మేమూ దాడులు చేయగలం కానీ - తెలంగాణ ఇమేజ్ పాడవ్వొద్దని ఆగుతున్నాం : హరీశ్ రావు - HARISH RAO SLAMS CONGRESS GOVT

Harish Rao Slams Congress Govt Over Attacks On BRS : రుణమాఫీపై ప్రశ్నించినందుకు, వరదలపై నిలదీసినందుకు, ఇప్పుడు ఫిరాయింపులపై కోర్టుకు వెళ్లినందుకు.. ఇలా ప్రభుత్వంపై నిరసన గళం ఎత్తిన ప్రతిసారి ప్రతిపక్షంపై దాడులు చేస్తున్నారని మాజీ మంత్రి హరీశ్ రావు ఆరోపించారు. బీఆర్ఎస్ నేతలపై దాడులు జరుగుతుంటే పోలీసులు ఎందుకు చర్యలు తీసుకోవడం లేదని ప్రశ్నించారు. తమకూ దాడులు చేయొచ్చని, కానీ తెలంగాణ బ్రాండ్ ఇమేజ్ దెబ్బతినకూడదనే ఉద్దేశంతో సంయమనం పాటిస్తున్నామని తెలిపారు.

Harish Rao Slams CM Revanth Over Attacks On BRS :కౌశిక్‌రెడ్డిపై దాడి జరిగినప్పుడు డీజీపీ ఎందుకు స్పందించలేదు? అని బీఆర్ఎస్ నేత, మాజీ మంత్రి హరీశ్‌రావు ప్రశ్నించారు. రాష్ట్రంలో శాంతిభద్రతలు ఉన్నాయా? అని నిలదీశారు. కౌశిక్‌రెడ్డి ఇంటిపై రాళ్లదాడి చేసిన వారికి రాచమర్యాదలు చేశారని ధ్వజమెత్తారు. దాడి చేసిన వారిపై ఫిర్యాదు చేయడానికి వస్తే తమను అరెస్టు చేశారని మండిపడ్డారు. ఖమ్మం, సిద్దిపేటలో తమపై దాడి జరిగినప్పుడు పోలీసులు ఎక్కడ ఉన్నారని నిలదీశారు.

బీఆర్‌ఎస్‌ నేతలపై దాడులు జరిగితే పోలీసులు ఎందుకు చర్యలు తీసుకోరని హరీశ్ రావు ప్రశ్నించారు. కౌశిక్‌రెడ్డిపై దాడికి సీఎం రేవంత్‌రెడ్డే కారణం అని ఆరోపించారు. ముఖ్యమంత్రి రేవంత్‌రెడ్డే రెచ్చగొట్టేలా మాట్లాడుతున్నారన్న హరీశ్‌రావు, సీఎంను చూసే మిగిలిన నేతలు నేర్చుకుంటారని వ్యాఖ్యానించారు. అరెకపూడి గాంధీని నిన్నే హౌస్‌ అరెస్టు చేసి ఉంటే కౌశిక్​రెడ్డిపై దాడి జరిగేది కాదని హరీశ్​రావు అన్నారు.

"కౌశిక్‌రెడ్డి ఇంటిపై దాడికి కారణం సీఎం రేవంత్‌రెడ్డి. రాష్ట్రంలో ఎమర్జెన్సీ పాలన నడుస్తోంది. రేవంత్‌రెడ్డిని అరెస్టు చేయడానికి వెళ్లిన పోలీసులను ఇష్టం వచ్చినట్లు తిట్టారు. అరెస్టు చేయడానికి వచ్చిన పోలీసులకు మేము సహకరించాం. ఇది కేసీఆర్‌, రేవంత్‌రెడ్డి నాయకత్వానికి ఉన్న తేడా. రాహుల్‌గాంధీ ప్రజాస్వామ్యం గురించి అమెరికాలో మాట్లాడుతున్నారు. తెలంగాణలోని అరాచకపాలన గురించి రాహుల్‌గాంధీ మాట్లాడాలి. రేవంత్‌రెడ్డి డైవర్షన్‌ పాలిటిక్స్‌ చేస్తున్నారు." - హరీశ్​రావు, మాజీ మంత్రి

ఫిరాయింపులపై హైకోర్టు తీర్పును పక్కదారి పట్టించడానికే కౌశిక్‌రెడ్డిపై దాడికి దిగారని హరీశ్​రావు ఆరోపించారు. రుణమాఫీపై ప్రశ్నిస్తే సిద్దిపేటలో కార్యాలయంపై దాడి చేశారని, వరదలపై ప్రశ్నిస్తే ఖమ్మంలో దాడి చేశారని అన్నారు. తమపై ఎన్ని రాళ్లు వేస్తావో వేయండి, వాటితోనే మళ్లీ అధికారంలోకి వస్తామని వ్యాఖ్యానించారు. పోలీసుల గౌరవం తగ్గకూడదనే సహకరిస్తున్నామన్న ఆయన, దాడి చేయాలనుకుంటే తామూ చేయగలమని తెలిపారు. రాష్ట్రం బ్రాండ్‌ దెబ్బతినకూడదనే సంయమనం పాటిస్తున్నామని వెల్లడించారు.