రాచకొండ కమిషనరేట్‌లో అస్తవ్యస్తంగా ట్రాఫిక్‌ - వాహనాలు బారులుతీరుతున్నా పట్టించుకోని పోలీసులు - Traffic Problems in Hyderabad

Traffic Problems : నగరంలో ట్రాఫిక్​ సమస్యలు అంతకంతకూ పెరిగిపోతున్నా ట్రాఫిక్‌ విభాగం ప్రేక్షక పాత్ర పోషిస్తోంది. సగం రోడ్లను ఆక్రమించి వ్యాపారులు, రోడ్లకు అడ్డంగా వాహనాలు నిలిపివేయడంతో రాచకొండ కమిషనరేట్‌లో ట్రాఫిక్​ అస్తవ్యస్తంగా మారుతోంది. ప్రధాన కూడళ్లలో వాహనాలు బారులు తీరుతున్నా ట్రాఫిక్​ పోలీసులు పట్టించుకోకపోడం గమనార్హం.

Huge Traffic at Rachakonda Commissionerate Areas :నగరంలో ఇప్పటికే ట్రాఫిక్​ జామ్​తో వాహనదారులు సతమతమవుతున్న వేళ రోడ్లను సగం మేర ఆక్రమించి వ్యాపారులు, ​ప్రధాన కూడళ్ల దగ్గర అడ్డగోలుగా నిలిపేస్తున్న వాహనాలతో రాచకొండ కమిషనరేట్‌లో ట్రాఫిక్‌ అస్తవ్యస్తంగా మారుతోంది. దీనిని పరిష్కారించాల్సిన ట్రాఫిక్​ విభాగం ప్రేక్షక పాత్ర పోషిస్తుండడంతో సమస్య తీవ్రత ఇంకా పెరుగతోంది. కొన్ని ప్రధాన కూడళ్లల్లోనూ ట్రాఫిక్​ సమస్యలను పట్టించుకోకుండా కేవలం చలానాలకు పరిమితమవడం తీవ్ర విమర్శలకు దారీ తీస్తోంది.

ప్రధాన ప్రాంతాల్లో పర్యవేక్షణలేమి

• పైవంతెన, అండపాస్​లతో ఎల్బీనగర్​ చౌరస్తాలో ట్రాఫిక్​ సిగ్నల్స్​ లేక సిగ్నల్​ ఫ్రీ జంక్షన్​గా మారింది. మిగతా ప్రాంతాలతో పోలిస్తే ఇక్కడ పరిస్థితి మెరుగ్గా ఉండాలి. కానీ ట్రాఫిక్​ పోలీసులు పర్యవేక్షణలేమితో ఆటోలు, ఇతర వాహనాదారులు ఇష్టారీతిన పార్కింగ్ చేస్తున్నారు. బస్సులు సైతం స్టాపుల వద్ద నిలపకపోవడంతో గందరగోళంగా మారుతోంది.
• ​ఉప్పల్‌ కూడలిలోనూ వరంగల్​ వెళ్లే వెహికల్స్​, ఆర్టీసీ బస్సులు అడ్డగోలుగా నిలపడంతో రద్దీ ఏర్పడుతోంది. వరంగల్​ నేషనల్​ హైవేలో ప్రవేశించగానే ఇరుకు రోడ్డు ట్రాఫిక్​ స్తంభించిపోతుంది.
• హబ్సిగూడ చౌరస్తా నుంచి ఉప్పల్‌ వరకు సాయంత్రం వేళ ప్రయాణించే వాహనదారులకు ​విసుగుపుట్టిస్తోంది.
• చైతన్యపురి- రంగారెడ్డి కోర్టు వరకు ప్రధాన రహదారిని కొందరు పండ్ల వ్యాపారులు సగం మేర ఆక్రమిస్తున్నారు.
• నాగోల్​, ఉప్పల్‌ మెట్రోస్టేషన్ల కంటే ముందు వచ్చే యూటర్న్‌ల వద్ద ట్రాఫిక్​ సమస్య ఎక్కువగా ఉంటోంది.

అప్‌డేట్స్‌లో రాచకొండ పోలీసులు వెనకడుగు : విజయవాడ హైవే, ఎల్బీనగర్‌- హబ్సిగూడ వరకు ఇన్నర్‌ రింగురోడ్డు, సాగర్‌ రహదారి వంటి కీలకమైన మార్గాలు రాచకొండ కమిషనరేట్‌ పరిధిలో ఉన్నాయి. రద్దీ సమయాలు, వర్షాలు ఇతర ప్రత్యేక సందర్భాల్లో సైబరాబాద్‌, హైదరాబాద్ పోలీసులు సోషల్​ మీడియా ద్వారా ప్రజలకు తాజా సమాచారం ఇస్తున్నాయి. కానీ రాచకొండ పోలీసులు మాత్రం ఈ తాజా సమాచారం ఇవ్వడంతో కొంత వెనుకబడ్డారు.