How to Overcome the Mathematics Fear in Students: ఫిబ్రవరి నుంచి ఏప్రిల్ వరకు విద్యార్థులు బిజీబిజీగా గడుపుతుంటారు. కారణం ఈ రోజుల్లో ఎగ్జామ్స్ ఉంటాయి. దీంతో అందరూ ఆ ప్రిపరేషన్లో ఉంటారు. ఇక పరీక్షలు అంటే చాలా మంది భయపడుతుంటారు. ఎందుకంటే కొన్ని సబ్జెక్ట్స్ టఫ్గా ఉండటమే. ఒకరికి ఇంగ్లీష్ అంటే భయం, మరికొద్దిమందికి హిందీ, తెలుగు ఇలా ఉంటాయి. కాగా చాలా మంది పిల్లలకు మ్యాథ్స్ అనగానే గుబులు. ఏ చిన్న ప్రాబ్లమ్ ఇచ్చినా చాలా టఫ్ అని భావించి దానిని సాల్వ్ చేయడానికి భయపడుతుంటారు. ఇక ఈ భయం మొత్తంగా చదువులపైన వారి ఆలోచననే మార్చేస్తుంది. అయితే దీన్ని పోగొట్టడానికి ఉపాధ్యాయులూ, పేరెంట్స్ వినూత్నంగా ఆలోచించాల్సిందేనని, అప్పుడే గణితమంటే కష్టమనే భావన పోయి ఇష్టం ఏర్పడుతుందని నిపుణులు చెబుతున్నారు. మరి అవేంటో ఈ స్టోరీలో తెలుసుకుందాం.
భయానికి కారణాలివే:
- లెక్కలు నేర్చుకునే క్రమంలో ఏదైనా పొరపాటు చేస్తే టీచర్లు దాన్ని పెద్దది చేసి చూపడం, కష్టమైన అంశాలను సులభంగా బోధించలేకపోవడం, సాధనలో తగిన సహకారం లభించకపోవడం లాంటివన్నీ అనుభవాలు ఒకట్రెండుసార్లు ఎదురైతే, భయం, అసహనంతో సబ్జెక్టును దూరం పెట్టడం చేస్తుంటారని చెబుతున్నారు.
- తెలివైనవాళ్లే మ్యాథ్స్ చేయగలరనే భావనను కల్పిస్తుంటారు కొద్దిమంది. దీనివల్ల అది నా వల్ల కాదులే అనే ఆలోచనతో దాని మీద దృష్టి నిలపారని వివరిస్తున్నారు.
- ప్రారంభంలోనే సృజనాత్మకంగా, ప్రాక్టికల్‌గా కాకుండా బట్టీ పట్టించే పద్ధతిలో నేర్పించడం వల్లనా సబ్జెక్ట్పై అనాసక్తి ఏర్పడవచ్చని వివరస్తున్నారు.
ఈ లక్షణాలు ఉంటే మ్యాథ్స్ అంటే భయం ఉన్నట్లే!:
- లెక్కలు చేయాలంటే భయపడటం, గణితానికి సంబంధించి ఎలాంటి అంశానికైనా దూరంగా ఉండటం లాంటివి కనిపిస్తాయని చెబుతున్నారు.
- ఒకటి రెండు సార్లు లెక్కల్లో మార్కులు తక్కువ రావడంతో ఆ సబ్జెక్టులో తాము ఎప్పటికీ వెనకేనన్న భావనలోకి వెళతారని అంటున్నారు.
- లెక్కల హోమ్‌వర్క్‌ చేయకపోవడం, స్కూల్‌ అంటేనే ఆసక్తి చూపకపోవడం వంటివి కనిపిస్తాయని అంటున్నారు.
- అలాగే టఫ్ లెక్కలు సాల్వ్ చేయలేకపోతే వెంటనే కోపాన్ని, అసహనాన్ని చూపడం చేస్తారని చెబుతున్నారు.
- పరీక్షల సమయంలో కడుపునొప్పి, తలనొప్పి లాంటివాటికి గురికావడం ఆందోళన కారణంగా వచ్చేవే అని చెబుతున్నారు. ఇలాంటి అనుభవాలు ఉంటే సబ్జెక్టుపైన అయిష్టతను పెంచుతాయని, ఆత్మస్థైర్యమూ దెబ్బతింటుందని హెచ్చరిస్తున్నారు.
పరిష్కారం ఎలా: భయం వెనక ఉండే కారణాల్ని పలు కోణాల్లో విశ్లేషించి గుర్తిస్తే సమస్యను అధిగమించడం తేలికవుతుందని నిపుణులు సూచిస్తున్నారు. అందుకోసం,
- ప్రాక్టీకల్గా నేర్పిస్తే మేలని చెబుతున్నారు. అంటే లెక్కల్ని వస్తువుల సాయంతో నేర్పిస్తే, పిల్లలు సులభంగా అర్థం చేసుకుంటారని సూచిస్తున్నారు. అడిషన్స్, తీసివేతలూ, మల్టిఫ్లికేషన్, భాగహారాలనూ ఈ పద్ధతిలో నేర్పించమని సలహా ఇస్తున్నారు.
- "సాధనమున పనులు సమకూరు ధరలోన" అన్నట్టుగా లెక్కల్లో పర్ఫెక్ట్ కావాలంటే ప్రాక్టీసు చాలా ముఖ్యమంటున్నారు. ఎంత అలవాటైతే అంత ఆత్మవిశ్వాసంతో ఉంటారని, కాబట్టి రోజూ కొంత సమయం కచ్చితంగా గణితానికి కేటాయించమని, వీలైతే రెండు పూటలా సాధన చేయించమని సూచిస్తున్నారు.
- కూడికలూ, తీసివేతలూ, గుణకారాలూ ఉండే గేమ్స్, పజిల్స్‌ లాంటివాటితో గణిత నైపుణ్యాలను అలవాటు చేయొచ్చని చెబుతున్నారు.
- గణితాన్ని సృజనాత్మక సబ్జెక్టుగా చూడాలి. జవాబు గురించికంటే ప్రాసెస్‌ గురించి ఆలోచించేలా చేయమంటున్నారు.
- జంటగా, చిన్న బృందంతో కలిసి నేర్చుకునేలా చేస్తే మేలని చెబుతున్నారు. ఒకే సమస్యను ఇతరులు భిన్నంగా ఎలా చేస్తున్నారో తెలుస్తుంది. దీంతో భయంతోకాకుండా, సరదాగా నేర్చుకుంటారని చెబుతున్నారు.
- పొడవు, బరువు లాంటి అంశాలతో ఇంట్లోనూ ప్రాక్టికల్స్‌ చేయించండి. ఒక వంటకానికి కావాల్సిన పదార్థాల్ని కొలవమని చెప్పండి. డబ్బునీ, గది వైశాల్యాన్నీ, చుట్టుకొలతనూ లెక్కించమనండి.
- భయాన్ని అధిగమించేవరకూ కొన్నాళ్లపాటు సబ్జెక్టు స్పెషలిస్టుతో ప్రత్యేక తరగతులు చెప్పించవచ్చని, సానుకూల దృక్పథంతోనే టీచర్లూ, తల్లిదండ్రులూ పిల్లల్ని ప్రోత్సహిస్తూ ఈ సమస్యను పరిష్కరించాలని సూచిస్తున్నారు.
పదో తరగతి విద్యార్థులు కాస్త శ్రద్ధ పెడితే చాలు - ఆ సబ్జెక్ట్లో మంచి మార్కులు మీ సొంతం!
పరీక్షల్లో ఎక్కువ మార్కులు సాధించాలా? - ఈ టిప్స్ ఫాలో అయితే ఇట్టే వచ్చేస్తాయి!
