Davis Cup 2024 IND VS PAK : 60 ఏళ్ల సుదీర్ఘ విరామం తర్వాత పాకిస్థాన్ గడ్డపై ఆడిన భారత టెన్నిస్ జట్టు అదిరిపోయే ప్రదర్శన చేసింది. స్ఫూర్తిదాయక ప్రదర్శనతో ప్రత్యర్థి జట్టును 4-0తో చిత్తు చేసింది. తద్వారా డేవిస్‌కప్‌ ప్రపంచ గ్రూప్‌-1లో చోటు సంపాదించింది. ప్లేఆఫ్స్‌లో 2-0 ఆధిక్యంలో నిలిచిన భారత్ రెండోరోజు జరిగిన మ్యాచుల్లోనూ గెలిచింది. డబుల్స్‌, రివర్స్‌ సింగిల్స్లో నెగ్గి ఘన విజయాన్ని దక్కించుకుంది.
పురుషల డబుల్స్‌లో సాకేత్‌ మైనేని-యుకి బాంబ్రి ద్వయం 6-2, 7-6 (7-5)తో ముజామిల్‌ మొర్తజా-అకీల్‌ఖాన్‌ జంటను ఓడించడంతో భారత్కు 3-0 తేడాతో విజయం ఖరారైంది. నామమాత్రపు నాలుగో మ్యాచ్లో నికీ పూంచా 6–3, 6–4తో షోయబ్‌ మహ్మద్పై గెలవడం వల్ల భారత్ ఆధిక్యం 4 0కు చేరింది. ఇక అప్పటికే ఫలితం తేలిపోవడం వల్ల ఐదో మ్యాచ్‌ను నిర్వహించలేదు. దీంతో ఆరు దశాబ్దాల తర్వాత పాకిస్థాన్ పర్యటనకు వెళ్లిన భారత్కు ఇదే తొలి విజయం కావడం విశేషం. మొత్తంగా ఈ టోర్నీ చరిత్రలో పాక్‌పై భారత్కు ఇది ఎనిమిదో విజయం.