వృశ్చిక సంక్రాంతి నాడు దానధర్మాలు చేస్తే - సకల ఐశ్వర్యాలు కలగడం ఖాయం!

వృశ్చిక సంక్రమణం రోజున అన్నదానం, గోదానం, భూదానం చేస్తే - ఆయురారోగ్యాలు సహా, ఐశ్వర్య ప్రాప్తి పక్కా!

Vrishchika Sankranti 2024 : సూర్యుడు ప్రతి నెలా ఒక్కో రాశి నుంచి ఇంకో రాశిలోకి ప్రవేశిస్తుంటాడు. నవంబర్ నెలలో సూర్యుడు తులారాశి నుంచి వృశ్చిక రాశిలోకి ప్రవేశించనున్నాడు. ఈ సందర్భంగా ఏర్పడే వృశ్చిక సంక్రాంతి రోజు ఏ దేవుని ఆరాధించాలి? ఎలాంటి దానాలు చేయాలి? అనే విషయాలు ఈ కథనంలో తెలుసుకుందాం.

వృశ్చిక సంక్రమణం ఎప్పుడు?
తెలుగు పంచాంగం ప్రకారం నవంబర్ 16వ తేదీ ఉదయం 6:12 నిమిషాల నుంచి 7:41 నిమిషాల మధ్యలో సూర్యుడు తులారాశి నుంచి వృశ్చిక రాశిలోకి ప్రవేశించనున్నాడు. ఇందులో పుష్కర కాలం 7:31 నిమిషాలని పంచాంగ కర్తలు, పండితులు తెలియజేస్తున్నారు. ఈ మొత్తం గంటా 29 నిమిషాల కాలాన్ని మహా పుణ్యకాలంగా అభివర్ణిస్తారు.

వృశ్చిక సంక్రమణం ప్రత్యేకత
ఓ వైపు కార్తిక మాసం హడావుడి. ఇటు శివాలయాలు, అటు వైష్ణవ ఆలయాలు భక్తులతో కళకళలాడుతూ ఉంటాయి. ఇంతటి పరమ పవిత్రమైన మాసంలో ప్రత్యక్ష దైవమైన సూర్యనారాయణమూర్తి వృశ్చిక రాశిలోకి ప్రవేశించడాన్ని వృశ్చిక సంక్రమణమని అంటారు.

ఇవి ఆచరిద్దాం
అసలే కార్తిక మాసం. అందునా వృశ్చిక సంక్రమణం. ఈ రోజు నదీ స్నానాలకు విశేషమైన రోజు. నదీ స్నానంతో పాటు ఆచరించాల్సిన ఇతర విధి విధానాల గురించి ఇప్పుడు విపులంగా తెలుసుకుందాం.

పూజా విధానం
ఇతర సంక్రాంతుల మాదిరిగానే వృశ్చిక రాశిలో సూర్యుడి సంచారం వేళ శుభ ఫలితాలొస్తాయి. ఈ రోజున సూర్యోదయం కంటే ముందే నిద్ర లేవాలి. ఒక రాగి పాత్రలో నీరు నింపి, అందులో ఎర్రచందనం కలిపి సూర్యునికి అర్ఘ్యం సమర్పించాలి. కుంకుమ, ఎర్రని పువ్వు, పసుపు కలిపిన నీటిని సూర్యుడికి సమర్పించాలి.

ఎర్ర చందన దీపం
సూర్యునికి దీపం వెలిగించేటప్పుడు ఎర్రచందనం నెయ్యిలో కలిపి దీపం వెలిగించాలి. ఇలా చేయడం వల్ల పూర్వీకుల దోషాలు తొలగిపోయి, మోక్షం లభిస్తుందని శాస్త్ర వచనం. సూర్యుని పూజ సమయంలో సూర్యాష్టకం కానీ, ఆదిత్య హృదయం కానీ పారాయణ చేస్తే మంచి ఆరోగ్యం చేకూరుతుందని విశ్వాసం.

ఈ దానాలు శ్రేష్ఠం
వ్యాస మహర్షి రచించిన దేవి పురాణం ప్రకారం, వృశ్చిక సంక్రాంతి వేళ పూర్వీకులను స్మరించుకుంటూ దానధర్మాలు, శ్రాద్ధాలు, తర్పణాలు చేయాలి. వృశ్చిక సంక్రాంతి రోజున పుణ్య స్నానం చేసిన వ్యక్తికి సకల పాపాల నుంచి విముక్తి లభిస్తుందని పండితులు చెబుతారు. వృశ్చిక సంక్రమణం రోజు బ్రాహ్మణులకు అన్నదానం, గోదానం, భూదానం వంటివి చేయడం వలన ఐశ్వర్యం వృద్ధి చెందుతుంది. అలాగే పేదలకు, ఆహారం, బట్టలు, దానం చేయడం శుభప్రదంగా ఉంటుంది.

వృశ్చిక సంక్రమణ పూజాఫలం
వృశ్చిక సంక్రమణ సమయంలో చేసే నదీ స్నానం, జపం, ధ్యానం, దానం విశేషమైన పుణ్యఫలాలను ఇస్తాయి. ఈ రోజున చేసే పూజల వలన సమస్త దోషాలతో పాటుగా దారిద్య్రం కూడా నశించి, సంపదలు లభిస్తాయని పురాణం వచనం.

రానున్న వృశ్చిక సంక్రమణం రోజు మనం కూడా శాస్త్రంలో చెప్పినట్లుగా స్నాన దాన జపాలు చేద్దాం. తరిద్దాం.

ముఖ్యగమనిక : పైన తెలిపిన వివరాలు కొందరు నిపుణులు, వివిధ శాస్త్రాల్లో పేర్కొన్న అంశాల ఆధారంగా అందించినవి మాత్రమే. అంతే కానీ, వీటిలో ఎలాంటి శాస్త్రీయ ఆధారాలు లేవనే విషయాన్ని పాఠకులు గమనించాలి. దీన్ని ఎంత వరకు విశ్వసించాలనేది పూర్తిగా మీ వ్యక్తిగత విషయం.