ఆలూ, అరటి చిప్సే కాదు - ఇలా "కాకరకాయ చిప్స్" ట్రై చేయండి! - చేదు తక్కువ, రుచి ఎక్కువ!

ఆలూ చిప్స్​ని మించిన టేస్ట్ - ఈజీగా ఇంట్లోనే ప్రిపేర్ చేసుకోండిలా!

Kakarakaya Chips Recipe in Telugu : మనందరికీ చిప్స్ అనగానే బంగాళదుంపతో ప్రిపేర్ చేసుకునేవే ముందుగా గుర్తొస్తాయి. కరకరలాడుతూ ఉండే వీటిని పిల్లల నుంచి పెద్దల వరకు అందరూ ఎంతో ఇష్టంగా తింటుంటారు. అయితే, ప్రతిసారీ ఒకేలా తినాలంటే ఎవరికైనా బోరింగ్​గా అనిపిస్తోంది. అందుకే ఈసారి కాస్త వెరైటీగా ఇలా "కాకరకాయ చిప్స్" ట్రై చేయండి. ఇవి కూడా చాలా రుచికరంగా ఉండి తిన్నా కొద్దీ తినాలనిపిస్తుంది. అంతేకాదు, కాకరకాయ అంటే నచ్చని వారూ ఇంకా ఇంకా కావాలని అడిగి మరీ తినేస్తారు. మరి, ఈ సూపర్ టేస్టీ చిప్స్ తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.

కావాల్సిన పదార్థాలు :

• కాకరకాయలు - 3
• ఉప్పు - రుచికి సరిపడా
• పసుపు - అరటీస్పూన్
• మైదా - 1 టేబుల్​స్పూన్
• బియ్యప్పిండి - 2 టేబుల్​స్పూన్లు
• కార్న్​ఫ్లోర్ - 1 టేబుల్​స్పూన్
• వెల్లుల్లి పేస్ట్ - 1 టీస్పూన్
• ధనియాల పొడి - 1 టీస్పూన్
• కారం - రుచికి తగినంత
• ఆయిల్ - డీప్​ ఫ్రైకి సరిపడా

తయారీ విధానం :

• ఇందుకోసం ముందుగా కాకరకాయలను శుభ్రంగా కడిగి చాకు లేదా పీలర్ సహాయంతో వాటిపై ఉండే చెక్కును తొలగించుకోవాలి. ఆపై వాటిని మీకు నచ్చిన షేప్​లో సన్నని ముక్కలుగా కట్ చేసుకొని మధ్యలో గింజలను తీసేసుకోవాలి.
• అనంతరం కట్ చేసుకున్న కాకరకాయ ముక్కలన్నింటినీ ఒక బౌల్​లోకి తీసుకొని కాస్త ఉప్పు, పావు టీస్పూన్ పసుపు వేసి బాగా కలిపి పది నిమిషాల పాటు పక్కనుంచాలి.
• 10 నిమిషాల తర్వాత అందులో ఒక గ్లాస్ వాటర్ పోసుకొని శుభ్రంగా కడిగి ఆపై ముక్కలన్నింటినీ చేతితో గట్టిగా పిండి మరో మిక్సింగ్ బౌల్​లో వేసుకోవాలి. ఇలా చేయడం ద్వారా కాకర ముక్కల్లోని చేదు చాలా వరకు తగ్గుతుంది.
• ఆ తర్వాత అందులో మైదా, బియ్యప్పిండి, కార్న్​ఫ్లోర్, వెల్లుల్లి పేస్ట్, పావుటీస్పూన్ పసుపు, ధనియాల పొడి, ఉప్పు, కారం ఇలా ఒక్కొక్కటిగా వేసుకొని ఇంగ్రీడియంట్స్ అన్నీ కాకర ముక్కలకు పట్టేలా బాగా కలుపుకోవాలి.
• అలా మిక్స్ చేసుకునేటప్పుడు అవసరమనుకుంటే కొద్దికొద్దిగా వాటర్ యాడ్ చేసుకుంటూ పకోడీ పిండి మాదిరిగా కలుపుకొని పక్కన పెట్టుకోవాలి.
• ఇప్పుడు స్టౌపై కడాయి పెట్టుకొని ఆయిల్ వేసుకోవాలి. నూనె బాగా వేడయ్యాక కలిపి పెట్టుకున్న పిండిని తీసుకొని కాకరకాయ ముక్కలను ఒక్కొక్కటిగా నెమ్మదిగా వేసుకోవాలి. ఆపై మంటను మీడియం ఫ్లేమ్​లో ఉంచి ఎర్రగా, క్రిస్పీగా మారేంత వరకు వేయించుకోవాలి.
• ఆవిధంగా వేయించుకున్నాక వాటిని పేపర్ నాప్​కిన్ వేసుకొన్న ప్లేట్​లోకి తీసుకొని సర్వ్ చేసుకుంటే చాలు. అంతే.. ఎంతో టేస్టీగా ఉండే కరకరలాడే "కాకరకాయ చిప్స్" రెడీ!

ఇవీ చదవండి :