పింది. ఆ తర్వాత ఆమె మిగతా నగదు ఇవ్వమని అడిగితే నాగమణి సమాధానం ఇవ్వలేదు. దీంతో మోసపోయానని గ్రహించిన వెంకటేశ్వరమ్మ బాపట్ల పోలీసులకు ఫిర్యాదు చేసింది. దీనిపై కేసు నమోదు చేసి దర్యాప్తు చేపట్టగా కన్నతల్లే శిశువును విక్రయించినట్లు వెలుగులోకి వచ్చింది.

కావలి నుంచి ఆ మగబిడ్డను రక్షించి పోలీస్​స్టేషన్​కు తరలించి ఆ తర్వాత ఆ శిశువును ఐసీడీఎస్ అధికారుల సమక్షంలో బాలసదనానికి తరలించారు. ఇరువురిపై కేసు నమోదు చేసి దర్యాప్తు చేస్తున్నట్లు బాపట్ల సీఐ మహమ్మద్ జానీ తెలిపారు. శిశువిక్రయాలు చట్టరీత్యా నేరమని చెప్పారు. ఇటువంటి వాటిపై తమకు సమాచారం అందించాలని సీఐ పేర్కొన్నారు.