'కాంగ్రెస్ హైకమాండ్​కు తెలిసే - తెలంగాణలో దోపిడీ, మోసాలు జరుగుతున్నాయి'

హర్యానా, మహారాష్ట్రలోని ప్రజలు కాంగ్రెస్ పార్టీని నమ్మలేదన్న కేటీఆర్ - బీసీలకు 42 శాతం రిజర్వేషన్లు ఇవ్వకుండా స్థానిక సంస్థల ఎన్నికలు ఎలా నిర్వహిస్తారని మండిపాటు - మీడియాతో చిట్​చాట్​లో కేటీఆర్

BRS Working President KTR Chitchat With Media : తెలంగాణ రాష్ట్రంలో జరుగుతున్న దోపిడీ, మోసాలు కాంగ్రెస్ అధిష్టానానికి తెలుసని బీఆర్ఎస్ వర్కింగ్ ప్రెసిడెంట్ కేటీఆర్ ఆరోపించారు. దేశంలోని వివిధ రాష్ట్రాల్లో బీజేపీ గెలుపు కోసం కాంగ్రెస్ ప్రయత్నం చేస్తోందని, బీజేపీ వ్యతిరేక ఓటు చీలాలన్నది కాంగ్రెస్ ఆలోచన అని ఆయన అన్నారు. రంగారెడ్డి జిల్లా షాబాద్​లో మీడియా ప్రతినిధులతో కేటీఆర్ ఇష్టాగోష్ఠిగా మాట్లాడారు. రాష్ట్రంలో ఏడాదిగా మోసాల పరంపర కొనసాగుతోందని, హర్యానా, మహారాష్ట్రలోని ప్రజలు కాంగ్రెస్ పార్టీని నమ్మలేదని అన్నారు.

కేజ్రీవాల్ కోసం రాహుల్ సభ : ఎన్నికైన మూడు రాష్ట్రాల్లో కాంగ్రెస్ మోసాలు కొనసాగుతున్నాయని పేర్కొన్నారు. గ్యారంటీలు కాదు, గారడీలను ప్రజలు తిరస్కరించారని కేటీఆర్ అన్నారు. దిల్లీలో కూడా కాంగ్రెస్​ను తిరస్కరిస్తారని తెలిపారు. లోక్​సభ ఎన్నికల సమయంలో అరవింద్ కేజ్రీవాల్ కోసం రాహుల్ గాంధీ సభ కూడా పెట్టారని, ఇప్పుడు కేజ్రీవాల్ స్కాములు అని రేవంత్ రెడ్డి అంటున్నారని ఆక్షేపించారు. సోనియా, రాహల్, ప్రియాంక గాంధీని తెలంగాణ ప్రజలు నమ్మి ఓట్లు వేశారని కేటీఆర్ మండిపడ్డారు.

బీసీ డిక్లరేషన్​పై మల్లగుల్లాలు : బీసీలకు 42 శాతం రిజర్వేషన్లు ఇవ్వకుండా స్థానిక సంస్థల ఎన్నికలు ఎలా నిర్వహిస్తారన్న కేటీఆర్, బీసీ డిక్లరేషన్, స్కాముల గురించి బీజేపీ ఎందుకు మాట్లాడడం లేదని ప్రశ్నించారు. స్వయంగా ప్రధాని ఆర్​ఆర్ ట్యాక్స్ అని చర్యలు ఎందుకు తీసుకోవడం లేదని ప్రశ్నించారు. జగిత్యాలలో ఎమ్మెల్సీ జీవన్ రెడ్డి పరిస్థితి ఏంటో తెలుసుకోవాలని, సొంత కాంగ్రెస్ కార్యకర్తను హత్య చేస్తే దిక్కులేదని కేటీఆర్ విమర్శలు గుప్పించారు.

తెలంగాణ ప్రజలు ముమ్మాటికీ నిలదీయాల్సింది దిల్లీలోని కాంగ్రెస్ అధిష్టానాన్నేనని ధ్వజమెత్తారు. హిమాచల్​ప్రదేశ్ తరహాలో దేశం అంతటా గంజాయి సాగు తీసుకొస్తారేమోనని ఆశ్చర్యం వ్యక్తం చేశారు. ఎన్నికల కోసమే రైతు భరోసా నాటకం అన్న ఆయన కేసీఆర్ చెప్పినట్లు ఎన్నికలు అయిపోగానే రైతులకు సాయం నిలిపివేస్తారని తెలిపారు. బీఆర్ఎస్​కు ఆయువుపట్టు రైతులేనని, వారి తరఫున నిరంతరం ప్రశ్నిస్తూనే ఉంటామని అన్నారు.

సభాపతి నిర్ణయం తీసుకోవాలి : సీఎం రేవంత్ రెడ్డి 2024 దావోస్ పర్యటనతో 40 వేల కోట్ల పెట్టుబడులు వచ్చాయన్నారు. అందులో 40 పైసలు కూడా రాలేదని కేటీఆర్ ఎద్దేవా చేశారు. ఏడాదిలో రేవంత్ రెడ్డి తెచ్చిన ఒక్క పరిశ్రమనైనా చూపాలని అన్నారు. ఫార్ములా-ఈ రేసు కేసులో అవినీతి లేదని మంత్రి పొన్నం ప్రభాకర్ అన్నారని గుర్తు చేశారు. ఫిరాయింపులపై సుప్రీంకోర్టు తీర్పు స్పష్టంగా ఉందన్న కేటీఆర్, మూడు నెలల్లో సభాపతి నిర్ణయం తీసుకోవాలని గతంలోనే మణిపూర్ కేసులో సుప్రీంకోర్టు స్పష్టమైన తీర్పు ఇచ్చిందని పేర్కొన్నారు.

హైకోర్టు తీర్పును కూడా సభాపతి బేఖాతరు చేయడం లేదన్న ఆయన, ఈ ఏడాది ఉప ఎన్నికలు కచ్చితంగా వస్తాయని భావిస్తున్నట్లు తెలిపారు. ఫిరాయింపుదారులను మళ్లీ వెనక్కు తీసుకునే ఉద్దేశం ఉంటే సుప్రీంకోర్టులో పిటిషన్ ఎందుకు వేస్తామని కేటీఆర్ అన్నారు. పది నియోజకవర్గాల్లో తమకు చాలా మంచి అభ్యర్థులు ఉన్నారని తెలిపారు. బీజేపీ నేతలు తనపై చూపే ఉత్సాహాన్ని కాంగ్రెస్ ప్రభుత్వంపై చూపాలని, అమృత్ అవినీతిపై కేంద్రానికి వెళ్లి ఫిర్యాదు చేసినా కేంద్ర ప్రభుత్వం చర్యలు తీసుకోవడం లేదని కేటీఆర్ అసహనం వ్యక్తం చేశారు.

అబద్దాల ప్రచారానికే రూ.550 కోట్లు! : ఆర్​ఎస్​ఎస్​తో సంబంధాలు ఎవరికి ఉన్నాయో, లోపల ఖాకీ నిక్కర్ అని అసదుద్దీన్ ఓవైసీ ఎవరిని అన్నారో అందరికీ తెలుసని కేటీఆర్ వ్యాఖ్యానించారు. ఏడాదిలో అబద్దాల ప్రచారానికి రేవంత్ రెడ్డి రూ. 550 కోట్లు ఖర్చు చేశారని ఆరోపణలు చేశారు. రేవంత్ రెడ్డి ఏకపక్షంగా రద్దు చేయడం వల్ల రూ. 46 కోట్లతో పాటు రాష్ట్ర ప్రతిష్ఠ దెబ్బతిందని ఆయన ఆరోపించారు. 46 కోట్లు వసూలు చేసేందుకు ఏడాదిగా సీఎం ఏం చేశారని ప్రశ్నించారు.