T20 Player Of The Year 2023:టీమ్ఇండియా స్టార్ బ్యాటర్ సూర్యకుమార్ యాదవ్ '2023 టీ20 ప్లేయర్ ఆఫ్ ది ఇయర్'గా నిలిచాడు. 2023లో పొట్టి ఫార్మాట్లో అత్యుత్తమ ప్రదకర్శన కనబర్చిన సూర్యను ఐసీసీ బుధవారం ప్లేయర్ ఆఫ్ ది ఇయర్గా ప్రకటించింది. కాగా, 2022లోనూ ఈ అవార్డు సూర్యనే వరించింది. దీంతో వరుసగా రెండుసార్లు ఉత్తమ టీ20 ప్లేయర్ అవార్డు అందుకున్న ఏకైక క్రికెటర్గా నిలిచాడు సూర్య. అటు టీ20 ర్యాకింగ్స్లోనూ సూర్య అగ్రస్థానంలో కొనసాగుతున్నాడు. ప్రస్తుతం 869 రేటింగ్స్తో సూర్య టాప్లో ఉన్నాడు.
సూర్య@2023: 2023 ఏడాదికిగాను ఉత్తమ టీ20 క్రికెటర్ల రేసులో సూర్యతోపాటు జింబాబ్వే ప్లేయర్ సికిందర్ రజా (515 పరుగులు, 17 వికెట్లు), న్యూజిలాండ్ బ్యాటర్ మార్క్ చాప్మన్ (576 పరుగులు) ఉగాండ ఆటగాడు అల్పేశ్ ( 55 వికెట్లు) ఉన్నారు. వీళ్లలో సూర్యనే ఈ అవార్డు వరించింది. గతేడాది పొట్టి ఫార్మాట్లో సూర్య అదరగొట్టాడు. అతడు 17 ఇన్నింగ్స్ల్లో 48 సగటుతో 733 పరుగులు బాదాడు. అందులో రెండు సెంచరీలు ఉన్నాయి. అతడి స్ట్రైక్ రేట్ 155గా ఉంది. అలాగే 2023లో సూర్య రెండు టీ20 సిరీస్లకు టీమ్ఇండియా కెప్టెన్గా వ్యవహరించాడు. ఆస్ట్రేలియాతో 4-1 తేడాతో సిరీస్ నెగ్గగా, సౌతాఫ్రికాతో 1-1తో డ్రా గా ముగిసింది.
ICC T20 Cricketer Of The Year: ఐసీసీ 2021 నుంచి క్రికెటర్లకు ఉత్తమ టీ20 అవార్డులు ఇస్తోంది. అయితే 2021లో పాకిస్థాన్ బ్యాటర్ మహ్మద్ రిజ్వాన్ ఈ అవార్డుకు ఎంపికవ్వగా, 2022, 2023లో వరుసగా రెండుసార్లు సూర్య దక్కించుకున్నాడు.